मराठी साहित्य – समाजपारावरून साप्ताहिक स्तम्भ – ☆ पुष्प तेवीस # 23 ☆ कँलेंडर ☆ – कविराज विजय यशवंत सातपुते
कविराज विजय यशवंत सातपुते
(समाज , संस्कृति, साहित्य में ही नहीं अपितु सोशल मीडिया में गहरी पैठ रखने वाले कविराज विजय यशवंत सातपुते जी की सोशल मीडिया की टेगलाइन “माणूस वाचतो मी……!!!!” ही काफी है उनके बारे में जानने के लिए। जो साहित्यकार मनुष्य को पढ़ सकता है वह कुछ भी और किसी को भी पढ़ सकने की क्षमता रखता है।आप कई साहित्यिक, सांस्कृतिक एवं सामाजिक संस्थाओं से जुड़े हुए हैं । इस साप्ताहिक स्तम्भ के माध्यम से वे किसी न किसी सामाजिक अव्यवस्था के बारे में चर्चा करते हैं एवं हमें उसके निदान के लिए भी प्रेरित करते हैं। आज प्रस्तुत है श्री विजय जी की एक सामयिक कविता “कँलेंडर ”। आप प्रत्येक शुक्रवार को उनके मानवीय संवेदना के सकारात्मक साहित्य को पढ़ सकेंगे। )
☆ साप्ताहिक स्तंभ –समाज पारावरून – पुष्प तेवीस # 23 ☆
☆ कँलेंडर ☆
डिसेंबर संपता संपता ….
आयुष्याच कोरं पान……..
उगीच भरल्या सारखं वाटतं,
शिशिराच्या पानगळीत सुद्धा
वसंत वैभवात मन रमतं…….!
किती सहज उलटतो पाने ……
संकल्पाने सालंकृत…
कार्येप्रवणतेने आलंकृत…
एक एक स्मृती सजवतो…
हृदयाच्या कोंदणात . . . . !
मागील पानांवर,
पुन्हा पुन्हा जाते नजर..
आठवणींची हळवी जर,
तिलाच असते कदर कृतीशील स्मरण नोंदी,
झळकतात पानावर
शब्दांचा पारा, कधी गडद ,कधी धूसर
नजर वर्तमानात पण मन मात्र गतकाळावर. . . . !
काही चौकटी उगाच ठसतात मनात
अन ताज्या होतात विस्मृती…….
आकडेवारी बदलत नाही . . .
बदलतात संदर्भ कागद, शाई अन पानांचे . .
मानवी नात्यांचे नात्यातील रंगाचे . . . !
सुख-दुःखाच्या चौकटी ………
आनंदाश्रूंच्या स्नेहधारा……..
मान-अपमानाचा वर्षाव……….
विश्वास- बेईमानीचा संघर्ष ………
विसरता येत नाही. . . . !
खऱ्या-खोट्याचे ठोकताळे ……….
हव्या-नकोशा आठवणी …
प्रेम-प्रितीच्या वंचना . . वल्गना …
आपल्या माणसांचे वाढदिवस ……..
गावातल्या जत्रा, उरूस, मेळे
विसरता येत नाही. . . . . !
ऊन-सावलीच्या चौकटी ……..
जगवतात जीवन तरू…………
याच कॅलेंडरच्या जीर्ण पानात
सुई, दोरा टोचलेल्या आठवात
दिवस रात्रीच्या ऋतूचक्रात .. . !
कुणीतरी येत, कुणीतरी जातं
स्वभाव तोच आठवण बदलते
आकडे तेच तिथी वार बदलेला
आठवणींचा ओला श्वास
पानापानावर थांबलेला.. !
शब्दाचं कुटुंब कागदावर सजलेलं
आठवणींच गोकुळ मनामध्ये नटलेलं
भूत, भविष्य, वर्तमान, पानामध्ये सामावलेलं
नवीन वर्ष, नवीन कॅलेंडर, प्रतिक्षेत थांबलेलं
निरोप आणि स्वागताला सदानकदा आसुसलेलं.. !
© विजय यशवंत सातपुते
यशश्री, 100 ब दीपलक्ष्मी सोसायटी, सहकार नगर नंबर दोन, पुणे 411 009.
मोबाईल 9371319798.