सुश्री ज्योत्स्ना तानवडे
चित्रकाव्य
– बसंत बहार – ☆ सुश्री ज्योत्स्ना तानवडे ☆
☆
वाटेवरती उभी दुतर्फा
झाडे सलामीला सुंदरशी
रंगबिरंगी फुलोऱ्यातूनी
बहरून आली मनभावनशी ||
☆
वाटेवरची आसने ती
वाट पाहती पांथस्तांची
घडीभरीचा देत विसावा
सेवा करती मानवतेची ||
☆
असे वाटते झाडे जणू
भिडुनी खेळती झिम्मा
त्यांच्या खालून आपणही
खेळत जावे हमामा ||
☆
वाटेवरची कमान जणू
साज ल्याली इंद्रधनुचा
पायतळीची पखरण ती
असे गालिचा भूमातेचा ||
☆
वाट अशी ही सोबतीला
नेते स्वप्नांच्या गावाला
प्रसन्नचित्ते मी ही तिथे
साद घालितसे सख्याला ||
☆
चित्र साभार – सौ.ज्योत्स्ना तानवडे
© सौ.ज्योत्स्ना तानवडे
वारजे, पुणे.५८
≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
