Category: कवितेचा उत्सव 2

श्रीमती अनुराधा फाटक

 कवितेचा उत्सव 

☆ जगावेगळी माउली ☆ श्रीमती अनुराधा फाटक ☆ 

कै. सिंधुताई सपकाळ

फाटून लक्तरं झालेलं कापड

जे उपयोगी येत नाही कधी

तसाच तुझाही तेव्हाचा जन्म

म्हणून नाव ठेवलं गेलं चिंधी!

 

सोसल्यास अनंत समाजकळा

लावत अनाथांना माउली लळा

गुरे वळवताना वळवलस मन

गुरांसह घेतलंस शिक्षण धन !

 

शेणाचे महत्त्व जाणून तुझे

लिलावाविरुध्दचे संतापी बंड

शीलावरचा वज्राघात सोसत

मोजलीस गं काळीज किंमत!

 

रस्तोरस्ती भीक मागितलीस

अनाथपोरक्यांची आई झालीस

दिलेली भीक विसरून गेले

आईपण तुझ्या पदरात टाकले!

 

विविध संस्थांची उभारणी करत

समाजाशी ऋण बांधत बांधत

लेकुरवाळी झालीस तू सिंधूमाई

हीच तुझ्या आयुष्याची कमाई !

 

© श्रीमती अनुराधा फाटक

≈संपादक–श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

सौ. उज्वला सुहास सहस्रबुद्धे

 कवितेचा उत्सव 

☆ माई तुझ्या वेदनाना अंत नाही… ☆ सौ. उज्वला सुहास सहस्रबुद्धे ☆

कै. सिंधुताई सपकाळ

 सिंधुताई, माय माऊली,

 कष्टमय आयुष्य जगली!

 झुंजत झुंजत आयुष्याशी,

 निरपेक्ष, निरामय जीवन जगली!

 

 जन्म जाहला जिथे तिच्या,

 आयुष्याला मोलचं नव्हते!

 वाढत होती जणू बेवारशी,

 प्रेम, जिव्हाळा तिथे न भेटे!

 

 ज्यांनी द्यावा तिला आसरा,

 असे सासर तिला पारखे!

 माय माऊली टाकून दिली,

 जग अवघे वागे शत्रू सारखे!

 

 स्मशानातच तिला लाभले,

 सुख कसे ते अनोळखी!

 प्रेताची आगच बनली ,

 ठेवी न तिला रोज भूखी!

 

 हाल अपेष्टांचे डोंगर लंघुनी,

 जाहलीस तू प्रेममयी!

 अनाथांची माय बनुनी,

 प्रेमभाव ओतलास जगी!

 

 जरी तुझे अस्तित्व लोपले,

 तेज तुझे राहील जगी!

 त्या तेजाच्या प्रकाशात ,

 नित्य चमकशील तू नभी!

 

© सौ. सुहास उज्वला सहस्रबुद्धे

वारजे, पुणे (महाराष्ट्र)

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

सौ. स्वाती रामचंद्र कोरे

 कवितेचा उत्सव 

☆ मी वनवासी… ☆ सौ. स्वाती रामचंद्र कोरे ☆

(शेल काव्य रचना)

जन्मा येताच नकोशी

नकोशी माता पित्याला

सुरू झाला वनवास

वनवास पुजलेला…१

 

पतीच्या सदनी सुख

सुख स्वप्नी ही  न मिळे

सोसताना सारे भोग

भोग शब्दांत ओघळे…२

 

अन्यायाविरुद्ध ऊभी

ऊभी राहिली माऊली

अनाथांचे पाही दुःख

दुःख सोसण्या धावली..३

 

ममता बाल सदन

सदन केले स्थापन

गरजूंना अनाथांना

अनाथांना ते अर्पण..४

 

मी वनवासी म्हणत

म्हणत आयुष्य वेचले

माया ममतेचे छत्र

छत्र आज हरपले…५

 

 तळपत्या उन्हातली

उन्हातली तू सावली

जगायला शिकवले

शिकवले तू  माऊली..६

 

भूक तान्ही असताना

असताना घास गेला

जगणे देणारा श्वास

श्वास पोरका हा झाला..७

 

©  सौ. स्वाती रामचंद्र कोरे

भिवघाट.तालुका, खानापूर,जिल्हा सांगली

मो.9096818972

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

कै. सिंधुताई सपकाळ

 कवितेचा उत्सव 

☆ माई… ☆ सुश्री आशा नलवडे ☆

?माई कुठं सापडलं ग दार तुला,

सर्व संकटातून बाहेर पडायला,

जवळ केलस तू झिडकारलेल्या जींदगीला,

पारखी झाली होतीस तूच चिमूटभर दयेला,

तव्हांच पिळ पडला का ग तुझ्या रिदयाला.

 

? संकटाची झगडताना मायचाबी आधार तुटला,

तवां बोटभर चिंधी बी नाय आली कामाला

अथांग सिंधू होण्याच वचन तवांच दिलस देवाला

भूकेलेलेल्या भाकर दिलीस चिमटा काढून पोटाला,

देवालाच दया आली ताकद दिली जगायला.

 

? मनाला दिलीस उभारी बळ आले लढायला,

जे षोटात तेच व्हटात म्हणून वाचा फोडलीस अन्यायाला,

सय येते बहिणाबाईंची ऐकून तुझ्या शब्दाला,

पोटासाठी,धनासाठी कित्येक जवळ करतात शिक्षणाला,

पाटीपुरती अक्षरे गिरवून ‘माय’ न्याय दिलास बापाला.

 

? बापामुळेच शिक्षणाचा अर्थ कळला तुझ्या रिदयाला,

हृदयातील शिक्षणाने ‘धडा’दिला जगाला,

फार मोठी झेप तुझी गवसणी गगनाला,

निराधारांसाठी  दूर ठेवलेस काळजातील ‘ममतेला’,

सोताचे अश्रु गिळून आनंद दिलास जगाला….

….खूप काही तुझ्याकडून शिकायला मिळाले आम्हांला.?

 

© सुश्रीआशा नलवडे

बोरीवली

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

सुश्री उषा जनार्दन ढगे

 

 कवितेचा उत्सव 

☆ – ज्ञानज्योती सावित्री – ☆ सुश्री उषा जनार्दन ढगे ☆ 

शिक्षित महिला महाराष्ट्राची

महिलांची धीट मुक्तीदात्री

कर्तृत्ववान सेविका कवयित्री

उज्वल ज्ञानज्योती फुले सावित्री…

 

तूच तनया तन्मया विलक्षण

मायावी आदिशक्तीचेच स्वरुप

नारी जुलमाच्या प्रतिकारार्थ

ओलांडलेस उंबर्‍याबाहेरचे माप…

 

स्वत्वासाठी सन्मानासाठी झटली

हक्कासाठी लढणारी तू मानिनी

नसशीस कुणी तू दुर्बल अनुगामी

थोर अन्विता सबल नारी स्वाभिमानी…

 

डावलूनी अन्याया सार्थ हिम्मतीने

स्वःप्राणाने न्याय-तुतारी फुंकली

असूरी अज्ञान ध्वांतास पळवाया

धीराने जिद्दीने उंच मशाल धरिली…

 

पिडीती कर्मठ उच्चवर्ण सनातनी

परि सावित्रीबाई नाही डगमगली

या पाखंडी समाजकंटकांसमोरी

जागृत राहूनी मान नाही तुकविली..!

 

© सुश्री उषा जनार्दन ढगे

 

≈संपादक–श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

सुश्री अरूणा मुल्हेरकर

 कवितेचा उत्सव 

☆ अनाथांची माई ☆ सुश्री अरूणा मुल्हेरकर ☆ 

(हजारो अनाथांची माई सिंधूताई सपकाळ यांचे  ह्रदयविकाराने निधन झाले. लक्ष लक्ष बालके पोरकी झाली. त्या माईला ही भावपूर्ण श्रद्धांजली!)

कै. सिंधुताई सपकाळ

~~~~~

अनाथांची माई

तीच ही सिंधूताई

जिणे तिचे केविलवाणे

परी डगमगली नाही

 

संशयी पतीने

केली मारहाण किती

फेकिले तिला गोठ्यात

नव मासांची गर्भवती

 

प्रसवली चिंधी गोठ्यात

गोमातेने दिधला आधार

ना सासर अथवा माहेर

ती असे एकटी निराधार

 

बांधले बाळ पदरात

गात फिरली आगगाडीत

शमविण्या भूक उदराची

भाजली भाकरी स्मशानात

 

दीपक नामक बालक

जाहली त्याची आई

हीच ती सिंधूताई

आज हजारो अनाथांची माई

 

पतीस ठणकावून सांगे

“नव्हे मी आता बाई,

मी सिंधूताई

समस्त अनाथांची माई”

 

दीप आता विझला आई

अंधार पसरला ठाई

शांती लाभो पुण्यात्म्यासी

हीच श्रद्धांजली वाही

 

©  सुश्री अरूणा मुल्हेरकर

डेट्राॅईट (मिशिगन) यू.एस्.ए.

≈संपादक–श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈

सौ. उज्वला सुहास सहस्रबुद्धे

 कवितेचा उत्सव 

☆ क्रांती ज्योती सावित्रीबाई फुले… ☆ सौ. उज्वला सुहास सहस्रबुद्धे ☆

ज्योत लाविलीस तू,

 मनामनात सर्वांच्या!

शिक्षणाची कास तू,

 धरलीस स्त्रियांच्या !

 

ज्योतिराव, सावित्री,

गाठ बांधली स्वर्गात!

एकरुप होऊनी,

मग्न झाले कार्यात!

 

दीनदुबळया दलितांना,

आधार त्यांचा मिळाला!

अनाथ,सान बाळांना,

 मायेचा झरा लाभला!

 

  अस्पृश्यतेस दूर सारूनी,

  दीप समानतेचा लावला!

  मुलामुलींना शिक्षणाचा,

   ध्यास  तुम्ही लावला!

 

 शेणगोळे आणि शिव्याशाप

झेलले तिने धैर्याने !

 तिच्या त्यागाची फळे,

आज चाखतात मानाने!

 

 ममता, समता यांचे नाते,

 जोडले समाजात त्यांनी!

 ऋण त्यांचे विसरू नये,

 हीच इच्छा मन्मनी !

 

© सौ. उज्वला सहस्रबुद्धे

वारजे, पुणे (महाराष्ट्र)

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈