Marathi Kavita
प्रा. भरत खैरकर
कवितेचा उत्सव
☆ “गवतपात्याचे हायकू…” ☆ प्रा. भरत खैरकर ☆
☆
दवाचा थेंब
गवतपात्यावर पडला
मधातुन चिरला….
*
सुर्याचे किरण
पात्यावर थांबले
लख्ख चकाकले!
*
लढवितो वारा
तृणांकुरावरी
इवलाल्या तलवारी…
*
एक फुलपाखरू
पात्यावर बसलं
हलकेच झुललं…
☆
© प्रा. भरत खैरकर
संपर्क – बी १/७, काकडे पार्क, तानाजी नगर, चिंचवड, पुणे ३३. मो. ९८८१६१५३२९
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सुश्री मंजुषा सुनीत मुळे
चित्रकाव्य
☆ “अगदी मनातले…” ☆ सुश्री मंजुषा सुनीत मुळे ☆
☆
खाली दगड असोत की वाळू असो
खत – पाणी असो नसो
मनापासून फुलणं मी विसरत नाही
मला कशानेच फरक पडत नाही…
*
रंग नाही रूप नाही
आकर्षित करणारा सुगंध नाही
आणि माझ्याकडे कुणी बघतंय की नाही
याने मला काहीच फरक पडत नाही…
*
बस् निसर्गाची कृपा आहे
किंचित प्राण माझ्यातही फुंकलेला आहे
हे माझ्यासाठी काही कमी नाही
मग फरक मला मुळी पडतच नाही…
*
इवलंसं माझं जग आहे
इवल्याशा डोळ्यांनी मला ते दिसतं आहे
मग मी कुणाला दिसो ना दिसो
मला मुळीच फरक पडत नाही…
*
आयुष्य म्हणजे मुठीतली वाळू
माणसाला कळतं पण वळत नाही
मी मात्र मजेत डोलतांनाही हे विसरत नाही
मग त्याने मला फरक काहीच पडत नाही…
*
मी आज आहे आणि उद्या नसणार आहे
हे त्रिकालाबाधित सत्य मी जाणलं आहे
पण म्हणून मी आजच कोमेजणार नाही
एकदा हे सत्य स्वीकारलं की…
मला ‘आज’ काहीच फरक पडत नाही…
☆
कवयित्री : सुश्री मंजुषा सुनीत मुळे
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सुश्री प्रभा सोनवणे
कवितेच्या प्रदेशात # 254
☆ त्या वाटेवर… ☆ सुश्री प्रभा सोनवणे ☆
☆
गतकाळाचा जन्म जिव्हाळा
आठवणींचा फक्त पाचोळा
त्या वाटेवर ……
हुंदडणारे मुग्ध बालपण
नात्यांची गहिरी गुंफण
त्या वाटेवर …….
खळखळणारा अवखळ ओढा
सोनपिवळ्या तरवडाची गर्दी
पाण्या मधली दाट लव्हाळी
इथेच होती एकेकाळी …….
पाहते आता ठक्क कोरडी
फुफाटलेली ओढ्याची जागा
त्या वाटेवर ……
बुजलेल्या ढव-याची खूण,
पाषाणाची जुनी शुष्क डोण
त्या वाटेवर …….
दगडी वाड्याच्या जागी आता
बोरी ,बाभळी आणि सराटा ,
परी वास्तुचे रक्षण करतो ,
भुजंग काळाचा निरंतर …..
त्या वाटेवर ………..
☆
© प्रभा सोनवणे
१४ नोव्हेंबर २०२४
संपर्क – “सोनवणे हाऊस”, ३४८ सोमवार
पेठ, पंधरा ऑगस्ट चौक, विश्वेश्वर बँकेसमोर, पुणे 411011
मोबाईल-९२७०७२९५०३, email- [email protected]
≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सौ विजया कैलास हिरेमठ
कवितेचा उत्सव
☆ “कवितेचे झाड….” ☆ सौ विजया कैलास हिरेमठ ☆
☆
मनास अंकुर फुटता
भावनांचा जन्म होई
शब्दातून मग कवितेस
फुटे नवी पालवी….
*
अनुभवांचे खतपाणी
संवेदनांचे सिंचन
विचारांची निगराणी
कल्पना वास्तवाचे मिलन…
*
कधी मोहर कधी पानगळ
कवितेचे झाड अवखळ
तिच्यासोबत मी कणखर
आणि जगणे सहज, सुंदर….
*
प्रेम आनंदाने बहरते
कवितेचे झाड माझे
मायेच्या सावलीत त्याच्या
ही शब्दकळी सुखावते….
☆
💞शब्दकळी विजया 💞
© सौ विजया कैलास हिरेमठ
पत्ता – संवादिनी ,सांगली
मोबा. – 95117 62351
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री अशोक श्रीपाद भांबुरे
अशोक भांबुरे जी यांची कविता अभिव्यक्ती # 266
☆ वैभवशाली नक्षी… ☆ श्री अशोक श्रीपाद भांबुरे ☆
☆
मोर पिसावर कुठून सुंदर आली नक्षी
मोर नाचतो दिसते नखरेवाली नक्षी
*
डोंगर माथी विशाल मंदिर कसे बांधले
छान वारसा येथे वैभवशाली नक्षी
*
ती ओठांना लावुन आली होती लाली
तिने काढली होती माझ्या गाली नक्षी
*
असेल अबला म्हणून त्याने छेड काढली
तिने काढली त्याच्या कानाखाली नक्षी
*
हातावरती हिरवी मेंदी तिने काढली
रातभरातच लाल कशीही झाली नक्षी
*
वेणी गजरा तिला आवडे सुगंध त्याचा
फुला फुलांची डोक्यावरती ल्याली नक्षी
*
अडव्या-तिडव्या फांद्यांचे तो रूप बदलतो
त्या झाडावर करतो तो वनमाली नक्षी
☆
© श्री अशोक श्रीपाद भांबुरे
धनकवडी, पुणे ४११ ०४३.
मो. ८१८००४२५०६, ९८२२८८२०२८
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्रीशैल चौगुले
कवितेचा उत्सव
☆ काव्यतथ्य… ☆ श्रीशैल चौगुले ☆
☆
तुझ्या नियतीच्या बंधनात
माझ्या शब्दअटकेचा गुन्हा
वारंवार अपराध घडो
जणू गोकूळी राधेचा कान्हा.
*
भाव मनातील घळचोरी
हृदयाचे दार खोले वेळ
उगीच हसून ती सुटका
बंदिशाळेत प्रेमाच्या गळ.
*
म्हणून का वचने घ्यावीत
प्रिया ओठात शब्दांचे सत्य
कवणात गातात भाकिते
भेट घडेल, रचिते तथ्य.
☆
© श्रीशैल चौगुले
मो. ९६७३०१२०९०.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सौ. वृंदा गंभीर
कवितेचा उत्सव
☆ भावना… ☆ सौ. वृंदा गंभीर ☆
☆
कंठात दाटून आल्या भावना
सखे जरा समजून घे ना
प्रिये झालो मी तुझा दास
तू तुझ्यात सामावून घे ना
*
होतो पळत रात्रं दिवस
वाट काही सापडेना
तुझी सावली दिसें परी
तुझा सहवास मज मिळेना
*
हरवलो मी स्वतःतून
तुझी आठवण सखे जाईना
का पळतेस अशी दूर तू
विरह हा मज सहवेना
*
शोधले मनाने तुला मी
प्राण हा तुलाच दिला
तुझा जीव ही मलाच दे ना
पुरे झाले आता, तुझाच
होऊ दे ना
☆
© सौ. वृंदा पंकज गंभीर (दत्तकन्या)
न-हे, पुणे. – मो न. 8799843148
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री आशिष बिवलकर
चित्रकाव्य
खंडोबाची वारी… श्री आशिष बिवलकर ☆
☆
चंपाषष्ठी आज | डोंगुर जेजुरी |
खंडोबाची वारी | भक्तीमय ||१||
*
मल्हारी मार्तंड | जय खंडेराया |
जेजुरी गडाया | येळकोट ||२||
*
सोन्याची जेजुरी | उधळी भंडारा |
वाजतो नगरा | मार्तंडाचा ||३||
*
हळद खोबरं | भारी उधळण |
पिवळं अंगण | खंडोबाचं ||४||
*
देव साधा भोळा | भरीत भाकर |
चव रुचकर | नैवेद्यासी ||५||
*वाघ्या मुरळीचा | खेळ जागरण |
गोंधळाचा सण | गडावरी ||६||
*
देवा खंडेराया | भरुनिया तळी |
पसरतो झोळी | कृपेसाठी ||७||
☆
© श्री आशिष बिवलकर
बदलापूर
मो 9518942105
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री तुकाराम दादा पाटील
कवितेचा उत्सव
☆ स्मरण… ☆ प्रा तुकाराम दादा पाटील ☆
☆
प्रेमात गुंतलेले मन भावनेत न्हाले
तेव्हाच लेखणीच्या ओठात शब्द आले
अलवार चिंतनाचे हळवे विचार सारे
सांगून टाकताना तन मोहरून गेले
*
हव्यास फक्त होता नव्हती कुठेच सत्ता
भलत्याच आठवानी जगणेच व्यापलेले
गुंत्यात गुंतताना जडल्या अनेक चिंता
उरलेत भास हाती स्वप्नात पाहिलेले
*
आशाळभूत जगणे शिणले कधीच नाही
तारूण्य सर्व अंती झगडून शांत झाले
लटके भविष्य होते फसवून खूप गेले
दिसले कधीच नाही आयुष्य चिंतलेले
*
निर्भिड वागण्याचा उतरून नूर गेला
चुकले अनेक रस्ते चकव्यात गुंतलेले
छळले गती मतीने फाजील धाडसाला
घेरून संकटांनी बेजार खूप केले
*
भोगून भोग सारे जगणे सुरूच आहे
आहे भविष्य त्यांचे काळास बांधलेले
झाले भले बुरे ते आहे घडून गेले
उरले तसेच आहे स्मरणात गोठलेले
☆
© प्रा. तुकाराम दादा पाटील
मुळचा पत्ता – मु.पो. भोसे ता.मिरज जि.सांगली
सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३
दुरध्वनी – ९०७५६३४८२४, ९८२२०१८५२६
≈ संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈
श्री राजकुमार दत्तात्रय कवठेकर
कवितेचा उत्सव
☆ प्रारब्ध… ☆ श्री राजकुमार कवठेकर ☆
☆
वैशाखाच्या फांदीवर
तुझे विषण्ण पाखरु
आतुरले मन माझे
आले वादळांनी भरु
*
वैशाखाच्या फांदीवर
मी ही, जशी तू नि: शब्द
अबोधच राहिलेले
दुःख.. दुर्दैव.. प्रारब्ध*
*
वैशाखाच्या फांदीवर
तुझी भेट अनाहूत
चैत्र ओसरुन माझा
झाली ग्रीष्मा सुरवात
☆
© श्री राजकुमार दत्तात्रय कवठेकर
कवी / गझलकार
संपर्क : ओंकार अपार्टमेंट, डी बिल्डिंग, शनिवार पेठ, आशा टाकिज जवळ, मिरज मो ९४२११०५८१३
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
