सुश्री प्रभा सोनवणे
कवितेच्या प्रदेशात # 181
जाण… सुश्री प्रभा सोनवणे ☆
☆
आपण खूप हाका माराव्यात,
पण ओ देणारेच कोणी नसावे,
आपल्याला वेगळेच सांगायचे असावे
आणि समोरच्याने
भलतेच अर्थ लावावेत,
असे दु:ख तुमच्या वाट्याला,
कधी आले आहे का?
माणसांच्या कीर्र ऽऽ जंगलातून
वाट काढताना,
कुणीच भेटू नये आपले ?
जाणिवांचे ओझे आता
सोडून द्यावे समुद्रात,
तर समुद्रही दिसेना कुठे !
मला जाण येऊ लागली
आणि सारेच जाणते हद्दपार
या जंगलातून!
आता गेंड्याचे कातडे तरी
कसे पांघरायचे
सा-याच संवेदना जागृत झाल्यावर
आणि झोपेचे सोंग तरी
कसे घ्यायचे टक्क जागेपणी !
मी हाका मारणेही
सोडून देत नाही
आणि व्यक्त होणे ही …..
निदान एखादा प्रतिध्वनी तरी
कधी काळी येईलच ना माझ्यापाशी !
अनिकेत मधून… १९९७ नोव्हेंबर
© प्रभा सोनवणे
संपर्क – “सोनवणे हाऊस”, ३४८ सोमवार पेठ, पंधरा ऑगस्ट चौक, विश्वेश्वर बँकेसमोर, पुणे 411011
मोबाईल-९२७०७२९५०३, email- [email protected]
≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
