सुश्री त्रिशला शहा
कवितेचा उत्सव
☆ विडंबन गीत – मळ्यातली भाजी… ☆ सुश्री त्रिशला शहा ☆
(चाल–एका तळ्यात होती बदके पिले सुरेख )
☆
एका मळ्यात होती भाजी सुरेख ताजी,
मन मोहवून गेले पाहूनी रान सारे…
*
झाडावर वांगी डुलती, कोवळी सुरेख ताजी,
भेंडी, गवार, मिरची वाऱ्यासवे हलती
चुटूक लाल गाजर
भूमीत लपती मुळे
मन मोहवून गेले, पाहूनी रान सारे…
*
द्राक्षाचे हलती घोस, आंब्याचा फुले मोहर
केळीची फुलली बाग, ऊसाचा वाढे फड
पाण्याचे पाट वाही भिजवून शेत गेले
मन मोहवून गेले पाहुनी रान सारे…
*
खुडली सुरेख मेथी, चवदार काकडी ती
ज्वारीची केली भाकर, वांग्याची भरली भाजी
ठेच्यासवे दही विरजले, जेवावयास यावे
मन मोहवून गेले, पाहुनी रान सारे…
*
भरभरुनी दान मिळते, निसर्गाची हीच किमया
घेऊ किती कळेना, भूमीतला खजिना
ही जाण ठेवा सारे, रक्षण करु निसर्गाचे
मन मोहवून गेले, पाहुनी रान सारे…
☆
© सुश्री त्रिशला शहा
मिरज
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
