कविराज विजय यशवंत सातपुते
कवितेचा उत्सव
☆ गुढीची आरती… ☆ कविराज विजय यशवंत सातपुते ☆
(स्वरचित आरती)
☆
ब्रम्हध्वजाच्या निजरूपाची गुढी देवता शुभंकरी
ओवाळू या सकल आरती मनोकामना करा पुरी. ||धृ||
*
आम्रपल्लवी तोरण दारी,सडा रांगोळी,पाट नवा
वेळू लांबसा,कलश सुपारी,हारफुलांचा थाट हवा
वर्षारंभी सण हा आला, मुहूर्त मंगल खरोखरी
ओवाळू या सकल आरती मनोकामना करा पुरी.||१||
*
चैत्र पालवी,सृजन संपदा, नवकुसुमांनी नटे धरा
माधुर्याची साखर गाठी, आरोग्य दायी निंब खरा
सौभाग्याचे हळदी कुंकू, कलश यशश्री हवा वरी
ओवाळू या सकल आरती मनोकामना करा पुरी.||२||
*
मांगल्याचा पुष्पहार तो संकल्प सिद्धीची गुढी दारी
सामर्थ्य दाखवी वेळू काठी, पहा साडी वैभव जरतारी
नैवेद्याची पहा खासियत, बासुंदी वा श्रीखंड पुरी
ओवाळू या सकल आरती मनोकामना करा पुरी.||३||
*
पंचांगाचे करूनी पुजन, आनंदाने सजवू तुला
साडेतीन मुहूर्तांपैकी, चैत्र मुहूर्ती झुले झुला
गुढी पाडवा सण सौख्याचा, फुटे पालवी तरूवरी
ओवाळू या सकल आरती मनोकामना करा पुरी.||४||
*
आकाशाचे पत्रक सांगे, पंचांगाचा अर्थ नवा
सुख शांती समाधान ते,आरोग्याचा हात हवा.
नको कशाची कमी आम्हाला, दान कृपेचे आम्हावरी
ओवाळू या सकल आरती मनोकामना करा पुरी.||५||
☆
© कविराज विजय यशवंत सातपुते
सहकारनगर नंबर दोन, दशभुजा गणपती रोड, पुणे. 411 009.
मोबाईल 8530234892/ 9371319798.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
कवितेचा उत्सव 
