श्री सुनील देशपांडे
कवितेचा उत्सव
☆ “सैरावैरा…” ☆ श्री सुनील देशपांडे ☆
☆
धुंवाधार की संततधार
पाऊस पडतो धारेधार
*
पावसानं धरलं धारेवर
जीवन सारं वाऱ्यावर
*
लहानपणीच्या धारा
आता नाही झरा झरा
*
आता येती कोसळधारा
बुडवुन टाकत घराघरा
*
किंवा गायब होती धारा
आणिक येती स्वेद धारा
*
असा कसा गायब होतोस
पड ना जरा पड ना जरा
*
आर्जवं केली प्रचंड त्याची
मग आल्याकी प्रचंड धारा
*
ओला दुष्काळ सुका दुष्काळ
सुकाळ नाही पण काळधारा
*
राजानं मारलं त्यानं झोडलं
तर जायचं कुठं सहन करा
*
राजा गेला सरकार आलं
झोडणं सारं सहन करा
*
मारणं चालूच झोडणं चालूच
आपली धावपळ सैरावैरा
आपली धावपळ सैरावैरा
☆
© श्री सुनील देशपांडे
मो – 9657709640
email : [email protected]
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
