श्री सुहास सोहोनी
कवितेचा उत्सव
🌸 सुगंधस्मृती… 🌸 श्री सुहास सोहोनी ☆
पहाट समयी विखरुन पडला
सडा अंगणी शुभ्र फुलांचा
प्राजक्ताचा परिमळ पसरे
स्मरण देतसे हरिनामाचा …
रामप्रहरी कानि सांगतो
सुगंध मोहक बकुल फुलांचा
राखुन ठेवी दोन घास रे
दुर्मिळ अतिथी आज यायचा …
चांफेकळि ये उतून मातुन
सायंकाळी सौेरभ फेकित
शुभंकरोती राहुन जाइल
विसरु नको रे घाईगर्दित …
परिमळ सांगे रातराणिचा
घालित रुंजी देइ आठवण
सखे सोबती अन् स्वकियांची
काळाने ज्या दिले देवपण …
हलके फुलके गंध सुवासिक
जाग्या करिती स्मृती शुचिर्भुत
गुलाब जाई जुइ चमेली
भरून घ्यावी नित्य ओंजळित …
उत्तररात्री गंध न उरती
स्मृतीहि अवघ्या विरून जाती
रिक्त मनाच्या पटलावरती
शून्य भावना केवळ उरती
सुगंधापरि ध्वनी स्पर्श अन्
दृष्टीहि चमको सतेजतेने
लाभ मिळो आगळा तयांचा
जीवन अवघे व्हावे सोने …
© सुहास सोहोनी
रत्नागिरी
दि. १९-०३-२०२३.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
