सौ.ज्योत्स्ना तानवडे
कवितेचा उत्सव
☆ आरती श्रीशंकराची ☆ सौ.ज्योत्स्ना तानवडे ☆
(साकव्य विकास मंच आयोजित अभंग लेखन स्पर्धेत सर्वोउत्कृष्ट क्रमांक प्राप्त रचना)
🙏 || आरती श्रीशंकराची || 🙏
☆
जय देव जय देव शिव शंभो त्रिपुरारी
भवतारक देवा हे त्रिनेत्रधारी ||
जय देव जय देव || ध्रु ||
☆
त्रिशूळ डमरू शोभे सर्पमाळ गळा
रुद्राक्षधारी हा शिवशंकर भोळा
भोलेनाथासी भक्तांचा लळा
अभयदान देई त्याचा तिसरा डोळा ||
जयदेव जयदेव || १ ||
☆
कैलासाधिपती गिरिजावर देवा
कृपा करावी तुझी नित्य घडो सेवा
शिव शिव स्मरता भुक्ति मुक्तिचा ठेवा
नाम जपो वैखरी ही तुझे सदाशिवा ||
जय देव जय देव || २ ||
☆
लयतत्त्व स्वामी तू विश्व नियंता
तुझ्या कृपाप्रसादे लाभो शांतता
बुद्धी दे शक्ति दे देई तुष्टता
श्रीविश्वनाथा देई सौख्य या जगता ||
जय देव जय देव || ३ ||
☆
प्राशुनी हलाहलासी रक्षिली अवनी
तुज सम नाही त्राता अवघ्या त्रिभुवनी
गौरीहरा तव कृपेने आश्वस्थ हो धरणी
विश्वदयाळा ज्योत्स्ना लीन तुझ्या चरणी || ४ ||
☆
जय देव जय देव शिव शंभो त्रिपुरारी
भवतारक देवा हे त्रिनेत्रदारी ||
जय देव जय देव ||
☆
© सौ.ज्योत्स्ना तानवडे
वारजे, पुणे.५८
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
