सुश्री अरूणा मुल्हेरकर
कवितेचा उत्सव
☆ ‘सोंगटी…’ ☆ सुश्री अरूणा मुल्हेरकर ☆
(गालगागा गालगागा गालगागा गा)
☆
सोंगटी मी या पटावर खेळते आहे
खेळताना नेहमी मी हासते आहे
*
हार किंवा जीत या खेळात ठरलेली
रात्र सरुनी सूर्य येईल थांबते आहे
*
का करू मी काळजी सार्‍या जनाची या
कोण कसले भोवताली जाणते आहे
*
ज्या प्रमाणे कर्म ज्याचे फळ तसे मिळते
पात्र मीही ज्या फळाला चाखते आहे
*
चूक झाली एकदा जी ना पुन्हा व्हावी
याचसाठी मी सदा सांभाळते आहे
*
खेळताना वाटला प्रारंभ सुंदरसा
वाकडी मज वाट मधली वाटते आहे
*
हात तू माझा कधी धरशील का देवा
भिस्त सारी मी तुझ्यावर सोडते आहे
☆
© सुश्री अरूणा मुल्हेरकर
डेट्राॅईट (मिशिगन) यू.एस्.ए.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
