Category: कवितेचा उत्सव 2

श्री आनंदहरी

 कवितेचा उत्सव 

☆ पर्यावरण दिन – चल मित्रा, एक झाड लावू… ☆ श्री आनंदहरी ☆

कायद्याने जरी असला गुन्हा

शोधल्या पळवाटा पुन्हा पुन्हा

तोडत राहिलो झाड न् झाड

करत राहिलो सारेच उजाड

कळले नाही कधीच कुणा

आड आला मी, माझेपणा

निसर्गाचाही एक कायदा असतो

तो पाळायचा जन्मतःच केलेला वायदा असतो

‘ सारे काही विसरून जाऊ

उद्याचे काय ते उद्याच पाहू ‘

म्हणता म्हणता काळ सरला

श्वासासाठी प्राणवायू न उरला

तरीही अजुनी जाग नाही

जागेपणाचा काहीच माग नाही

झोपेचं जर घेशील सोंग

( जगणं होईल नुसतंच ढोंग )

भोगावे लागतील अनंत भोग

नको कविता लिहीत राहू

‘कोरडा भवताल’ फिरून पाहू

उठ, आतातरी बाहेर जाऊ

चल मित्रा, एक झाड लावू

..….चल मित्रा, एक झाड लावू !

© श्री आनंदहरी

इस्लामपूर, जि. सांगली

भ्रमणध्वनी:-  8275178099

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

सुश्री अरूणा मुल्हेरकर

 कवितेचा उत्सव 

☆ कृतार्थ मी… ☆ सुश्री अरूणा मुल्हेरकर ☆ 

जीवन माझे कृतार्थ झाले

ज्या दिवशी मी आई झाले।।धृ।।

 

अंगणातल्या वेलीवरती एक कळी दिसली

चाहूल लागता बाळाची रोमांचित काया झाली

आगमनाने बाळाच्या घर माझे सजले।।१।।

 

इवल्याशा त्या मुखावरती

भाव निरागस किती मज दिसती

टॅह्या टॅह्या स्वर रुदनाचे ते कर्णातच घुमले।।२।।

 

फुटला पान्हा मातृत्वाचा

दिव्यानंद तो स्तनःपानाचा

चुटुचुटु करिता दुग्धप्राशन अमृतघट भरले।।३।।

 

बाळकृष्ण तो रांगत आला

आई आई बोलू लागला

बोल चिमखडे गुंजत कानी धन्य मजसी वाटले।।४।।

 

©  सुश्री अरूणा मुल्हेरकर

डेट्राॅईट (मिशिगन) यू.एस्.ए.

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

 कवितेचा उत्सव 

☆ आता थोडं जगून घे… ☆ सुश्री जयश्री कुलकर्णी ☆ 

किती दिवस  उरलेत आता

 थोडं तरी जगून घे

येत नसेल कविता करता

 तीही थोडी शिकून घे

      आता थोडं जगून घे

 

 हातात हात घे तिचा

 म्हण थोडं फिरायला जाऊ

सुंदर आहे विश्व सारं

 त्यातलं सौंदर्य बघून घे

          थोडं तरी जगून घे

 

 सतत आपल्या कपाळाला आठ्या

 घालून सांग का बसतोस?

 अरे कधीतरी ,केव्हातरी ,

मनापासून हसून घे

          थोडा तरी जगून घे

 

प्रश्न कधी संपत नाहीत

 पण त्यात गुंतून बसू नकोस

 विश्वासाने कोणाच्या  खांद्यावर

 मान ठेवून रडून घे

          थोडं तरी जगून घे

 

आला क्षण थांबत नाही

 ठाऊक आहे सारं तुला

 पुढे चाललेल्या क्षणाबरोबर

 थोडा आनंद भोगून घे

      थोडं तरी जगून घे

© सुश्री जयश्री कुलकर्णी

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री रवींद्र सोनावणी

 कवितेचा उत्सव 

☆ तू एक ऋतूचक्र… ☆ श्री रवींद्र सोनावणी ☆ 

देहात चैत्र सोळा, डोळ्यांत पावसाळा,

लाजेत लाजरा गे, तो थरथरे हिवाळा ||धृ||

 

ऋतुचक्र चालते हे, त्याला तुझा इशारा,

स्पर्शून वाहताना, गंधीत होई वारा,

तुज पाहूनी ऋतुंनी, हा चक्रनेम केला ||१||

 

धारेत श्रावणाच्या, तू नाहताच चिंब,

थेंबागणीक प्रगटे, शितोष्ण सूर्यबिंब,

बघता तुला तयाचा, तो दाह शांत झाला ||२||

 

पानाफुलात झुलती, वेल्हाळ हालचाली,

ती कृष्णरात्र गेली, लावूनी तीट गाली,

तारुण्य पेलवेना, बिंबातल्या नभाला ||३||

 

© श्री रवींद्र सोनावणी

निवास :  G03, भूमिक दर्शन, गणेश मंदिर रोड, उमिया काॅम्पलेक्स, टिटवाळा पूर्व – ४२१६०५

मो. क्र.८८५०४६२९९३

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ. उज्वला सुहास सहस्रबुद्धे

 कवितेचा उत्सव 

☆ सोनसळी बहावा… ! ☆ सौ. उज्वला सुहास सहस्रबुद्धे ☆

एका  रात्री पाहिला बहावा,

चंद्र प्रकाशी बहरताना!

गुंतुन गेले हळवे मन माझे,

पिवळे झुंबर न्याहाळताना!

 

निळ्याशार नभिच्या छत्राखाली ,

लोलक पिवळे सोनसावळे!

हिरव्या पानी गुंतुन लोलक ,

सौंदर्य अधिकच खुलून आले!

 

शांत नीरव रात भासली,

जणू स्वप्नवत् स्वर्ग नगरी!

कधी न संपावे ते अपूर्व क्षण,

आस लागली मनास खरी!

 

फुलल्या बहाव्याच्या मिठीत,

सामावून अलगद जावे!

मृदू कोमल स्पर्शाने त्याच्या,

अंगोपागी बहरुन यावे !

© सौ. उज्वला सुहास सहस्रबुद्धे

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री प्रमोद वामन वर्तक

 कवितेचा उत्सव  

माझा गांव !  श्री प्रमोद वामन वर्तक  

माझ्या गावच्या वेशीवर

सुंदर स्वागत कमान,

होते स्वागत पाहुण्यांचे

देऊन त्यांना योग्य मान !

 

माझ्या गावच्या वेशीवर

मंदिरी वसे ग्रामदेव

सांज सकाळ पूजा करी

आमच्या गावचा गुरव !

 

माझ्या गावच्या वेशीवर

दगडी कौलरू शाळा,

धोतर टोपीतले गुरुजी

लावती अभ्यासाचा लळा !

 

माझ्या गावच्या वेशीवर

मंदिरा जवळच तळे,

त्यात दंगा मस्ती करती

पोहतांना मुले बाळे !

 

माझ्या गावच्या वेशीवर

म्हादू पठ्य्याची तालीम,

गावचे होतकरू मल्ल

तालमीत गाळीती घाम !

 

माझ्या गावच्या वेशीवर

वडा भोवती मोठा पार,

गप्पा टप्पा करण्या सारे

सांजेला जमती त्यावर !

 

© श्री प्रमोद वामन वर्तक

१८-०५-२०२२

ठाणे.

मो – 9892561086

ई-मेल – [email protected]

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈