Category: कवितेचा उत्सव 2

श्रीशैल चौगुले

 कवितेचा उत्सव 

☆ पुन्हा-पुन्हा स्वप्न.. ! ☆ श्रीशैल चौगुले ☆

☆

हिरव्या तलवारीवर

 सोनेरी रुदनाचे ज्योती

वार किरणांचा भारी

धारदार डोलती पाती

*

सप्तरंगी नभात युध्द

क्षितीजा हरवणे जिद्द

उन पावसाचा हा खेळ

झर्या-नाल्यांची पार हद्द

*

खळखळ मंजुळ साद

प्रेमगप्पा पाखर पंखा

फडफड भिजरे अंग

टपटप धारांचा डंका

*

श्रावण चाहुल काळजा

चोहिकडेही गजबजा

सारे रान, माळ हसरे

दुर डोंगरी ऋतू साजा.

☆

© श्रीशैल चौगुले

सौ विजया कैलास हिरेमठ

 कवितेचा उत्सव 

☆ “कोण मी ?” ☆ सौ विजया कैलास हिरेमठ ☆

☆

कोण मी काय आहे

माझे मलाच कळू दे

प्रत्येक नावाआधी

जाणून स्वतः ला थोडे घे…

*

जग हे सुंदर, जीवन सुंदर

नात्यांमुळेच अर्थ जगण्याला

प्रत्येक नात्यात सिद्ध करताना

का होई जीव मग अर्धा अर्धा…..

*

लेक, पत्नी, सून, आई

बहिण, भावजय, मैत्रीण

कोणासाठी कोणीतरी तू झाली

स्वतः ला मात्र विसरून गेली….

*

सगळ्यांची आवडती होता होता

सतत बदलत तू गेली

खरी तुझी तुला सांगा आता

ओळख काय मागे उरली…. ?

*

सतत होताना परफेक्ट

झाला तुझ्यावरच इफेक्ट

करता करता सारं एक्सेप्ट

स्वतःला मात्र करत गेलीस रिजेक्ट…

*

नातं स्वतः शी असतं पहीलं

त्याला तोडून चालत नसतं

रोजच्या घाई गडबडीतही

स्वतः साठी काही क्षण जगायचं असतं…

*

रहा नक्कीच जगासोबत

जगून घे प्रत्येक नात्यासोबत

पण साथ स्वतःची सोडू नको

हरवून स्वतःलाच जगू तू नको…

*

जगात कुठेच मिळणार नाही

सुख समाधान शांती

तुझ्यातच आहे दडलेलं सारंकाही

त्यासाठीच बघ जोडून नातं स्वतःशी…

☆

💞शब्दकळी विजया 💞 

©  सौ विजया कैलास हिरेमठ

पत्ता – संवादिनी ,सांगली

मोबा. – 95117 62351

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री प्रमोद वामन वर्तक

 कवितेचा उत्सव  

☆ बुद्धी दाता आणि ज्ञान दाता !. ☆ श्री प्रमोद वामन वर्तक ☆

☆

साम्य वाटले मजला 

PC आणि गणेशात,

सांगतो समजावून कसे 

धरा तुम्ही ते ध्यानात !

 साऱ्या विश्वाची खबर

 लंबकर्ण कानी आकळे,

 साठवी माहिती जगातून

 PCचे इंटरनेट जाळे !

सोंड मोठी वक्रतुंडाची

करी दुष्टांचे निर्दालन,

अँटीव्हायरस करतो 

स्व जंतूचे स्वतः हनन !

 ठेवी लंबोदर उदरात

 भक्तांच्या पाप पुण्याला,

 PCची हार्डडिस्क पण 

 येते ना त्याच कामाला ?

येई स्वारी गजाननाची

मूषक वाहना वरुनी,

PCचा माऊस पण चाले

एका चौकोनी पॅडवरुनी !

.

पण

.

भले भले भरकटती

PCच्या मोह जालात,

एकच गणेश बुद्धिदाता

ठेवा कोरून हृदयात !

ठेवा कोरून हृदयात !

☆

श्री तुकाराम दादा पाटील

 कवितेचा उत्सव 

☆ हेच आहे मागणे… ☆ प्रा तुकाराम दादा पाटील ☆

☆

वागणे हळवे बनावे हेच आहे मागणे

भाग्य माझे मज मिळावे हेच आहे मागणे

*

राबणारे हात द्यावे कर्म बनता साधना

दैन्य सारे लुप्त व्हावे हेच आहे मागणे

*

माणसाने माणसाला प्रेम द्यावे जीवनी

सोबतीने जगत जावे हेच आहे मागणे

*

दान देतो देव तेव्हा आसराही लाभतो

शांततेने जगतजावे हेच आहे मागणे

*

संस्कृती जपण्या प्रभूंची नित्य व्हावी प्रार्थना

एकतेचे गीत गावे हेच आहे मागणे

*

माय मातीने दिलेली जपत जावी देणगी

मग श्रमाचे मोल घ्यावे हेच आहे मागणे

*

या जगाचे ध्येय आहे माणसाना जोडणे

स्वप्न त्याने ते जपावे हेच आहे मागणे

*

केवढे सामर्थ्य आहे ओळखावे आपले

संकटांशी मग लढावे हेच आहे मागणे

☆

© प्रा. तुकाराम दादा पाटील

मुळचा पत्ता  –  मु.पो. भोसे  ता.मिरज  जि.सांगली

सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३

दुरध्वनी – ९०७५६३४८२४, ९८२२०१८५२६

≈ संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈

सुश्री नीलांबरी शिर्के

श्री शरद कुलकर्णी

 कवितेचा उत्सव 

☆ पांडुरंग… ☆ श्री शरद कुलकर्णी ☆

☆

परागंदा झाला,

पंढरीचा बाप.

संत भोगती,

दुःख अभिशाप ।

*

रिकामे देव्हारे,

देवाला शोधती.

अभंगाच्या आकांतात,

मिळे पांडुरंग अंती। ।

☆

© श्री शरद  कुलकर्णी

मिरज

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री राजकुमार दत्तात्रय कवठेकर

 कवितेचा उत्सव 

☆ पत्र… ☆ श्री राजकुमार कवठेकर ☆

☆

 नका येऊ पुसाया हाल माझे 

सुखांनो, एवढे ऐकाल माझे.. ?

*

खरा ना आजचा ‘त्यांचा’ जिव्हाळा

हसू त्यांनीच केले काल माझे 

*

मला स्वाधीन केले वादळांच्या 

(म्हणे की, वागणे बेताल माझे)

*

कितीही द्या, कटोरा हा रिकामा

जिणे आजन्म हे कंगाल माझे 

*

दगे या माणसांचे, या ऋतूंचे 

सुकावे रे कसे हे गाल माझे

*

जगाचे… जीवनाचे रंग खोटे

अरे! त्यानेच डोळे लाल माझे

*

नको ते बंगले बंदिस्त त्यांचे

खुल्या दुःखा-सुखांचे पाल माझे

*

शरीराचे तुम्ही सोसाल ओझे

कसे अश्रू तुम्ही पेलाल माझे?

*

जणू मी वादळीवाऱ्याप्रमाणे 

कुठूनी पाय रे खेचाल माझे 

*

भिजावे घाम.. अश्रूंनी पुन्हा मी

असे हंगाम सालोसाल माझे 

*

तुझी गे भेट झाली.. प्रीत लाभे

बने आयुष्य मालामाल माझे 

*

कशी सांगू कुणा माझी खुशाली

कधी डोळे तुम्ही वाचाल माझे?

*

‘तुझा आधार वाटे जीवनाला… ‘

निनावी पत्र हे टाकाल माझे.. ?

☆

© श्री राजकुमार दत्तात्रय कवठेकर

कवी / गझलकार

संपर्क : ओंकार अपार्टमेंट, डी बिल्डिंग, शनिवार पेठ, आशा  टाकिज जवळ, मिरज मो ९४२११०५८१३

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री मानसी विजय चिटणीस

कवितेचा उत्सव

☆ “निरागस कवितेला जपताना…” ☆ सुश्री मानसी विजय चिटणीस ☆

☆

कविता मनात जन्मावी लागते म्हणे

पण तिच्या काळ्याभोर निरागस डोळ्यांत 

साक्षात कविताच जगताना पाहिलय मी

वर्गातल्या रुक्ष खिडक्यांशीही तिची गट्टी जमलीय

त्या खिडकीतलं इवलंस्स आभाळही तिच्या डोळ्यांत लपतं

फ्राॅकच्या खिशात असतात

चाॅकलेटचे चंदेरी कागद, बांगड्यांच्या काचा, कसल्यातरी बिया, आणि बरीचशी स्वप्नं

आणि हो.. माझ्यासाठी 

आठवणीने आणलेलं फुल ही असतं कधीमधी

मागून येवून माझे डोळे झाकताना

तिचे चिमुकले स्पर्श आभाळ होतात

अन् गळ्यात पडून खाऊसाठी हट्ट करताना

गालांवर चंद्र उतरतात

तिच्या अबोल गाण्यांच्या ओळी

मला शांत संध्याकाळी सापडतात

कुशीत घेऊन थोपटताना

कधी नकळत

तिचा मायस हात फिरतो माझ्या डोक्यावर

धुक्याचे लोट वाहू लागतात 

माझ्या पोरक्या डोळ्यांतून तेव्हा

कविता मनात जन्मतात 

कुशीत झोपलेल्या निरागस कवितेला जपताना…

☆

© सुश्री मानसी विजय चिटणीस

केशवनगर, चिंचवड, पुणे. फोन : ०२०२७६१२५३१ / ९८८११३२४०७

≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ.मंजुषा मुळे/सौ.गौरी गाडेकर≈

श्री अनिल वामोरकर

 कवितेचा उत्सव 

☆ कृष्ण… ☆ श्री अनिल वामोरकर ☆

☆

अंत:करणातील 

कृष्ण जन्मू दे

चेतना जागरूकता रुपात

नकारात्मक अंधार 

नाहीसा होऊ दे…

मी, माझा, हा अहंभाव

साखळी रुपात 

जखडून ठेवला आहे 

त्या साखळ्या तुटू दे…

व्यष्टीची कवाडे

अलवार उघडून 

रस्ता समष्टीचा

मोकळा होवू दे…

निर्मोही होवून 

अलिप्तपणे जगावे

शिकवून जातो कृष्ण 

स्वतः ला तटस्थ राहू दे..

कृष्ण म्हणजे प्रेम

कृष्ण जीवन बासुरी

कृष्ण म्हणजे वैराग्यही

असा कृष्ण अंतरी जन्मू दे…

☆

© श्री अनिल वामोरकर

अमरावती

≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित  ≈