श्री अशोक श्रीपाद भांबुरे
☆ साप्ताहिक स्तम्भ – अशोक भांबुरे जी यांची कविता अभिव्यक्ती # 79 ☆ आसवांशी वैर ☆
का हजारो आसवांशी वैर केले ?
हे कसे गर्भात त्यांचे खून झाले ?
आसवे ही वाढती तुमच्याच देही
हा खरातर आसवांचा दोष नाही
ह्या मिठाला जागणाऱ्या आसवांना
पाहिले मी गूढ काही सांगतांना
भावना ह्या आसवांना भेटल्यावर
भेटल्याची खूण दिसते पापण्यांवर
हर्ष होता आसवांच्या हालचाली
जाणुनी घेण्यास आली ती खुशाली
हुंदका दाटून येता ती प्रवाही
सोडली ना साथ त्यांनी ही कधीही
वार देहावर कुठे झाला तरीही
भार वाही फक्त होती आसवे ही
© अशोक श्रीपाद भांबुरे
धनकवडी, पुणे ४११ ०४३.
मो. ८१८००४२५०६, ९८२२८८२०२८
≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित ≈
