सुश्री नीलांबरी शिर्के
चित्रकाव्य
☆
इवली बकुळी
स्वतःही फुलते
गंधदान देते
पवनाशी
*
इवली बकुळी
फुलते झुलते
नाते जुळतेच
काळजाशी
*
इवली बकुळी
सुगंध केवढा
गंधीत जाहला
सारा घरगाडा
*
इवली बकुळी
पहाटे फुलती
गळून पडता
सुगंधीत माती
*
इवली बकुळी
कुपी अत्तराची
जपून स्मृतीत
ठेवायाची
☆
© सुश्री नीलांबरी शिर्के
श्री प्रमोद वामन वर्तक
चित्रकाव्य
🌹 चौसष्ट घरांचा सम्राट ! 🌹 श्री प्रमोद वामन वर्तक ☆
☆
गु णांची कदर होते नेहमी
आज ना उद्या जगात
माळ जग्गजेतेपदाची
पडे गुकेशच्या गळ्यात
*
के ला चमत्कार गुकेशने
झाले पूर्वसुरी अचंबित
बने चौसष्ट घरांचा राजा
आज जगी तरुण वयात
*
श ह काटशहाच्या खेळाचा
अनभिषिक्त सम्राट बनला
भारतभूच्या शिरावर त्याने
एक तुरा मानाचा खोवला
☆
© प्रमोद वामन वर्तक
संपर्क – दोस्ती इम्पिरिया, ग्रेशिया A 702, मानपाडा, ठाणे (प.) 400610
मो – 9892561086 ई-मेल – [email protected]
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री अनिल वामोरकर
चित्रकाव्य
जीवनगाणे… ☆ श्री अनिल वामोरकर ☆
☆
घ्यावी म्हणतो
आता थोडी विश्रांती
मी पुन्हा येईन बरं
नेहमीप्रमाणे प्रभाती…
*
नवजीवन देतो
अविरत,
नच कधी थकलो
कर्मयोगी म्हणोन
बक्षीसी न कधी पावलो…
*
किरणांनी माझ्या
दाह होतही असेल,
पण, सागराच्या पाण्याची वाफ
होईल तेव्हाच पाऊस बरसेल….
*
मीच मला पाहतो
बिंब माझे सागरात
विश्रांतीस्तव तुमच्या
नभांची चादर पांघरत..
*
गर्भित सूचक
माझे वागणे
येणे जाणे
हेचि जीवन गाणे…
☆
© श्री अनिल वामोरकर
अमरावती
≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित
श्री प्रमोद वामन वर्तक
चित्रकाव्य
🙏🌹 उ स्ता द ! 🌹🙏 श्री प्रमोद वामन वर्तक ☆
☆
बोलविता धनी तबल्याचा
आज मैफिलितूनी उठला
ऐकून ही दुःखद बातमी
रसिकांचा ठोका चुकला
*
केस कुरळे शिरावरती
बोलके डोळे जोडीला
सुहास्य गोड मुखावरचे
दिसत होते शोभून त्याला
*
मृदू मुलायम बोलण्याची
होती त्याची गोड शैली
जाता जाता करून विनोद
हळूच मारी कोणा टपली
*
आज झाला तबला मुका
तो होता अल्लाला प्यारा
करती कुर्निंसात दरबारी
येता उस्ताद त्यांच्या दारा
☆
© प्रमोद वामन वर्तक
संपर्क – दोस्ती इम्पिरिया, ग्रेशिया A 702, मानपाडा, ठाणे (प.) 400610
मो – 9892561086 ई-मेल – [email protected]
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री आशिष बिवलकर
चित्रकाव्य
आंतरराष्ट्रीय भ्रष्टाचार-विरोधी दिन… श्री आशिष बिवलकर ☆
☆
कर्तव्याचा लिलाव,
बिनधास्त चाले |
देण्याघेण्याचे काय
सर्रासच बोले |
*
वाळवी पोखरत,
जाते सर्व काही |
अंतरात्मा कुणाचा,
जिवंत न राही |
*
बुडापासून शेंड्यापर्यंत,
लागलीय ही कीड |
यंत्रणा झाली सर्व भ्रष्ट,
चेपलीय साऱ्यांची भीड |
*
पकडला जो जाई,
त्यास म्हणते जग चोर |
पण तो सही सलामत सुटे,
कायद्यातल्या पळवाटा थोर |
☆
© श्री आशिष बिवलकर
बदलापूर
मो 9518942105
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सुश्री नीलांबरी शिर्के
चित्रकाव्य
☆
निरक्षर तुज कसे म्हणावे
शब्द खजिना तुजपाशी
सरस्वतीचा हात शिरावर
चराचराशी संवाद साधशी …..
*
चुलीवरचा तवा सांगतो
तुजला जीवन तत्वज्ञान
सुगरणीचा खोपा बोलतो
तुला ग सामाजिक ते भान ……
*
कपाळ पडले उघडे पण
सृजनतेने शेतात कष्टता
सोने पिकवीत तू राबता
सहजतेने सुचल्या कविता ……
☆
© सुश्री नीलांबरी शिर्के
श्री प्रमोद वामन वर्तक
चित्रकाव्य
बगळे, कावळे आणि कडबोळे ! ☆ श्री प्रमोद वामन वर्तक ☆
☆
असते राजकारण गल्लीतले फारच वेगळे
तेच असते प्रत्येक हायकमांडचे कल्पनातीत निराळे – –
*
सारे नेते वावरती नेहमी चेहऱ्याचे करून ठोकळे
करून सवरून सदा राहती नामा निराळे – –
*
करू शकत नाही कार्यकर्ते नेत्यांसमोर मन त्यांचे मोकळे
मनांत शिरण्या नेत्यांच्या पहावे लागतात अनेक पावसाळे – –
*
कधी झेलावी लागती कार्यकर्त्यांना अपमानाची ढेकळे
अशा ठिकाणी टिकत नाहीत कोणी कार्यकर्ते दुबळे – –
*
उभे इथे पदोपदी एका पायावर ध्यानस्थ बगळे
कळत नाही कोण नेता कोणता खेळ खेळे – –
*
बोलण्यात असून चालत नाही मोकळे ढाकळे
नाहीतर वेळ नाही लागणार स्वप्नांचे होण्या खुळखुळे – –
*
पिंड खायला जागो-जागी टपले काळे गोरे कावळे
वाटे राजकारण्यांना निघाले जनतेच्या अकलेचे दिवाळे
शेवटी सत्तेवर येणार “यांचे” नाहीतर “त्यांचे” कडबोळे…
☆
© प्रमोद वामन वर्तक
संपर्क – दोस्ती इम्पिरिया, ग्रेशिया A 702, मानपाडा, ठाणे (प.) 400610
मो – 9892561086 ई-मेल – [email protected]
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री आशिष बिवलकर
चित्रकाव्य
– ज्ञानराजा – ☆ श्री आशिष बिवलकर ☆
☆
इंद्रायणी काठी ! विसावला ज्ञाना !
आत्मसमाधाना ! समाधिस्थ !!१!!
*
कृपाळू माऊली ! बुद्धीचा सागर !
मायेचे माहेर ! ज्ञानराजा !!२!!
*
कैसा चमत्कार ! रेड्या मुखी वेद!
गर्विष्ठांचा भेद ! वदवूनी !!३!!
*
बसुनी भावंडे ! चालवली भिंत !
चांगदेवा खंत ! पाहुनिया !!४!!
*
पाठीवरी मांडे ! मुक्ताई भाजती !
क्षुधा भागवती ! जठाराग्नी !!५!!
*
भावार्थ दीपिका ! या गीतेचा अर्थ !
ज्ञानी नाम सार्थ ! ज्ञानेश्वरी !!६!!
*
अमृताचा घडा ! एक एक ओवी !
स्व अनुभवावी ! वाचूनिया !!७!!
☆
(चित्र – साभार श्री आशिष बिवलकर)
© श्री आशिष बिवलकर
बदलापूर
मो 9518942105
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सुश्री नीलांबरी शिर्के
चित्रकाव्य
☆
कालचा सूर्य मावळता
तो आज नव्याने येतो
रोजचा दिवस आपणा
म्हणून वेगळा म्हणतो…..
*
रवि मावळतीला जाता
प्रहर रातीचा हळू येतो
साम्राज्य काळोखाचे तो
हलकेच पसरवून देतो…..
*
रातीला येणारा अंधार
दुसरी पहाट येईतो रहातो
रवि नव्या दिवसाचा येता
अंधार कालचा जातो…..
*
सुख रविसम येते जाते
आणि ….
अंधारासम मुक्कामाला
दु:ख वस्ती करून जाते…….
☆
© सुश्री नीलांबरी शिर्के
सुश्री वर्षा बालगोपाल
चित्रकाव्य
प्रेमकहाणी तरूवल्लींची सुश्री वर्षा बालगोपाल ☆
☆
अंतर दोन तरुवल्लीमधले
कसे कमी झाले नाहीच कळले
अंतर प्रेमरंगी रंगून गेले
शशीबिंब तयाचे साक्षी जाहले ||
*
भेट घडू लागली नित्य नेमाने
ओढ सारखीच लागली अंतरी
भेट कोणतीही नकोच म्हणती
सहवासानेच येते तरतरी ||
*
आणाभाका झाल्या सवे राहण्याच्या
संगत सुखस्वप्ने रंगविण्याच्या
आणा कोणीतरी योग जुळवूनी
अक्षता डोई लगेच पाडण्याच्या ||
*
पिता प्रेमरसाचा मधुर प्याला
जग आपल्यामध्येच स्थिरावले
पिता ढगाने जाणले सर्व काही
दोनाचे चार हात मनी घेतले ||
*
कर कन्यादान अंतर बोलले
शुभस्य शिघ्रम निर्णय जाहले
कर दिला करात हर्षभराने
दोन प्रेमींचे मिलन घडविले ||
*
सुधाकराने केली ही कानपिळी
साथ निभावण्या वचन घेतले
सुधाकर आधाराचाच भासला
तरुवल्लिंचे असे बंध जुळले ||
☆
© सुश्री वर्षा बालगोपाल
मो 9923400506
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
