सौ. उज्वला सुहास सहस्रबुद्धे
कवितेचा उत्सव
☆ खवय्यांचे श्रावण गीत ! ☆ सौ. उज्वला सुहास सहस्रबुद्धे☆
श्रावण येता रोज आम्हाला,
पक्वानाचे ताट दिसे !
नागपंचमीच्या लाह्या, तंबिट,
स्वादिष्ट कडबू मनी वसे!
श्रीकृष्णाच्या जन्मोत्सवी,
दहीकाल्याचा स्वाद असे !
रक्षाबंधन, नारळी पौर्णिमा,
नारळी भाताची मूद सजे!
श्रावण सोमवार उपास सोडता,
मिळत असे नवनवीन गोडवा!
संपत शुक्रवार ही येता,
पुरणपोळीचा घास हवा!
श्रावणातली व्रतवैकल्ये,
अन् पूजा सत्यनारायणाची!
भरपेट जेवूनी, प्रसाद खाऊनी,
तृप्ती करीतसे तनामनाची!
© सौ. उज्वला सुहास सहस्रबुद्धे
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
