मराठी साहित्य – कवितेचा उत्सव ☆ “सार्थक —” ☆ सुश्री मंजुषा सुनीत मुळे ☆

सुश्री मंजुषा सुनीत मुळे

 कवितेचा उत्सव 

☆ “सार्थक —” ☆  सुश्री मंजुषा सुनीत मुळे  ☆

माझे माझे म्हणत म्हणत मी

सर्वच ‘ माझे ‘ लुटून द्यावे

आनंदाचे इवले रोपही

रुजवू शकता तृप्त मी व्हावे …..

भुकेजलेल्या तहानलेल्या

जीवांस त्या नित शांत करावे

श्रांत क्लांत मम बांधवांस मी

ममतेचे गुळपाणी द्यावे …..

ईशकृपे मज मिळेल जे सुख

इतरांसंगे ते वाटावे

सांगातीच्या वाटसरूंना

मदतीचे मम हात मी द्यावे …..

अंतरीचे मम धन प्रेमाचे

लुटेन तितके साठत रहावे

निर्व्याजची ते लुटता लुटता

नकळत हे जीवन संपावे ……

©  सुश्री मंजुषा सुनीत मुळे

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈