सुश्री प्रज्ञा मिरासदार
कवितेचा उत्सव
☆ 🚩 संत एकनाथ. 🚩 ☆ सुश्री प्रज्ञा मिरासदार ☆
☆
वंदन त्या थोर संता महाराज एकनाथा |
बोध द्याया लिहिली हो त्यांनी भागवत कथा ||१||
*
ज्ञानदेवे भागवत मंदिरासी रचियेले |
तुकाराम ते कळस एकनाथ खांब झाले ||२||
*
दो शतके ज्ञानेश्वरी लोक होते विसरले |
सिद्ध करूनी ती पोथी नवे रूप तिला दिले ||३||
*
भागवत कथेतून केले जनप्रबोधन |
होता निद्रिस्त समाज सुस्तावले होते जन ||४||
*
काशीयात्रे जाता जाता गर्दभासी जळ दिले |
काशीयात्रेहून पुण्य त्यासी तेथेचि लाभले ||५||
*
अस्पृश्याच्या सवे घरी जेवियले एकनाथ |
सहजचि केली त्यांनी भेदाभेदावर मात ||६||
*
लोकांसाठी भारूडे नि लिही गौळणी अभंग |
श्रीखंड्याच्या रूपे तिथे पाणी भरी पांडुरंग ||७||
*
दुष्ट यवन तो कोणी थुंके त्यांच्या अंगावरी |
शांत राहून सर्वदा स्नान गोदेचे ते करी ||८||
*
देह समाधिस्थ केला गोदावरीच्या पात्रात |
अजूनही त्यांची कीर्ती जनमनाच्या गात्रात ||९||
*
अशा थोर संताची या किती वर्णावी महती |
गेली शतके शतके सारे त्यांनाच स्मरती ||१०||
☆
© सुश्री प्रज्ञा मिरासदार
पुणे
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
