श्री आशिष मुळे
कवितेचा उत्सव
☆ “माझी कविता…” ☆ श्री आशिष मुळे ☆
☆
माझी कविता म्हणजे
मला जड झालेली मुलगी नाही
आयुष्यभर हृदयाशी सांभाळाया
मला तर काहीच हरकत नाही
*
हवीहवीशी नसेल जरी ती इतरांसी
तिच्याविन मला दुसरी सोबत नाही
बाजारात जरी जागा नसली
हृदयीच्या देव्हाऱ्यात जागेची कमी नाही
*
पुसती मला प्रसिद्धी किती
मागती हुंडा याची जाण नाही
जरी बाप गरीब मी कवितेचा
तिच्या आईची ह्यांना कल्पना नाही
*
ठीक आहे होणार नाही बेस्ट सेलर
तरी ती माझी आहे दुसऱ्याची नाही
माझ्यासाठी ती माझी मोक्ष-लक्ष्मी
प्रकाशकांच्या ती नशिबी नाही
☆
© श्री आशिष मुळे
≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
