Category: कवितेचा उत्सव 2

सौ विजया कैलास हिरेमठ

 कवितेचा उत्सव 

☆ “कारण…” ☆ सौ विजया कैलास हिरेमठ ☆

☆

निद्रस्थ स्तब्ध राहण्या अनेक कारणे

पेटून उठण्या एकच कारण पुरते ….

न करण्याची अनेक कारणे

करण्यासाठी फक्त एकच कारण असते..

दुःखाची अनेक कारणे

भर उन्हात एक झुळूक पुरते

अनेक संकटे मोठी असताना

सुखासाठी एकतरी कारण नक्की असते….

दोष देण्या अनेक कारणे

नाते सहज तोडू पाहते

जोडून राहण्या एकच कारण

प्रेमाने जग जिंकता येते….

अश्रूंसाठी अनेक कारणे

एकच कारण ओठावर हसू फुलवते

हार मानण्या अनेक कारणे

जिंकण्यासाठी एकच कारण असते….

जग हे मोठे,जगणे छोटे

पुरून येथे उरता येते

एक कारण जगण्याचे

मरणालाही परतून लावते…..

जीवन मरण इथे आपण शरण

तरीही जगण्याची एक आशा पुरते

दोन श्वासातील अंतर जीवन

त्या श्वासाची सोबतही अमूल्य इथे ठरते….

स्वप्न आणि ध्येयासाठी पळताना

सुख, शांती आणि समाधानच जिंकते

शोध त्या एक कारणाचा लागता

आयुष्य सहज सुंदर सोपे होते….

☆

💞शब्दकळी विजया 💞 

©  सौ विजया कैलास हिरेमठ

पत्ता – संवादिनी ,सांगली

मोबा. – 95117 62351

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री कावेरी रोहिदास सुतार

 कवितेचा उत्सव 

💯 बाई पण भारी देवा 💯 सुश्री कावेरी रोहिदास सुतार ☆

☆

“पुरुष ना तू मग हे चालायचंच

पावित्र्याचा पारड्यात स्त्री ला तू तोलयचंच,

वाट्टेल तेव्हा तू तिच्याशी अबोला धारायचास

मनाला येईल तेव्हा अपमान ही करयचास ,

स्वतःचा मर्जी प्रमाणे तू हवं तस वागायचं

तिचा वागण्याचं मात्र तू स्पष्टीकरण मागायच,

ओझ तुझ्या अपेक्षांचं आयुष्य भर लादायच

तू चुकलास तरी चालेल पण तिने नाही चुकायच ,

बनून तुझी सहचारणी संसार करते सुखाचा

केलास कधी विचार तिचा मनाचा ,

अर्धांगिनी तुझी ती समजून घे तिला थोड

सुटता सुटता सुटेल ह्या संसाराच कोड,

मग कळेल तुला दिसतं तस नसतं

जगून बघ एकदा बाई पण काय असत..💯

☆

© सुश्री कावेरी रोहिदास सुतार

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

प्रा डॉ जी आर प्रवीण जोशी

 कवितेचा उत्सव 

☆ भूपाळी स्वामींची… ☆ प्रा डॉ जी आर प्रवीण जोशी ☆

☆

झाली पहाट झाली स्वामी

जागे व्हा आता

स्वामी जागे व्हा आता

भक्त गण अतुरला

तुमच्या दर्शनी राऊळा  

☆

गंगेचे उदक आणले

मुख प्रक्षाळा स्वामी

मुख प्रक्षाळा

किलबिलाट झाला

पक्षी झाले हो गोळा ।। 1 ।।

*

घातला धूप तो भक्ती भावाचा

भक्ती भावाचा

पंचप्राणाची पंचारती

 ह्या देही ओवळीता ।। 2 ।।

*

स्नानासाठी आणले, काशी उदक,

स्वामी काशी उदक

दवणा मरवा सुगंधी,

 हिना अत्तर

 कस्तुरीची उटी लावली भाळा,

 लावलीया भाळा

उठा उठा स्वामी दर्शन द्या सकळा ।। 3 ।।

*

सुगंधी फुले, पंचामृत, केशरी

पेढे, स्वामी दूध अन पेढे

नैवेद्यपात्री  गोड धोड फळे

*

उठा उठा स्वामी आता

 दर्शन द्यावे मुख कमळा

झाला अरुणोदय सरली

निद्रेची वेळा । । 4 ।।

☆

☆ तत्सद स्वामी अर्पणास्तू ☆

© प्रो डॉ प्रवीण उर्फ जी आर जोशी

ज्येष्ठ कवी लेखक

मुपो नसलापुर ता रायबाग, अंकली, जिल्हा बेळगाव कर्नाटक, भ्रमण ध्वनी – 9164557779 

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री शरद कुलकर्णी

 कवितेचा उत्सव 

☆ गीत… ☆ श्री शरद कुलकर्णी ☆

☆

मंदिर उभे दिमाखी,

गोपूराची सुंदर नक्षी.

कळसावरील पक्षी,

गीत कुणास्तव गातो.

मंदिर उभे सुनसान,

आता कुणाच्या साक्षी.

उडून जाता पक्षी,

गाणेच घेउन जातो.

कंठात रुतले शब्द,

वणवाच होउन वक्षी.

गहिवरुन पुन्हा सापेक्षी,

कविताच होउन जातो.

☆

© श्री शरद  कुलकर्णी

मिरज

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ.ज्योत्स्ना तानवडे

 कवितेचा उत्सव 

☆ 🙏 नरशार्दूल  🙏 ☆ सौ.ज्योत्स्ना तानवडे ☆

🏆 जागतिक साकव्य विकास मंचच्या काव्यलेखन स्पर्धेत द्वितीय क्रमांक प्राप्त 🏆

☆

भारतभूच्या स्वातंत्र्याची मशाल धगधगती

विनायकाची जाज्वल्य अशी थोर देशभक्ती || ध्रु ||

*

मातृभुमीची मुक्तता हाच ध्यास मनी होता

शिक्षणातुनी ध्येयासाठी अढळ यत्न होता

तारूण्यातच स्वदेशावरी करी पतंगप्रिती

विनायकाची जाज्वल्य अशी थोर देशभक्ती ||१||

*

स्वतंत्रतेचे स्तोत्र रचूनी केली नित्य पुजा

उध्दरणास्तव तिच्या भोगिली अपरंपार सजा

अपार ध्येयासक्त मनाची दृढ श्रद्धा होती

विनायकाची जाज्वल्य अशी थोर देशभक्ती ||२||

*

क्रांतीसाठी प्रेरक बनुनी मुक्त राहण्याला

बंदीवासा चूकविण्यास्तव बेत नवा केला

मार्सेलिसला झेप सागरी जणू प्राणाहुती

विनायकाची जाज्वल्य अशी थोर देशभक्ती ||३||

*

क्रांतीकारक उडी शुराची त्रिखंडात गाजे

स्वातंत्र्याची रणदुंदूभी उच्चरवे वाजे

शंभरवर्षे तळपे नरशार्दूलाची महती

विनायकाची जाज्वल्य अशी थोर देशभक्ती ||४||

*

भारतभूच्या स्वातंत्र्याची मशाल धगधगती

विनायकाची जाज्वल्य अशी थोर देशभक्ती ||

☆

© सौ.ज्योत्स्ना तानवडे

वारजे, पुणे.५८

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्रीशैल चौगुले

 कवितेचा उत्सव 

☆ वृक्षारोपण... ☆ श्रीशैल चौगुले ☆

☆

माझीया मनात  अंकुर फुलावे

पानात झुलावे    दृष्टीगगनी.

*

मातीही हसावी   सदैव बहर

वाढिचा कहर     निसर्गसखा.

*

हळूच शाखांत    पोक्तले  रोपटे

वृक्षही  चौपटे    सावलीझुले.

*

विश्राम जीवाला थकल्या पांथस्था

फळेही  हसरी   रानराज्यात.

*

ढगास आळवी   वार्याशी सलगी

वाजती हलगी    गडगडात.

*

मानवा संदेश    पाऊस पडतो

वृक्षाशी छेडतो   चक्रकारण.

*

युवांची ताकत   युगाला घोषीत

श्वासाला पोशीत   वृक्षारोपण.   

☆

© श्रीशैल चौगुले

श्री आशिष  बिवलकर

  चित्रकाव्य  

– वटवृक्ष… –  ☆श्री आशिष  बिवलकर ☆

☆

कुटुंबवत्सल वटवृक्ष,

पसरला दाट दुरवर!

घनदाट  छाया त्याची,

वाटसरूच्या शिरावर!

*

लहान मुले खेळती बागडती,

खेळती सुरपारंब्या मनसोक्त!

मोठ्यांना मोह न आवरे खेळाचा,

टांगाळून घेती आनंद होऊन  मुक्त!

*

प्राणवायूचे संतुलन राखतो,

विषारी वायू  स्वतः शोषून!

सहवास त्याच्या सोबत असावा,

सांगती शास्त्र आपणा उद्देशून!

*

भूजल साठा करतो मुळाशी,

सोडतो बाष्प उन्हाळ्यात!

अक्षयवृक्ष म्हणती यासी ,

हिरवागार साऱ्या ऋतूकाळात!

*

सुहासिनी पूजती यास,

मागती  दीर्घायुष्य पतीचे!

जन्मोजन्मीची साथ मांगे,

पूजन करती  पतिव्रतेचे!

*

उपयोग याचे असती अनेक,

दूर करी दंतदुखी असो मधुमेह!

लेप याचा ठरे  मोठा गुणकारी,

आयुर्वेदात महत्व नि:संदेह !

☆

© श्री आशिष  बिवलकर

बदलापूर

मो 9518942105

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈