Category: कवितेचा उत्सव 2

☆ गांधी काही भेटलेच नाहीत… ☆ म. ना. दे. (श्री मयुरेश देशपांडे) ☆

☆

मास्तरांनी सांगितले

जीवनामध्ये गांधी आणा

अहिंसा परमो धर्म

असे सातत्याने म्हणा

*

आजही जगामध्ये

आहेत म्हणे गांधीभक्त

ज्यांनी म्हणे सांडले नाही

कधी कोणाचेच रक्त

*

हाच घेऊन संदेश

चालू लागलो जीवनात

गांधी होते मनामध्ये

अन् प्रत्येक संघर्षात

*

एका गाली मार बसता

पुढे केला दुसरा गाल

हसत हसत समोरच्याने

केली माझीच लाल

*

सत्याग्रह अंगिकारला

अन्याय झाला जेव्हा

अजून वाट पाहतो आहे

न्याय मिळेल केव्हा

*

खिशातल्या गांधींसह

यश मिळविले काही

मास्तरांनी सांगितलेले

गांधी काही भेटलेच नाही

☆

कवी : म. ना. देशपांडे

(होरापंडीत मयुरेश देशपांडे)

+९१ ८९७५३ १२०५९ 

https://www.facebook.com/majhyaoli/ 

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री वर्षा बालगोपाल

  कवितेचा उत्सव 

☆ जोगवा… ☆ सुश्री वर्षा बालगोपाल ☆

☆

पदर पसरुनी मागते आई

जोगवा तू मजसी देई

भवानी कल्याणी रेणुका माई

जोगवा तू मजसी देई ।।

*

जीवन अवघे दुःखे भरले

माया मोह त्यास जडले

प्रयत्नानी जरी त्यागले

काम क्रोध मग जागे झाले

जाळ रीपू अन् कर पुण्याई

जोगवा तू मजसी देई

शिवानी जननी अंबाबाई

जोगवा तू मजसी देई ॥

*

क्षणोक्षणी या चिंता ग्रासती

तम व्यथेचे जग भासती

साहसाने सारे साहती

विपदा येती मागे पुढती

चिंता विपदा लयास नेई

जोगवा तू मजसी देई

स्वामिनी तारिणी वणीमाई

जोगवा तू मजसी देई ॥

☆

© सुश्री वर्षा बालगोपाल

मो 9923400506

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री सुनील देशपांडे

 कवितेचा उत्सव 

☆ “घटस्थापना” ☆ श्री सुनील देशपांडे ☆

☆

मस्तिष्काच्या घटात आपण मेंदू सिंहासन बनवूया

सद्सदविवेकबुद्धी देवी त्याच्या वरती बसवूया

*

मानवजाती नसे पांगळी धर्म जातीच्या कुबड्या फेकू

बंधुत्वाचा जागर घडवून अवयावदाते बनूया

*

पळे मोजती घटका आणिक तास वाजे ठणाणा

तर्क बुद्धीचा जागर घडवू अवयवदान करूया

*

अवयवदाने मृत्यू मरतो माणुसकीला जगवूया 

जिवा शिवाच्या अमरत्वाचा जागर आता घडवूया

*

मृत्यूनंतर या देहाचे कशास वाटे प्रेम कुणाला? 

देहदान संकल्पा योगे नव्या युगाला घडवूया.

☆

© श्री सुनील देशपांडे

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

डॉ. माधुरी जोशी

 कवितेचा उत्सव 

☆ घट भरला अमृताचा… ☆ डॉ. माधुरी जोशी ☆

☆

घट भरला अमृताचा 

घट सांडे आनंदाचा

नवरात्रीच्या दिवसांचा

 समृद्धीच्या नवीन खुणांचा !!

*

वर्षेचे काम झाले 

भूमी भिजून आतूर 

कोणते बीज अंकुरे

प्रकटतील नव अंकुर !!

*

घट गर्द दाट उगवून

सांगेल योग्य हे रोप

ऊब देत तेवत राहील 

गाभारी नंदादीप !!

*

किती सुंदर भासे पूजा 

सजला कलश देखणा

श्रीफल अन् आम्रपाने

मंगलतेच्या या खुणा!!

*

चांदण्या तगरीच्या वलयी 

 सुवर्ण गंध सुकुमार 

देवीची नऊ रुपे करिती

स्त्री शक्तीचा जागर!!

*

रात्रंदिन तेवत राही

नंदादीप तो स्नेहाचा

तो प्रकाश अन् ते तेज

ओनामा भविष्याचा !!

*

म्हणुनीच घटस्थापना

जणू निसर्ग प्रयोगशाळा 

आनंदी दिवाळी दसरा

हासेल सुखाने मळा !!

☆

© डॉ.माधुरी जोशी

 ≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री सुहास सोहोनी

 कवितेचा उत्सव 

☆ हरिनामाची शाळा – कवी -अज्ञात ☆ प्रस्तुती – श्री सुहास सोहोनी ☆

☆

हरिनामाची शाळा भरली पंढरपुरात

विट्ठल रखुमाई मास्तर होते शिकवायला शाळेत ||धृ||

*

शाळेमध्ये हो शिकण्या आले वारकरी संत

सावळ्या हरीचे नाम घेऊ्नी झाले भाग्यवंत

पुंडलिक तो मॉनिटर होता पंढरीच्या शाळेत || १ ||

*

पुंडलिकाची भक्ती पाहुनी खुश झाले मास्तर

युगे अठ्ठावीस उभे राहिले विठू विटेवर

अशी ही शाळा कुठेच नाही साऱ्या या विश्वात ॥२ ||

*

एकनाथ नामदेव तुकोबा चोखोबा भजनी होति दंग

विठ्ठल विठ्ठल पाढे पाठ करती सावता ही त्यांच्या संग

ज्ञानेश्वरांनी ज्ञानेश्वरी लिहिली अंखंड हरिपाठ ||३ ||

*

जनाई मुक्ताई सखु कान्होपात्रा भक्ती मध्ये रंगती

भक्ती पाहुनी साऱ्यांची विट्ठल त्यांना पास करती

फर्स्ट क्लास घेऊन तुकाराम ते गेले वैकुंठात ||४ ||

*

अभंग कीर्तन भारुड ओवी गाती हो शाळेत

पांडुरंगाचे नाम घेता सुटेल जीवनाचे गणित

एकदा तरी जाऊन पहा हो पंढरीच्या शाळेत ||५ ||

☘️

कवी – अज्ञात 

प्रस्तुती – श्री सुहास सोहोनी

रत्नागिरी

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर

श्री तुकाराम दादा पाटील

 कवितेचा उत्सव 

☆ हात माझे… ☆ प्रा तुकाराम दादा पाटील ☆

☆

भजनात ताल धरण्या रमतील हात माझे

देवास वंदण्याला जुळतील हात माझे

*

राबून पोट भरणे आहे खरी सचोटी

अभिमान राबण्याचा जपतील हात माझे

*

आधार द्यावयाचे आहेच काम मोठे

दुबळ्यास सावरूया म्हणतील हात माझे

*

प्रेमात रंगलेले मन दंग होते जगते

विरहात आसवांना पुसतील हात माझे

*

अन्याय पाहताना बसणार शांत नाही

निर्दाळण्यास त्याला सजतील हात माझे

*

मग्रूर श्वापदांनी उच्छाद मांडला की

बिनधास्त घेत पंगा भिडतील हात माझे

*

छळवाद मांडलेला मोडून काढताना

वज्रापरी कठूता धरतील हात माझे

*

दुःखात सावराया देतील साथ तेव्हा

आनंद वाटणारे ठरतील हात माझे

*

जपतो समाज जेव्हा प्रेमातला जिव्हाळा

घेवून हात हाती फिरतील हात माझे

☆

© प्रा. तुकाराम दादा पाटील

मुळचा पत्ता  –  मु.पो. भोसे  ता.मिरज  जि.सांगली

सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३

दुरध्वनी – ९०७५६३४८२४, ९८२२०१८५२६

≈ संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈

सौ. ज्योती कुळकर्णी 

 कवितेचा उत्सव 

☆ द्रौपदीची कहाणी चालूच… ☆ सौ. ज्योती कुळकर्णी ☆

(वृत्त : अनलज्वाला) 

☆

माता भगिनी स्वतः रक्षण्या सिद्ध व्हा तुम्ही

मनगट अमुचे तुम्हास रक्षण्या सक्षम नाही 

*

जागोजागी कौरवांच्याच सभा भारती

पणास तुजला अजूनही ते इथे लावती 

*

असतील जरी भीष्म द्रोण हे येथेच हजर

जाणार काय तुझ्या कडे तर तयांची नजर 

*

दुर्योधन अन दुःशासन जर लाख असतील

एकटाच कृष्ण हा कुठे कुठे सांगा पुरेल 

*

आया बहिणी नाहीत तुम्हा का बरे नरांनो

शिस्त लावण्या पडलो उणेच का आयांनो 

*

विचार हा पण करा बरे हो या अंगाने

लयास गेले संस्कारांचे अव्वल लेणे 

*

घडवू शकली वीर पुत्र ही माय जिजाऊ

आदर्श तिचा आज तुम्हीही शकाल घेऊ 

☆

© सौ. ज्योती कुळकर्णी

अकोला

मोबा. नं. ९८२२१०९६२४

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री आशिष  बिवलकर

  चित्रकाव्य  

– हो सिद्ध द्रौपदी…–  ☆ श्री आशिष  बिवलकर ☆

☆

हो सिद्ध द्रौपदी

तूच तूझ्या रक्षणासी |

कौरव तेव्हाही होते,

आजही आहेत लज्जा भक्षणासी |

*

तेव्हा तो एक होता कृष्ण,

तुझ्या चिंधीचे ऋण फेडायला |

आता कोणी येणार नाही,

तुला संकटातून बाहेर काढायला |

*

तेव्हा तुझ्याच लोकांनी,

पणाला तुला लावलं होतं |

आता पणाला न लावता,

तुझं सर्वस्व लुटलं जातं |

*

तेव्हा तुझे मोकळे केस,

आठवण देई झाल्या अपमानाची |

आता रोजच तुझी विटंबना,

नाही कोणास तमा तुझ्या सूडाची |

*

तेव्हा एक नव्हे पाच महारथी,

तुझा शब्दनशब्द झेलायला |

आता सगळेच झालेत षंढ,

कोणी ना येणार अश्रू पुसायला |

*

तेव्हा अग्नीतूनच प्रकट झालीस,

ओळख तुझी याज्ञसेनी |

आता रोजच तुझी चिता रचतात,

घटना म्हणून पडतेय पचनी |

*

षंढ झालंय शासन आता,

षंढ झालीय सारी व्यवस्था |

द्रौपदी गं तुझ्या भाळी,

लाचार हतबल केवळ अनास्था |

*

महापातकांचा नाश होतो,

पंचकन्येत तुझेच नाव स्मरतात |

जाण न राहिली तुझ्या माहात्म्याची,

आजच्या द्रौपदीला रोजच जाळतात |

☆

© श्री आशिष  बिवलकर

बदलापूर

मो 9518942105

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈