श्री अशोक श्रीपाद भांबुरे
अशोक भांबुरे जी यांची कविता अभिव्यक्ती # 281
☆ फुलले कमळ… ☆ श्री अशोक श्रीपाद भांबुरे ☆
☆
वाकड्या वाटेवरी तो चालला इतका सरळ
राजकारण खेळले जे पाढरे झाले उखळ
*
झाकता उखळास येणे ही कला जमली तया
लक्षवेधी मांडली मग त्यास तर दिसता कुसळ
*
काल दलदल फार होती गाळ होता साचला
एवढ्या चिखलातुनीही छानसे फुलले कमळ
*
केतकीवर प्रेम त्याचे रान त्याने पोसले
भोवताली नाग होते ओकला नाही गरळ
*
हिरवळीवर झोपणारा तो फुलावर भाळला
बाभळीच्या दूर गेला रान केले ना जवळ
*
चोर इतका पुष्ट होता जीव घेउन धावला
लागला मागे शिपाई भावना नव्हती चपळ
*
साठवावे नीर थोडे त्यास नाही वाटले
कोरडे दिसले मला जे पात्र ते होते उथळ
☆
© श्री अशोक श्रीपाद भांबुरे
धनकवडी, पुणे ४११ ०४३.
मो. ८१८००४२५०६, ९८२२८८२०२८
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
