मराठी साहित्य – कवितेचा उत्सव ☆ लोकशाहीरअण्णाभाऊ… ☆ सुश्री वृंदा (चित्रा) करमरकर ☆

सुश्री वृंदा (चित्रा) करमरकर

 कवितेचा उत्सव 

☆ लोकशाहीरअण्णाभाऊ… ☆ सुश्री वृंदा (चित्रा) करमरकर ☆

अन्याया विरुद्ध हाक देणारा

वाटेगावचा कोहिनूर हिरा

दीन दलितांना दिला न्याय खरा

साहित्य सम्राटाला या मानाचा मुजरा

शिक्षण शाळेत नाही घेतले

जेथे जातीयतेचे विष उगवले

जगाच्या शाळेत ज्ञान मिळविले

दीनांच्या कैवाऱ्याला हा मानाचा मुजरा

पायी चालत मुंबई गाठली

पायांची त्या चाळण झाली

कष्टकऱ्यांच्या अन्याया वाचा फोडली

लोकशाहिर अण्णाभाऊंना या मानाचा मुजरा

फकिरा लिहूनी अमर जाहला

ज्ञानाचा हा सूर्य तळपला

साहित्य क्षितीजी तारा झळकला

तेजस्वी प्रकाशाला हा मानाचा मुजरा

चरित्र यांचे प्रेरक ठरले

समानतेचे वारे वाहिले

दलितांचे कैवारी जाहले

समाजाच्या दीपस्तंभा हा मानाचा मुजरा

© वृंदा (चित्रा) करमरकर

सांगली

मो. 9405555728

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈