Category: कवितेचा उत्सव 2

☆ वसंता… ☆ म. ना. दे. (श्री मयुरेश देशपांडे) ☆

☆

आला का वसंता, धिम्या पावलाने

मागे पानझड, ऋतू पालटाने

*

आलीच कोकीळ, घेऊनी सांगावा

सुटला सुगंध, करण्या कांगावा

*

तुझ्या आगमने, कात टाकतील

धरुनी अंकुरे, सारे सजतील

*

आता स्फूरतील, गाणी प्रेमाचीच

साज चढायाला, साथ सुरांचीच

*

बरं का वसंता, तुझ्या पंचमीला

माय सरस्वती, ठेवितो पूजेला

☆

कवी : म. ना. देशपांडे

(होरापंडीत मयुरेश देशपांडे)

+९१ ८९७५३ १२०५९ 

https://www.facebook.com/majhyaoli/ 

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री हरिश्चंद्र कोठावदे

 कवितेचा उत्सव 

☆ खुशाल टाळा… ☆ श्री हरिश्चंद्र कोठावदे ☆

☆

खुशाल टाळा टाळणार पण मजला कुठवर

चुकवा रस्ते, द्या गुंगारा

असेन मी तर हर वळणावर

*

नगरीमधुनी खुशाल तुमच्या करा बहिष्कृत

वेसपारच्या वाड्यावस्त्या

उत्सुक माझे करण्या स्वागत

*

लपवाछपवी फसवाफसवी सोपी नाही

क्ष-किरणांच्या नजरेमधुनी

दगा आतला सुटणे नाही

*

गृहीत धरणे सदाकदा मज धोकादायक

प्रशांत सागर परी तळाशी

वडवानल मी खात्रीलायक

*

कृतघ्नतेने तुमच्या भरला गळवट रांजण

आज क्षमेचे शांत चांदणे

उद्या कदाचित अग्निप्रभंजन

*

सोन्याची ही तुमची लंका तुमचे भूषण

अभिमानी ही माझी फकिरी

माझ्यासाठी माझे त्रिभुवन!

☆

© श्री हरिश्चंद्र कोठावदे

२५. ११. २०२४

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्रीशैल चौगुले

 कवितेचा उत्सव 

☆ प्याला… ☆ श्रीशैल चौगुले ☆

☆

प्याला भरुन दे साकी

आज होईन मी तृप्त

काल घडून जे गेले

स्मृती पेईन अतृप्त.

*

धुंद कैफात हे मन

हृदया भय का, पिण्या

नव्या नशेची हि वेळ

तारुन नेता कारुण्या.

*

मैफल रंगात आली

तोल सावरित हाला

आणखी भरता साकी

अजाण भविष्य प्याला.

 ☆

© श्रीशैल चौगुले

सौ शालिनी जोशी

  चित्रकाव्य  

चहाबोध...  सौ शालिनी जोशी ☆

☆

प्रभाते मनी चहा चिंतीत जावा l

पुढे मुखे तोचि प्राशन करावा l

चहापान हे थोर सांडू नये रे l

करी तोचि तो सदा धन्य हो रे ll १ ।। 

*

जो आलंयुक्त चहापंथेची जाये l

तो तरतरीत तत्काळ होये l

म्हणोनि चहाचा आळस नको रे l

अतीआदरे सेवना योग्य तो रे Il २ ll

*

सदा सर्वदा प्रिती चहाची धरावी l

सर्व निराशा चहाकपी बुडवावी l

परी अतीचहा सर्व दु:ख करी रे l

विवेके मंत्र हा विसरू नये रे ll3ll

☆

©  सौ. शालिनी जोशी

संपर्क – फ्लेट न .3 .राधाप्रिया  टेरेसेस, समर्थपथ, प्रतिज्ञा मंगल कार्यालयाजवळ, कर्वेनगर, पुणे, 411052.

मोबाईल नं.—9850909383

≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ.मंजुषा मुळे/सौ.गौरी गाडेकर≈

सुश्री प्रभा सोनवणे

कवितेच्या प्रदेशात # 260 

☆ कोण… ☆ सुश्री प्रभा सोनवणे ☆

☆

कुसुम, कोमल,

कामिनी कुंजवनीची,

कौतुक करावे किती,

कलिका कुजबुजती!

कादंबिनी,

कोकिळ कूजती !

काननी केवडा,

केतकी, कुंद कोमेजती!

 कल्पना कृतीत,

कविता, कादंबरी!

कुठली कस्तुरी ??

कार्तिकातली कुमुदिनी!!

☆

© प्रभा सोनवणे

संपर्क – “सोनवणे हाऊस”, ३४८ सोमवार

पेठ, पंधरा ऑगस्ट चौक, विश्वेश्वर बँकेसमोर, पुणे 411011

मोबाईल-९२७०७२९५०३,  email- [email protected]

≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ. वृंदा गंभीर

कवितेचा उत्सव

☆ शिवजयंती विशेष – जनतेचा कैवारी… ☆ सौ. वृंदा गंभीर ☆

☆

जिजाऊ पोटी हिरा जन्मला

नाव ठेवले शिवाजी

वदंन माझे शिवरायाला

मारली स्वराज्याची बाजी

*

स्वप्न पाहिले स्वराज्याचे

मर्द मावळे जमविले

शंख फुकले लढाईचे

एक एक करून किल्ले मिळविले

*

प्रताप, राज, तोरणा, पुरंदर

जोडीला होते नाईक

जाधव, मोहिते, निंबाळकर

झाले जनतेचे पाईक

*

सह्याद्रीचा सिंह काडडला

घोड्यावर स्वार होऊनी

ताकदीने वैऱ्यांशी भिडाला

भगवा फडकवला राजांनी

*

रायगडावर तोरण बांधले

शिव छत्रपती राजा झाले

जनतेचा कैवारी म्हणू लागले

शिवबा शिवतारी ठरले

*

माँ साहेबांचे स्वप्न पूर्ण केले

सह्याद्रीला कवेत घेतले

स्वामी रामदासांचे आशीर्वाद

रायगडावर स्थिर झाले

☆

© सौ. वृंदा पंकज गंभीर (दत्तकन्या)

न-हे, पुणे. – मो न. 8799843148

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री तुकाराम दादा पाटील

 कवितेचा उत्सव 

☆ जागा सुखदायी… ☆ प्रा तुकाराम दादा पाटील ☆

☆

उजळायाच्या कधी सावल्या

भवती अंधाराच्या

तुडवत आलो खूप लांबवर

वाटा दैवगतीच्या

अजून नाही भाग्य लाभले

झाल्या तिन्हीसांजा

मीच लागलो मागे आता

दुर्धर दुर्भाग्याच्या

तोल सावरत आलो धावत

काळा संगे जेंव्हा

तेंव्हा सा-या संपत गेल्या

भेटी दिलदारांच्या

चित्तथरारक असते खेळी

आपल्या आयुष्याची

सांभाळावे तिला लागते

वाटेवर जगण्याच्या

चालतजाव्या निवांत सा-या

चाली संसाराच्या

नको कधी ही बिघडायाला

नादाने भलत्यांच्या

जमेल जेव्हा असे वागणे

साधे भोळे तेव्हा

दिसतील जगा समोर तुमच्या

सुखदायी जगण्याच्या

किती लागलो होतो मागे

क्षणिक आनंदाच्या

या देहाच्या होत्या खेळी

केवळ हव्यासाच्या

जेव्हा कळले तेंव्हा पडली

आत्म्यालाही भ्रांती

पुन्हा जाहलो स्वाधीन तेव्हा

अखेर वास्तवतेच्या

☆

© प्रा. तुकाराम दादा पाटील

मुळचा पत्ता  –  मु.पो. भोसे  ता.मिरज  जि.सांगली

सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३

दुरध्वनी – ९०७५६३४८२४, ९८२२०१८५२६

≈ संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈