श्री अशोक श्रीपाद भांबुरे
अशोक भांबुरे जी यांची कविता अभिव्यक्ती # 248
☆ रेड अलर्ट ☆ श्री अशोक श्रीपाद भांबुरे ☆
☆
रेड अलर्ट ऐकून पाऊस पडला होता गार
ढगोबानं बंद करून घेतलं आपलं दार
*
नदी नाले बंद करून केल्यात वाटा बंद
काल माझ्यासाठी होते सारे मार्ग रुंद
अडथळ्याची शर्यत येथे मीही करतो पार
*
गुप गुमान गेलो असतो गटारीच्या खालून
गटारही साफ केली नाही तुम्ही खोलून
कुरण भ्रष्टाचाराचं माजलंय येथे फार
*
सिमेंटमुळं घेत नाही धरती मला कुशीत
बागडू शकत नाही आता मीही येथे खुशीत
स्वप्ने स्वार्थी तुमची सारी होऊ देत साकार
*
इतके कसे झाला तुम्ही सांगा रे बेबंद
घरात तुमच्या घुसण्यामध्ये नाही रे आनंद
चुका तुमच्याकडून कशा होतात वारंवार
*
माझ्यामुळे शेतामध्ये येते आबादानी
खूश होऊन शेतकरी गातो छान गाणी
मी तुमच्या सोबत असतो केवळ महिने चार
☆
© श्री अशोक श्रीपाद भांबुरे
धनकवडी, पुणे ४११ ०४३.
मो. ८१८००४२५०६, ९८२२८८२०२८
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
