मराठी साहित्य – कवितेचा उत्सव ☆ गेला श्रावण ☆ श्री रवींद्र देवघरे

☆ कवितेचा उत्सव ☆ गेला श्रावण ☆ श्री रवींद्र देवघरे ☆

वाट पाहुनी वाटे वरती थकले मधुबन,

रिमझिम आसव सरीत बरसुनि गेला श्रावण.

तृषार्त धरेची मृगातही ‘मृगया’  झाल्यावर,

तृषातृप्तिचे अमृत शिंपुन गेला श्रावण.

पाण्यासाठी दाहिदिशांना त्राहि-त्राहि तरी,

पाणवठ्याचे पाउल भिजवुन गेला श्रावण.

अंकुरण्यासाठी आसुसलेल्या अवनीला मग,

गर्भ-रेशमी हिरवा शालू देउन गेला श्रावण.

वृक्ष-वल्ली पशु-पक्षी सृष्टीतिल सगे-सोयरे,

पर्यावरणाचे निसर्ग नाते शिकवुन गेला श्रावण.

सृष्टीतील सर्वांच्या सह अस्तित्वा साठी,

‘राखा वसुधेचा मान’ बजावुन गेला श्रावण.

कालपरत्वे आज-उद्याचे जीवन जगवुन,

‘येइन पुढल्या वर्षी’ सांगुन गेला श्रावण.

© श्री रवीन्द्र देवघरे

नागपूर.

मो  9561117803.

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित  ≈