श्री आशिष बिवलकर
चित्रकाव्य
– वाट चाले पंढरीची…– ☆ श्री आशिष बिवलकर ☆
☆
वाट चाले पंढरीची,
आनंदवारीत वारकरी दंगला !
ओसंडला आनंद,
विठ्ठल रंगांनी चेहरा रंगला !
☆
भगवी पताका खांद्यावर,
फेटा बांधला शिरी !
मार्गस्थ देह झाला,
मुखी नाम रामकृष्ण हरी !
☆
कशाला चिंता संसाराची,
विठ्ठल भार त्याचा वाहतो !
ओढ त्याची लागे मना ,
वारीची वाट आनंदे चालतो !
☆
हृदयी भक्ती भाव
आत्मा झाला पांडुरंग !
वाट न वाटे खडतर,
सावळा देव चाले संग !
☆
भेटी संतसज्जन,
वैष्णवांचा रंगला सोहळा !
कपाळी झळकती गंध,
तुळशीमाळ घालुनी गळा !
☆
रामकृष्ण हरीनामाचा घोष,
नाद करी टाळ मृदूंग !
आसमंत विठ्ठलमय झाला,
मुखी संतांचे अभंग !
☆
माऊली वाट पाहे,
कर कटेवर ठेवुनी !
भेटी लागे जीवा,
लेकरं निघाली धावुनी !
☆
© श्री आशिष बिवलकर
बदलापूर
मो 9518942105
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
