श्री अशोक श्रीपाद भांबुरे
(वरिष्ठ मराठी साहित्यकार श्री अशोक श्रीपाद भांबुरे जी का अपना एक काव्य संसार है । आप मराठी एवं हिन्दी दोनों भाषाओं की विभिन्न साहित्यिक विधाओं के सशक्त हस्ताक्षर हैं। आज साप्ताहिक स्तम्भ –अशोक भांबुरे जी यांची कविता अभिव्यक्ती शृंखला की अगली कड़ी में प्रस्तुत है एक भावप्रवण कविता “चेहऱ्यावर चेहरे”।)
☆ साप्ताहिक स्तम्भ – अशोक भांबुरे जी यांची कविता अभिव्यक्ती # 30☆
☆ चेहऱ्यावर चेहरे ☆
आसवांना अंतरी दडवू नको
आरश्याला तू असे फसवू नको
मखमली हा चेहरा नाराज का ?
चेहऱ्यावर चेहरे चढवू नको
सूर्य पाठीशी उभा असता तुझ्या
भर दुपारी काजवे जमवू नको
नेत्रपल्लव त्यात मजला झाक तू
तेथुनी मजला पुन्हा हलवू नको
जन्मठेपेची सजा तू दे मला
अन् जगापासून हे लपवू नको
सूर अपुले पाहुनी घेऊ जरा
मैफिलीचे काय ते ठरवू नको
बेत ठरला जर नकाराचा तुझा
ठेव हृदयी तो मला कळवू नको
© अशोक श्रीपाद भांबुरे
धनकवडी, पुणे ४११ ०४३.
मो. ८१८००४२५०६, ९८२२८८२०२८
