श्री अशोक श्रीपाद भांबुरे
☆ साप्ताहिक स्तम्भ – अशोक भांबुरे जी यांची कविता अभिव्यक्ती # 109 ☆
☆ कातरवेळी ☆
तिला पाहुनी सुचती मजला सुंदर ओळी
तिच्या मनीचे भाव मांडतो देते टाळी
तिची भेट तर ठरली होते कातरवेळी
इतक्या साध्या स्वप्नांचीही व्हावी होळी
बाप करारी वाटत होता तो तर कोळी
मला पाहते नजर तिची तर ही मासोळी
मीही होतो शेर तसा तर एकेकाळी
बाप तिचा हा पाहुन झाली माझी शेळी
माय तिची तर खूपच होती साधीभोळी
हात तिचा तर सदैव होता अमुच्या भाळी
नशीब होते बागेचा मी झालो माळी
आज फुलांनी भरली होती माझी झोळी
अंगणातली सारवलेली जमीन काळी
त्या भूमीवर प्रिया काढते मग रांगोळी
© अशोक श्रीपाद भांबुरे
धनकवडी, पुणे ४११ ०४३.
मो. ८१८००४२५०६, ९८२२८८२०२८
≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈
