सुश्री वर्षा बालगोपाल
कवितेचा उत्सव
☆ अखंड काव्य… ☆ सुश्री वर्षा बालगोपाल ☆
☆
पहाट समयी, जोडूनी हात, प्रभूला वंदन कर
कर पसरूनी ,शुद्ध चित्ते ,मागसी त्याला एक वर
वर म्हणावे, माझ्यावरती हो, कृपाहस्त तुम्ही धरा
धरापुत्रीसम ,नको येऊ दे ,संकटे जीवनी जरा॥
☆
जरा देऊनी, दीर्घायू ही ,केलेस मजला, तूच जर
जर निरोगीपणाची ,तयासंगती दे, सांगते खरं
खरं संकटांची ,रे नसावी ,आयुष्य वाटेवरी ,परी
परी येऊनी ,कांडी फिरवूनी, वर्षाव्या सुखाच्या सरी॥
☆
सरी लेऊन सदाचारी ,प्रेमाचे बीज रुजावे उरी
उरी सलोखा ,माणूसकी जगी,काम,क्रोध , मोह हरी
हरी येणार रे मग जीवनी मनी तुझ्या राम बाण
रामबाण हा सुनितीचा, तारेल तुजला, हेच जाण॥
☆
© सुश्री वर्षा बालगोपाल
मो 9923400506
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
