सुश्री नीलांबरी शिर्के
कवितेचा उत्सव
☆ फक्त उदाहरण म्हणून… ☆ सुश्री नीलांबरी शिर्के ☆
☆
कृष्णाष्टमीला कृष्णजन्म
रामनवमीला जन्म रामाचा
दिवस उरला आहे केवळ
उत्सव साजरा करण्यापरता
*
कुणी न करतो रामाचरण
कुणी न द्रौपदीचा कृष्ण
महाभारत नित्यच घडते
आमच्या भवती हे कारण
*
देवाचे अवतार जाहले
मानव जिवा उद्धरण्या
पुजनासवे वसा असावा
थोडे अनुकरण करण्या
*
देव देवळातच राहतील
महाभारतच घडत जाईल
लाज राखणारा कृष्णसखा
उदाहरणी केवळ राहील
☆
© सुश्री नीलांबरी शिर्के
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
