मराठी साहित्य – कवितेचा उत्सव ☆ वसंत वनी आला ☆ सौ.ज्योत्स्ना तानवडे ☆

सौ.ज्योत्स्ना तानवडे

 कवितेचा उत्सव 

☆ वसंत वनी आला ☆ सौ.ज्योत्स्ना तानवडे ☆ 

कुहू कुहूची तान ऐकता

निसर्गाचा सांगावा आला

पुन्हा नव्याने सृष्टी फुलविण्या

ऋतुराज वसंत आला ||

पानगळीने सरले जीवन

नवे कोंब फुलून आले

इवली नाजूक पाने पोपटी

झाड मोहरून डोलू लागले ||

रंगबिरंगी फुले डोलती

तरुवर अंगोपांगी फुलती

मकरंदला टिपण्यासाठी

फुलपाखरे भिरभिरती ||

पळस पांगारा बहव्याच्या

सवे फुलला गुलमोहर

निसर्गाच्या रंगपंचमीला

अवचित आला किती बहर ||

आमराई ती घमघमते

नवयौवना जणू अवनी

वसंताच्या आगमनाने

चैतन्य पसरते जीवनी ||

© सौ.ज्योत्स्ना तानवडे

वारजे, पुणे.५८

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈