श्री अशोक श्रीपाद भांबुरे
साप्ताहिक स्तम्भ – अशोक भांबुरे जी यांची कविता अभिव्यक्ती # 118 ☆ देवराया ☆
रुबाबाची झूल, होती पांघराया
निराधारावर, केली नाही माया
नेता नाही आले, स्वर्गलोकी धन
नाही मोक्ष प्राप्ती, अडकले मन
राख होउनिया, उधळली काया
जिंकण्याची मनी, कायमच होड
होता नाही आले, मला कधी झाड
देता नाही आली, परक्यास छाया
परमार्थ नाही, कधी साधला मी
मला भेटला ना, कधी कुणी स्वामी
सांभाळून घ्यावे, तरी देवराया
मित्रांत खेळलो, प्रेमात पोळलो
मोह माया आदी, व्याधीस भाळलो
आयुष्याचा वेळ, घालवला वाया
© अशोक श्रीपाद भांबुरे
धनकवडी, पुणे ४११ ०४३.
मो. ८१८००४२५०६, ९८२२८८२०२८
≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈
