सौ.ज्योत्स्ना तानवडे
कवितेचा उत्सव
☆ आनंदाचे शिंपण … ☆ सौ.ज्योत्स्ना तानवडे ☆
(उत्तेजनार्थ पारितोषिक प्राप्त कविता)
☆
माझे जीवनगाणे गमते
तृप्त मनाचे गायन मजला
मागे वळुनी पाहता दिसे
मळा समाधानाचा फुलला ||
*
संसार करावा निगुतीने
नाती जपावी आत्मियतेने
कर्म चांगले सत्शील वृत्ती
समाजसेवा ध्यास मनाने ||
*
वृथा कुणाला ना हिणवावे
उगा कुणाला ना दुखवावे
प्रेमभराने जीव लावुनी
स्नेहबंधही घट्ट करावे ||
*
अहंकार कर्मास नासवी
अभिमान स्नेहास संपवी
तरतम भावा जाणुनिया
विवेकपूर्णा कृती असावी ||
*
आला क्षण आपुल्याच हाती
मनमुक्त जगावे आनंदाने
आनंद वाटावा सकलांना
हसतमुखाने शुद्ध मनाने ||
*
मायबाप हृदयी पूजिता
त्यांची शिकवण आचरते
असेच माझे जीवनगाणे
आनंदाचे शिंपण करते ||
☆
© सौ.ज्योत्स्ना तानवडे
वारजे, पुणे.५८
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
