सौ. प्रतिभा संतोष पोरे
कवितेचा उत्सव
☆ मराठी माझी ☆ सौ. प्रतिभा संतोष पोरे ☆
✒️
वर्णमालेची लाभे श्रीमंती
अक्षर अक्षरांची महती
उच्चाराची गोड प्रचिती
समृद्ध असे मराठी माझी।१।
✒️
संस्कृत भाषेचीच लिपी
वृत्त, अलंकार शोभती
वाक्प्रचार, म्हणी व्याप्ती
देई ज्ञान मराठी माझी।२।
✒️
नवरसांची सजे पेरणी
काव्यसुमनांची पुरवणी
अभंग ,भारूडात देखणी
गोड गाण्यात मराठी माझी।३।
✒️
महाराष्ट्राची प्रिय मायबोली
मनामनांसी लिलया जोडी
अभ्यासे गवसेना हिची खोली
शिलालेखावरी मराठी माझी।४।
✒️
ज्ञानदेव, तुकारामांची लेखणी
एकनाथ , नामदेवांच्या गायनी
जात्यावर ओव्या गाई जनी
संतांची अभिव्यक्ती मराठी माझी।५।
✒️
मराठी परंपरेचा राखू मान
मातृभाषेचा करूया सन्मान
बोलून, लिहून वाढवू शान
अंतरात साठवू मराठी माझी।६।
शब्दसखी प्रतिभा
✒️
© सौ. प्रतिभा पोरे
पत्ता – ‘सोनतुकाई’, शांतीसागर कॉलनी, सांगली – भ्रमणध्वनी क्रमांक – ८७८८४५८६२४
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
