श्री आशिष बिवलकर
चित्रकाव्य
भूतलावरची हंडी… ☆ श्री आशिष बिवलकर ☆
☆
स्वर्गातल्या रोजच्या कामाला
कंटाळून भगवंतांनी मारली दांडी !
भगवंत अवतरले सुदाम्यासंगे
बघायला भूतलावरची दहीहंडी !
☆
कुठे जावे विचार करून
आले दोघेही मुंबापुरीत !
आपला जयघोष ऐकून
हायसे वाटले या नगरीत !
☆
भगवंत आश्चर्याने म्हणाले
कोणाचे प्रयत्न चालले अथक?
सुदामा हसत हसत उत्तरले
हे मुंबईतले गोविंदा पथक !
☆
दही हंडी का रे टांगली
त्यांनी इतक्या उंचावर ?
पुढाऱ्यांनी महत्वाकांक्षेचे
लावलेत इथे थरावर थर !
☆
मडक्यात काय घातलय
दही का नुसतेच पाणी?
स्टेजवरच्या मंडळीनी
आधीच मटकवलय लोणी !
☆
अरे त्या कोण नाचत आहेत
तिथे सुंदर गौळणी?
सिलेब्रिटी तारका डोलती
डीजेवरची कर्कश्य गाणी !
☆
लोणी नाही तर मिळेल
का थोडंसं दूध अन् दही?
जी.एस.टी. लागलाय आता
प्रश्न विचारता तुम्ही काहीही !
☆
सुदाम्या भाग्यवान आपण
द्वापार युगातच सरलो !
कलयुगात नामस्मरणासाठी
पोथीतच नाममात्र उरलो !
☆
© श्री आशिष बिवलकर
बदलापूर
मो 9518942105
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
