मराठी साहित्य – कवितेचा उत्सव ☆ उरलेले आयुष्य… ☆ श्री रवींद्र सोनावणी ☆

श्री रवींद्र सोनावणी

 कवितेचा उत्सव 

उरलेले आयुष्य…  ☆ श्री रवींद्र सोनावणी ☆

काही न उरले देण्याजोगे

रित्या ओंजळी रिते खिसे,

घेणे आता नको वाटते

देण्याचे लागले पिसे ||

या व्यवहारी जगात आहे

देणे – घेणे नित्याचे,

देतांना नच मनात यावे

बदली काही घेण्याचे ||

हात देऊनी बुडणाऱ्याला

काठावर घेऊन यावे,

मरणाऱ्याला रक्त देऊनी

यथाशक्य ते जगवावे ||

भले न काही देता आले

मनस्ताप तरी देऊ नये,

चटके विझवा सांगुन चुटके

हास्य द्यावया विसरु नये ||

दीन जनांचे टिपण्या आसू

आयुष्य उरले खर्चावे,

मरणोत्तरही शरीर अपुले

अभ्यासास्तव अर्पावे ||

श्वासामधले भासही आता

ध्यास घेऊनी उठतील,

दुज्यास काही देता देता

दिवस सार्थकी लागतील ||

© श्री रवींद्र सोनावणी

निवास :  G03, भूमिक दर्शन, गणेश मंदिर रोड, उमिया काॅम्पलेक्स, टिटवाळा पूर्व – ४२१६०५

मो. क्र.८८५०४६२९९३

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈