Category: कवितेचा उत्सव 2

महंत कवी राज शास्त्री

  हे शब्द अंतरीचे # 179  

☆ पाऊस तुझा नि माझा… ☆ महंत कवी राज शास्त्री ☆

☆

पाऊस तुझा नि माझा

तफावत खूप आहे

तुज आवडे रिमझिम

माझे मन, त्यात नं राहे.!!

*

पाऊस तुझा नि माझा

एकच छत्री मला हवी

त्या पावसात सोबती

मज बिलगून तू रहावी.!!

*

पाऊस तुझा नि माझा

कधीच सोबत येत नाही

मी पाहतो वाट तुझी अन्

पाऊस माझा, अंत पाही.!!

*

पाऊस तुझा नि माझा

खेळतो पाठशीवणीचा खेळ

गरम गरम चहा पिण्यातच

जातो मग आपला वेळ.!!

☆

© कवी म.मुकुंदराज शास्त्री उपाख्य कवी राज शास्त्री

श्री पंचकृष्ण आश्रम चिंचभुवन, वर्धा रोड नागपूर – 440005

मोबाईल ~9405403117, ~8390345500

≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ.गौरी गाडेकर≈

श्री प्रमोद वामन वर्तक

 कवितेचा उत्सव  

☆ पहिला पाऊस !  ☆ श्री प्रमोद वामन वर्तक ☆

☆

धारा कोसळता मृगाच्या 

भेगाळल्या धरतीवर

मृदगंधाच्या गंधाने

जाई व्यापून चराचर

*

नाचे आनंदाने निसर्ग

झाडे वेली प्रफुल्लित होती

झटकून धूळ अंगावरची

वाऱ्यासवे डोलू लागती

*

ओहोळ सारे माथ्यावरले

आता होतील जलप्रपात

दरीत उतरून खळाळत

होतील समर्पित सागरात

*

अंग झटकून कासकर

लागे पेरणीच्या कामाला

ढवळ्या पवळ्या खुशीने

घेती जोडून नांगराला

*

पीक घेणार बळीराजा

यंदा शेतात सोन्याचे

विनवी प्रमोद प्रभूला

रक्षण करा धान्याचे

रक्षण करा धान्याचे

 ☆

© प्रमोद वामन वर्तक

संपर्क – दोस्ती इम्पिरिया, ग्रेशिया A 702, मानपाडा, ठाणे (प.)

मो – 9892561086 ई-मेल – [email protected]

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री त्रिशला शहा

 कवितेचा उत्सव 

☆ दोन छत्र्या… ☆ सुश्री त्रिशला शहा ☆

☆

दोन छत्र्या रस्त्यात भेटल्या

हाय, हँलो म्हणून खुदकन् हसल्या 

*

किती दिवसांनी भेट झाली

विचार दोघींच्या आला मनी

*

भेटलोच आहोत तर गप्पा मारू

सुखदुःखाच्या चार गोष्टी करू

*

काय चाललय सध्या तुझं

इतके दिवस तू होतीस कुठं

*

काय सांगू बाई तुला

असा कसा गं जन्म आपला

*

उन्हात तापायच,पावसात भिजायच

रस्त्यावर नुसत गरगर फिरायच

*

तुझी सुध्दा हीच नं कथा

दुसऱ्यांसाठीच जन्म आपला

*

दोघींनीही मोकळे केले मन

किती दिवसांची मनाची तगमग

*

अजूनही थोड बोलायच होत

मनातल सार सांगायच होत

*

पण हाय रे दैवा

आमच्याकडे एवढा वेळ कुठला

*

खसकन् माझ नाक दाबल

ड्युटीवर रूजू व्हावच लागल

*

दोघीही मनातून खट्टू झाल्या

मालकिणीसंग विरूद्ध दिशेला गेल्या

☆

© सुश्री त्रिशला शहा

मिरज

 ≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

प्रा डॉ जी आर प्रवीण जोशी

 कवितेचा उत्सव 

☆ कण… ☆ प्रा डॉ जी आर प्रवीण जोशी ☆

☆

दुःख दिसलं सुपभर

सुख मिळालं कणभर

डोंगर होता भरल्या काट्यानी

करवंद बसली जाळीवर

*

आवळा बसला झाडावर

भोपळा दिसला वेलीवर

देवा तुझं ईपरीत काहीं

आंबा लोम्बतो वाऱ्यावर

*

सुखातला दुःखाचा बिब्बा

नदीकाठी काळी घागर

अंधारातील खेळ जगाचा

जीवनाचा होतो मग जागर

*

 येळकोट येळकोट घेताना

 म्हाळसाचा होतो विसर

 संबळ डंबळ वाजवताना

  पिवळा भडक होई नांगर

*

 पिकली शेती रांधली चूल

 काळ्या मातीचा होतो चाकर

 चटके हाताला बसताना

 पोटात जाई कोर भाकर

☆

© प्रो डॉ प्रवीण उर्फ जी आर जोशी

ज्येष्ठ कवी लेखक

मुपो नसलापुर ता रायबाग, अंकली, जिल्हा बेळगाव कर्नाटक, भ्रमण ध्वनी – 9164557779 

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री राजकुमार दत्तात्रय कवठेकर

 कवितेचा उत्सव 

☆ अंगणासारखे… ☆ श्री राजकुमार कवठेकर ☆

☆

जगावे कधी मी मनासारखे?

कधी ग्रीष्म ही श्रावणासारखे

*

मला दुष्ट होता न आले कधी

जगा सोसले सज्जनांसारखे

*

उपाशीच अन् फाटका राहिलो

ऋतू हे जरीही सणासारखे

*

न छाया, सुगंधी फुले,ना फळे

जिणे लाभलेले तणासारखे

*

मिळो प्रेम किंवा उपेक्षा मिळो

करा प्रेम ओल्या घनासारखे

*

कुणासारखे मी असाया नको

असावेच मी ‘आपणा’सारखे

*

करंटेपणी भाग्य हे केवढे

मला बाळ हे ‘श्रावणासारखे’

*

मला द्यायचे मान्य केले जरी

दिले सर्व त्यांनी ‘पणा’सारखे

*

न बक्षीस..वा दान ही लाभले

मला जे मिळे ते ऋणासारखे

*

नको दार..वा चौकट्या..या मना

असावे खुल्या अंगणासारखे

*

जरी गोड त्यांचे  हसू… बोलणे

मना शब्द होते घणासारखे

*

मला टाळता लोक आले न ‘ते’

नकोश्याच होते क्षणांसारखे

*

नको श्रेष्ठता तारकांची मला

मिळो भाग्य धूलीकणासारखे

*

उराया नको होऊनी कोळसा

झिजावे तरी चंदना सारखे

*

कृतघ्ने जरी वागले सर्वही

मला वाटले अंजना सारखे

*

नसे स्त्राव नाही जरी वेदना

तुझे राहणे गे व्रणासारखे

*

असे निष्कलंकी प्रतीमा तुझी

तुला मानले दर्पणा सारखे

*

दिसाया जरी मी बटूसारखा

मला रूप ही वामनासारखे

*

मना..पावला भिंगरी लाभली

बसू मी कसे आसना सारखे?

*

इथे सर्व ठायी लढाई…लढे

पडे स्वप्न तेही रणासारखे

*

सुखाला गुरू..मंत्र नाही जरी

नसे सूख रे वाचनासारखे

☆

© श्री राजकुमार दत्तात्रय कवठेकर

संपर्क : ओंकार अपार्टमेंट, डी बिल्डिंग, शनिवार पेठ, आशा  टाकिज जवळ, मिरज

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री वर्षा बालगोपाल

  कवितेचा उत्सव 

☆ प्रार्थनेचे फळ… ☆ सुश्री वर्षा बालगोपाल ☆

☆

वातावरण संस्कारिक , तिने वारसा जपला

बळीराजाच्या अस्तुरीने आज वड पुजीयेला ॥

*

महात्म्य वटपौर्णिमेचे आहे तिला सारे ज्ञात

बळीराजाचा प्राण ‘धरा’ ओतले काळीज त्यात

पूर्ण कर त्याच्या आशा मंत्र मनात प्रार्थियला

बळीराजाच्या अस्तुरीने आज वड पुजीयेला ॥

*

सवाष्णीचे मागणे असे देव कसा हो टाळेल

वरदहस्त कृपेचा मग तिच्या डोई ठेवेल

पूर्ण करण्या हेतू तिचे देव कामास लागला

बळीराजाच्या अस्तुरीने आज वड पुजीयेला ॥

*

पसरल्या पदरात दान श्रद्धेने मागितले

पतीसवे सकलांचे हित त्यात सामावले

मनोभावेची प्रार्थना देव नाराज न करी तिला

बळीराजाच्या अस्तुरीने आज वड पुजीयेला ॥

*

दैन्य जावो तिचे आणि सारे सौख्यात नांदावे

पदरात हेच दान तिच्या आता मी घालावे

नारायणीच्या ओंजळीतून खजिना मोत्यांचा सांडला

बळीराजाच्या अस्तुरीने आज वड पुजीयेला ॥

*

चार मास हा खजिना वेळोवेळी सांडणार

बळीराजाचे कष्ट सारे देवकृपे फळणार

देऊ त्याहून अधिक मिळवू हाच दाखला मिळाला

बळीराजाच्या अस्तुरीने आज वड पुजीयेला ॥

☆

© सुश्री वर्षा बालगोपाल

मो 9923400506

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈