Category: कवितेचा उत्सव 2

श्री सुहास सोहोनी

 कवितेचा उत्सव 

☆ मृद्‍गंध… ☆ श्री सुहास सोहोनी ☆

☆

पालथ्या मुठीवर कधी फिरावा…

अत्तर लिंपित फाया…

हाताआधिच सुगंध धावे…

नासिकेप्रती जाया…

ही आनंदाची उधळण करण्या…

सुगंध धावे वेगे…

मी बघतच बसलो बधीर नेत्रे…

हात राहिला मागे… ||

 *

तापल्या तनूवर कुणी उडविले…

चार गारसे थेंब…

हलवून कोणी गुलाबदाणी…

शहारले अंगांग…

शिंपडण्या मग गुलाबपाणी…

झालो मीही धुंद…

तोच टपोरे नाचत आले…

आकाशातून थेंब… ||

 *

मेघदाणितुन सरसरत्या…

थेंबात धावले सगळे…

गुलाबदाणी दुय्यम झाली…

मृद्गंधाला भुलले…

 *

मीहि झेलले अंगावरती…

तुषार आणिक थेंब…

आणि घेतला छातीभरुनी…

हलकासा मृद्गंध… ||

☘️

© सुहास सोहोनी

रत्नागिरी

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ. ज्योती कुळकर्णी 

 कवितेचा उत्सव 

☆ गणेश-स्तवन… ☆ सौ. ज्योती कुळकर्णी ☆

(वृत्त: पादाकुलक)

☆

अग्रपुजेचा, मान हा तुला

नमन हेरंब, गणेशा तुला…..

*

तुझ्या बुद्धीची, प्रभा फाकली

दिव्य तेज ते, अवनी खुलली…..

*

पूर्ण वेद हे, तुझीच मूर्ती

जीवन उजळू, घेऊ स्फुर्ती…..

*

पुराणरूपे, रत्न शोभली

शब्दकोंदणे, तत्त्व त्यातली…..

*

काव्य-नाटके, तुझीच अंगे

रुणझुणती ही, तुझ्याच संगे…..

*

लघु नयनी तव, अवघे हे जग 

विघ्नेशा तू, पाव मला मग…..

*

प्रार्थिले तुला, मी या भावे

संकट समयी, धावत यावे…..

☆

© सौ. ज्योती कुळकर्णी

अकोला

मोबा. नं. ९८२२१०९६२४

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री अपर्णा परांजपे

 कवितेचा उत्सव 

☆  मनवारी… ☆ सुश्री अपर्णा परांजपे ☆

☆ 

देव पहावा पहावा

देव नाचूनही गावा

देव मस्तकी धरावा

देव जीविचा विसावा…

*

देव दाट घनदाट 

मोर नाचतो वनात

देव कस्तुरी नाभीत 

देव आत आत आत…

*

डोळे पाहती कौतुक 

जग सोहळे अप्रूप

डोळे आत वळवत 

देव तेथेचि डोलत…

*

धुंद आनंदी आनंद 

कसा वसे हा देहात

जेव्हा मन शांत शांत 

चित्त एकाग्र अभंग….

*

“वारी” मनाची विरक्ती 

नको देहाची आसक्ती 

नसे वेगळी हो‌ मुक्ती

“आस नाही” ही निवृत्ती….

*

नको वाट संसाराची

“मनवारी” या देवाची

कृतार्थता या जन्माची

आस सुफळ देवाची…

*

देव पहावा पहावा

देव नाचूनही गावा

देव मस्तकी धरावा

देव जीवीचा विसावा…

☆ 

🌹 भगवंत हृदयस्थ आहे 🌹

(वारी म्हणजे “चालणे” व वारी म्हणजे “हरण कर” … एकच शब्द द्विअर्थाने)

© सुश्री अपर्णा परांजपे

कात्रज, पुणे

मो. 9503045495

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री नीलांबरी शिर्के+

सौ. सुनिता गद्रे

☆ कवितेचा उत्सव ☆

☆  गणेश चतुर्थी…  कवी – अज्ञात ☆ सौ. सुनिता गद्रे ☆ 

बसले होते निवांत

गणेश चतुर्थीचा विचार होता मनात.

काय करू कसं करू येत नव्हतं ध्यानात.

 

इतक्यात कोणीतरी डोकावलं देवघरातून,

म्हटलं “कोण आहे?”

तर म्हणे

“मी गणपती.काही सांगायचं आहे ऐकशील?”

“सर्व करणार तुझ्याचसाठी

 मग सांग ना रे देवा !”

 

 म्हणाला..

“येतो आहे तुझ्याकडे आनंदासाठी.

नका करू आता काही देखावा. नको त्या सोन्याच्या दूर्वा,

नको ते सोनेरी फूल,

नको तो झगमगाट,

त्रास होतो मला!

माझा साधेपणा, सात्विकता पार जाते निघून .

 

घे तुझ्या बागेतील माती

दे मला आकार.मी गोल मटोल

नाही पडणार तुला त्रास.

मग दे मला स्वच्छ पाट बसायला .

 

अनवाणी चाल गवतातून,

आण दूर्वा आणि फुलं दोन चार .माझ्यासाठी नको ओरबाडू झाडांचं सौंदर्य वारंवार .

माझ्या बरोबर

तुझ्याही आरोग्याची होईल वाटचाल.

 

दररोज साध्या

गरम जेवणाचा दे मला प्रसाद .

म्हणजे माझं आणि तुझं आरोग्य राहील साथ.

रोज पहाटे उठव मला तुझ्या ओंकारध्वनीने

संध्याकाळी दे मला मंत्रपुष्पांजली आणि

कर शंखनाद.

 

मग पावित्र्य आणि सोज्ज्वळता येईल

तुझ्या घरात व मनात.

मला विसर्जन पण हवं तुझ्याच घरात. 

विरघळेन मी

छोट्या घागरीत पण.

 

 मग मला पसरव तुझ्या बगिच्यात.

 तिथेच मी थांबीन 

म्हणजे लक्ष राहील तुझ्या घरात.

तू अडचणीत सापडलीस तर

येता येईल क्षणात.”

 

कवी : अज्ञात 

सौ सुनीता गद्रे,

माधवनगर सांगली, मो 960 47 25 805.

≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित  ≈

श्री रवींद्र सोनावणी

 कवितेचा उत्सव 

☆ पहाटे पहाटे… ☆ श्री रवींद्र सोनावणी ☆ 

☆

पहाटे पहाटे मला जाग आली,

तुझी याद ओल्या, सुगंधात न्हाली ।।ध्रु।।

*

वरी लाल आरक्त प्राची नवेली,

कुणी मुग्ध ललना, जणू लाज ल्याली,

समिरातूनी रंग शिंपीत गेली ।।१।।

*

जरी मध्यरात्री, तुझी साद आली,

परी मंचकी, मुक्त एकांत भाळी,

असें भास ह्रदयांस, या नित्य जाळी ।।२।।

*

झुलावे फुलारून, वाटे कळ्यांना,

परी मर्म याचे, तुला आकळेना,

म्हणूनच रात्र ही, निःशब्द झाली ।।३।।

☆

© श्री रवींद्र सोनावणी

निवास :  G03, भूमिक दर्शन, गणेश मंदिर रोड, उमिया काॅम्पलेक्स, टिटवाळा पूर्व – ४२१६०५

मो. क्र.८८५०४६२९९३

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री राजकुमार दत्तात्रय कवठेकर

 कवितेचा उत्सव 

☆ निखाऱ्यासारखे… ☆ श्री राजकुमार कवठेकर ☆

☆

हे जिणे होते निखाऱ्यासारखे

भेटणारे लोक वाऱ्यासारखे

*

नेमके ना बोलणे झाले कधी

बोलणे माझे पसाऱ्यासारखे

*

लाभले ना प्रेम कोणाचे कधी

सर्वही दूरस्थ ताऱ्यांसारखे

*

भोगली आजन्म दु:खे.. वेदना 

भेटलेले सौख्य पाऱ्यासारखे

*

मी मनस्वी हासलो होतो जरी

हासणे झाले बिचाऱ्यासारखे

*

ना घडे हातून या काही.. कधी

वागणे माझे विचाऱ्यासारखे

*

बासरीचा सूर होतो आर्त मी

वाजणारे ते नगाऱ्यासारखे 

*

मुक्त केंव्हा वावरू ‘त्याने’ दिले?

दुःख जन्माचे पहाऱ्यासारखे

*

चिंब होते व्हायचे त्या श्रावणी

वर्षले जे; ते फवाऱ्यासारखे

*

मौन संवादापरी होते तुझे

पाहणे होते इशाऱ्यासारखे

*

लोक सारे टाळुनी जाती मला

भात-लिंबाच्या उताऱ्यासारखे

*

जन्म हा माझा तहानेला तुझा

राहणे झाले किनाऱ्यासारखे

*

मेघ आषाढी तशी होतीस तू

चित्त हे माझे पिसाऱ्यासारखे

*

‘सावजा’चे काढले आयुष्य मी

भेटले सारे शिकाऱ्यांसारखे

*

“या.. ” तुझे आपुलकीचे शब्द हे

नेहमी होते निवाऱ्यासारखे

*

स्वार्थसाधूंचीच सारी नाटके

साव ही… होती भिकाऱ्यासारखे

*

वागता ना बोलता आले मला

मी जगावे कोंडमाऱ्यासारखे

*

वाट काट्याची.. उन्हे.. पाऊसही

वाहिले आयुष्य भाऱ्यासारखे

*

फाटक्याने रे जगावे लागले

दैव माझे वाटमाऱ्यासारखे

*

चोख मी होतोच सोन्यासारखा

तोलले त्यांनी घसाऱ्यासारखे

*

संपुनी संपेचिना आयुष्य हे

वाटते आहे ढिगाऱ्यासारखे

☆

© श्री राजकुमार दत्तात्रय कवठेकर

कवी / गझलकार

संपर्क : ओंकार अपार्टमेंट, डी बिल्डिंग, शनिवार पेठ, आशा  टाकिज जवळ, मिरज मो ९४२११०५८१३

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ. सुनीता पाटणकर

 कवितेचा उत्सव 

☆ आम्ही जगतोय ???? ☆ सुश्री सुनीता पाटणकर ☆

आम्ही जगतोय ?????

आम्ही जिवंत आहोत ?????

आमचे डोळे उघडे आहेत ????

आमचे कान बंद आहेत ?????

आमचं तोंड चालू आहे !

चार भिंतीत………

 

अत्याचार, अनाचार, भ्रष्टाचार,

याहून श्रेष्ठ बलात्कार !!!!

 

घटना घडतात,

चार दिवस बोंबाबोंब,

परत सगळं विसरायचं,

जीवन जगत रहायचं,

कसली न्यायव्यवस्था ?????

 

मुलीला डॉक्टर केली,

तिच्यावर बलात्कार झाला,

तिचा खून झाला,

दहा दिवस उलटले,

सगळे बलात्कारी,

निर्लज्ज, हलकट,

आरामात रिलॅक्स,

कसलीही भीती नाही,

लाज नाही,

बेशरम…….

यांना आई‌ बहिणी नाहीत ?????

 

समाजानेचं यांचा,

न्याय करायला हवा,

यांचे बलात्कारी हत्यार,

उखडून टाका,

पुन्हा कृष्ण कृत्य करताना,

लाख वेळा भीती वाटली पाहिजे…….

तरच त्या यातना भोगलेल्या,

आत्म्यांना शांती लाभेल,

हे बंद झालं पाहिजे,

ममता तू बाईचं आहेस ना ????

 

किती‌ निर्भया‌ झाल्यावर,

चित्र पालटणार आहे?????

कायद्याचा आसूड,

कायद्याचा बडगा,

हे प्रत्यक्षात,

कधी येणार????

बाईचा खरा‌ सन्मान,

तेव्हाच होणार……….

© सौ. सुनीता पाटणकर

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री आशिष मुळे

 कवितेचा उत्सव 

≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈