Category: कवितेचा उत्सव 2

कविराज विजय यशवंत सातपुते

कवितेचा उत्सव # 243 – विजय साहित्य

☆ सुखी संसाराची छाया ☆

(अष्टाक्षरी रचना)

☆

परंपरा संस्कृतीत,

नारीशक्ती आहे वसा.

कर्तृत्वाची पराकाष्ठा,

संयमाचा दैवी ठसा…! १

*

गाते भुपाळी अंगाई,

नारी दळते दळण.

घर स्वच्छता पहाटे,

जमा करी सरपण…!२

*

लागे जीवनाचा कस,

होई सासुरासी जाच.

कसे जगावे जीवन,

सांगे आठवांना वाच…!३

*

पिढ्या पिढ्या राबतसे,

घर संसारात नारी.

पती मानुनी ईश्वर,

घेई कर्तृत्व भरारी…!४

*

कष्ट,त्याग, समर्पण

नाते संबंधांचा सेतू.

नारीशक्ती कर्मफल,

घरे जोडण्याचा हेतू…!५

*

माती आणि आभाळाशी,

नारी राखते इमान.

संगोपन छत्रछाया,

नारीशक्ती अभिमान…!६

*

नारी कालची आजची,

जपे स्वाभिमानी कणा.

कष्ट साध्य जीवनाची,

नारी चैतन्य चेतना…! ७

*

बदलले जरी रूप,

नाही  बदलली नारी.

अधिकार कर्तव्याची,

करे विश्वासाने वारी…!८

*

नारी आजची साक्षर,

करी कुटुंब‌ विचार.

सुख ,शांती, समाधान,

करी ऐश्वर्य साकार…!९

*

नर आणि नारी यांचा,

नारीशक्ती आहे बंध.

जाणिवांचा नेणिवांशी,

दरवळे भावगंध…!१०

*

देई कुटुंबास स्थैर्य,

नारीशक्ती प्रतिबिंब.

रवि तेज जागृतीचे,

जणू एक रविबिंब..! ११

*

नारी संसार सारथी,

नारी निजधामी पाया.

तिची कार्यशक्ती आहे,

सुखी संसाराची छाया…!१२

☆

(महिला दिनानिमित्ताने‌ केलेली रचना)

© कविराज विजय यशवंत सातपुते

सहकारनगर नंबर दोन, दशभुजा गणपती रोड, पुणे.  411 009.

श्री सुजित कदम

 

 कवितेचा उत्सव 

☆ संत गजानन महाराज..! ☆

☆ 

भारतीय हिंदू गुरू,

शेगावीचे गजानन.

बुलढाणा जिल्ह्यातील

असे जागृत सदन.

*

वर्ण तेजस्वी तांबूस,

सहा फूट उंच योगी.

तुरळक दाढी केस,

दिगंबर संत जोगी.

*

दिगंबर अवस्थेत ,

केले व्यतीत जीवन.

जीव शिव मिलनात,

समर्पित तन मन.

*

सर्व सामान्यांचे खाणे,

हाच त्यांचाही आहार.

नाही पक्वानाचा शौक,

अन्न जीवनाचे सार .

*

कधी हिरव्या मिरच्या,

कधी झुणका भाकर .

अंबाडीची भाजी कधी,

कधी पिठाची साखर.

*

अंगणात ओसरीत,

भक्तालागी सहवास .

कधी भाकर तुकडा,

कधी कोरडा प्रवास.

*

जन जीवन सामान्य,

चहा चिलीम आवड.

भक्तोद्धारासाठी घेई,

जन सेवेची कावड.

*

सोडा गर्व अहंकार,

नको खोट्याचा आधार.

विघातक कर्मकांडी,

केला कठोर प्रहार.

*

शिस्त स्वच्छता शांतता ,

सेवाभावी सेवेकरी .

विधीवत पुजार्चना,

चिंता क्लेश दूर करी.

*

कथा सार उपासना,

गणी गण गणातला.

परब्रम्ह आले घरा ,

मंत्रजप मनातला.

*

गूढवादी संत थोर,

जणू अवलिया बाबा.

कधी गणपत बुवा,

घेती भाविकांचा ताबा.

*

हातामध्ये पिळूनीया,

रस उसाचा काढला.

कोरड्याश्या विहिरीत,

साठा पाण्याचा आणला.

*

कुष्ठरोगी केला बरा,

भक्ता दिले जीवदान.

गजानन योगियाचे ,

लिलामृत महिमान.

*

शिवजयंतीची सभा,

लोकमान्य गाठभेट.

गजानन भाकीताची,

मिळे अनुभूती थेट.

*

कोण कोठीचा कळेना ,

सांगे ब्रम्हाचा ठिकाणा .

परब्रम्ह मूर्त योगी,

असे शेगावीचा राणा.

*

शुद्ध ब्रम्ह हे निर्गुण ,

जग त्यातून निर्माण .

ब्रम्ह रस माधुर्याचा ,

योगीराज हा प्रमाण.

*

कर्म,भक्ती, ज्ञानयोग ,

योगशास्त्र जाणकार.

लक्षावधी अनुयायी,

घेती नित्य साक्षात्कार.

*

श्रेष्ठतेचा संतत्वाचा,

मठ संस्थानाचा खास.

समाधीस्त गजानन,

भक्ता लाभे सहवास.

*

कुशावर्ती नित्य भेट ,

केली पंढरीची वारी.

ब्रम्ह गिरी प्रदक्षिणा,

असे चैतन्य भरारी.

*

पंढरीच्या वारीमध्ये,

संत पालखी मानाची.

गावोगावी प्रासादिक,

कृपा छाया देवत्वाची.

*

लिला चरीत्र कथन ,

गजानन विजयात.

दासगणू शब्दांकीत,

ग्रंथ पारायण ख्यात.

*

आधुनिक संत श्रेष्ठ,

घ्यावी त्याची अनुभूती.

शेगावीचा योगीराणा,

संतवारी श्रृती स्मृती.

–गण गण गणात बोते–

☆

© श्री सुजित कदम

मो.7276282626

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री प्रभा सोनवणे

कवितेच्या प्रदेशात # 262

☆ सहचर… ☆ सुश्री प्रभा सोनवणे ☆

☆

मी केली नाही कधीच….

खास तुझ्यासाठी कविता !

अधून मधून,

डोकवायचे तुझे संदर्भ….

कधी चांगुलपणाचे,

कधी कडवटपणाचे!

 खरंतर किती साधं असतं आयुष्य,

आपणच बनवतो अवघड!

नाहीच भरता आले रंग,

एकत्र,

आयुष्याच्या रांगोळीत!

समांतर रेषांसारखे,

जगत राहिलो,

आता सांजसावल्या,

झेलत असताना,

तू जास्त थकलेला दिसतोस,

भर उन्हातही….

ताठ कण्याने उभा होतास,

मावळतीची उन्हंही,

तशीच झेलत रहा….

सहचरा…..

नाहीच देता आलं काही,

जन्मभर!

स्वर्गात बांधलेल्या गाठी मात्र

 निभावल्या गेल्या आपसूकच,

स्वर्गस्थ ईश्वरानंच करावा न्याय,

देता आलंच काही,

तर सहचरा—

देईन तुला उरल्या आयुष्याचं दान!

दयाघना तू आहेसच ना,

इतका महान!

☆

© प्रभा सोनवणे

संपर्क – “सोनवणे हाऊस”, ३४८ सोमवार

पेठ, पंधरा ऑगस्ट चौक, विश्वेश्वर बँकेसमोर, पुणे 411011

मोबाईल-९२७०७२९५०३,  email- [email protected]

≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री अशोक श्रीपाद भांबुरे

अशोक भांबुरे जी यांची कविता अभिव्यक्ती # 274

☆ यमराजाशी लढले… ☆ श्री अशोक श्रीपाद भांबुरे ☆

☆

प्रेमात तुझ्या पडले मी

*

होतास गुरू तू माझा

प्रेमात तुझ्या घडले मी

*

ओढले मला तू वरती

अन डोंगरही चढले मी

*

पहाड होता तो माझा

पाठीमागे दडले मी

*

सावित्रीच्या बाण्याने

यमराजाशी लढले मी

*

होता सोबत तू माझ्या

नाहीच कधी अडले मी

*

नाग समोरी दिसला अन

त्यालाच इथे नडले मी

☆

© श्री अशोक श्रीपाद भांबुरे