कविराज विजय यशवंत सातपुते
कवितेचा उत्सव # 192 – विजय साहित्य
☆ घे निरोप आमुचा ☆ कविराज विजय यशवंत सातपुते ☆
(वृत्त – चामर)
(गालगाल गालगाल गालगाल गालगा)
☆
चाललास आज तू, गजानना तुझ्या घरा
घे निरोप आमुचा, पुढील साल ये त्वरा. || धृ. ||
☆
आसमंत भारला, निनादल्या दहा दिशा.
रूपरंग आगळे, पुकारती गणाधिशा
आरतीत व्यापला, पदापदात गोडवा
घे निरोप आज तू, उरेल भास रे खरा .|| १ ||
☆
जाणतोस तू मना, अजाणता करी चुका
भाव जाण आतला,नको कश्यात न्यूनता
भव्य दिव्य सोहळा, तुझ्या सवेच साजिरा
श्वास श्वास बोलका, विसावला मनी जरा. || २ ||
☆
पाहुणा घरातला,घराकडेच चालला
गाव सोडले जरी, भरून राहिली मने
बंधुभाव प्रेरणा, स्विकारती निमंत्रणे
लोकमान्य ठेव ही, सुखात ठेव लेकरा. || ३ ||
☆
आठवात मोरया, कणाकणात जागृती
तेजहीन भासतो,फळे फुले प्रसाद ही
नृत्य नाट्य गायनी, चराचरात व्यापला
ओढ लावली मना, सुखावली वसुंधरा. || ४ ||
☆
© कविराज विजय यशवंत सातपुते
सहकारनगर नंबर दोन, दशभुजा गणपती रोड, पुणे. 411 009.
मोबाईल 8530234892/ 9371319798.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
