श्री नितीन सुभाष चंदनशिवे
कवितेचा उत्सव
☆ “कविता बहिणीची —” ☆ श्री नितीन सुभाष चंदनशिवे ☆
☆
या चिमण्या कुणाच्या
या बहिणी वाघाच्या
त्यांचा हात सोन्याचा
माझ्या बहिणी गुणाच्या
*
कावळ्याची काव काव
काल थांबलीच नाही
माहेराहून गाडी
अजून आली कशी नाही
*
आला आला गं मुराळी
बंधू न्यायला सकाळी
भाऊ मारीतो गं हाळी
कुंकू लावते कपाळी
*
माहेराची माझी वाट
गाडी चढतिया घाट
भाव माझा समिंदर
मी काळजाची लाट
*
आली पूनिव राखीची
माझी राखी चांदीची
ताट भावाला ओवाळी
त्याच्या डोळ्यात दिवाळी
*
तोंडी साखर गोडीची
मिशी वाकड्या मोडीची
माझ्या भावाच्या घामाची
आली ओवाळणी साडीची
*
चिमण्या चालल्या नांदायला
त्यांचा संसार बांधायला
लेकुरवाळी बहिणीची
कविता संपली भावाची
कवी : नितीन चंदनशिवे. (दंगलकार)
© श्री नितीन सुभाष चंदनशिवे
संपर्क – मु. पोस्ट. कवठेमहांकाळ, जि. सांगली.
मो 7020909521
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
