कविराज विजय यशवंत सातपुते
कवितेचा उत्सव # 217 – विजय साहित्य
☆ मधुमास… ☆ कविराज विजय यशवंत सातपुते ☆
☆
ग्रीष्म ऋतूने, होई काहिली
चराचराने, उरी साहिली.
चैत्र पालवी, देई चाहूल
ऋतू राजाचे, वाजे पाऊल.
*
आला मोहर,आम्र तरूंला
रान फळांचा, घोस सानुला
कडे कपारी जांभूळ झाडे
करवंदाने, सजले पाडे.
*
हिरव्या चिंचा,चिमणी बोरे
शोधून खाती,उनाड पोरे.
फुले बहावा,पळस कधी
गुलमोहरी, चळत मधी.
*
फुलली झाडे, झुकल्या वेली
गुलाब जाई, फुले चमेली
लक्ष वेधुनी ,घेई मोगरा
सुवर्ण चाफा,द्वाड नाचरा.
*
कोळीळ कंठी, सुरेल साद
वसंत आला, करी निनाद.
मंजूळ गाणी,मंजूळ पावा
कुठे दडूनी, बसला रावा.
*
गुढी पाडवा,आनंद यात्रा
कडूलिंबाची,हवीच मात्रा
पुरण पोळी, आगळा थाट
श्रीखंड पुरी, भरले ताट.
*
मशागतीची कामे सरली
तणे काढता,चिंता हरली.
उरूस जत्रा, गाव देवीची
निघे पालखी, आस भेटीची.
*
चैत्र गौरीची,गोकुळ छाया
वसंत कान्हा,उधळी माया
हळदी कुंकू,सजती नारी
मधुमासाची,करती वारी…!
☆
© कविराज विजय यशवंत सातपुते
सहकारनगर नंबर दोन, दशभुजा गणपती रोड, पुणे. 411 009.
मोबाईल 8530234892/ 9371319798.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
