श्री अशोक श्रीपाद भांबुरे
(वरिष्ठ मराठी साहित्यकार श्री अशोक श्रीपाद भांबुरे जी का अपना एक काव्य संसार है । आप मराठी एवं हिन्दी दोनों भाषाओं की विभिन्न साहित्यिक विधाओं के सशक्त हस्ताक्षर हैं। आज साप्ताहिक स्तम्भ –अशोक भांबुरे जी यांची कविता अभिव्यक्ती शृंखला की अगली कड़ी में प्रस्तुत है एक समसामयिक एवं भावप्रवण कविता “हळदीचा लेप ”।)
☆ साप्ताहिक स्तम्भ – अशोक भांबुरे जी यांची कविता अभिव्यक्ती # 63 ☆
☆ हळदीचा लेप ☆
माझ्या काळजाचा गाव
तेथे कालवाकालव
आले माहेरी सोडून
पूर्व संचिताचा डाव
माझं सोन्यावाणी रूप
त्याला हळदीचा लेप
ओलांडता उंबरठा
नव्या घराचा प्रभाव
प्रीतिच्या या सागरात
जलविहाराचा बेत
लाटांवर झुलण्याचा
आता होईल सराव
खेळ संसाराचा खेळू
अपवाद सारे टाळू
जेथे जमीन सुपीक
तेथे फुलण्याला वाव
कोंबडा हा आरवला
सूर्य उदयास आला
आनंदाला आज माझ्या
नाही उरलेला ठाव
© अशोक श्रीपाद भांबुरे
धनकवडी, पुणे ४११ ०४३.
मो. ८१८००४२५०६, ९८२२८८२०२८
≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित ≈
सुंदर कल्पना