Category: कवितेचा उत्सव 2

सौ. उज्वला सुहास सहस्रबुद्धे

 कवितेचा उत्सव 

☆ निसर्गाची उधळण… ☆ सुश्री उज्वला सुहास सहस्रबुद्धे ☆

☆

येईल अवचित हस्ताची सर,

नाचत नाचत अवनी वरती!

 थेंब थेंब तो फुटून येतो,

 उधळण करीत धरणी वरती !…१

*

ओले, हिरवे गवत डुलते,

रान फुले ही डोलत वरती!

अवघी अवनी फुलून येते,

नवचैतन्याने गाणी गाती !….२

*

निसर्ग साजरा मनास भुलवी,

फिरवी त्याची अत्तरदाणी!

गंधित ,रंगित रानफुलांची,

कुपी उधळते भवताल झणी!…३

*

कधी वाटते झुळूक बनावे,

‌हाती घेऊन गुलाब दाणी!

शिंपीत जावे गुलाब पाणी,

संध्या समयी वातावरणी!…४

*

कधी वाटते फुलपाखरू व्हावे,

उडत फुलावर रंगबिरंगी !

कधी वाटते भ्रमरच व्हावे,

मिटून जावे कमळाच्या अंगी!…५

*

मनात गुंजन होते कविच्या ,

निसर्ग किमया वर्णू किती!

सहस्र रुपे ओंजळ त्याची,

ओततो तोही या भू वरती !…६

☆

© सुश्री उज्वला सुहास सहस्रबुद्धे

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री शरद कुलकर्णी

 कवितेचा उत्सव 

☆ नेम नाही पावसाचा… ☆ श्री शरद कुलकर्णी ☆

☆

का शोधावे मी स्वप्नांना,

स्थित होती जी लोचनी.

आठवावे का पुन्हापुन्हा ,

आठवणी जपल्या मनी.

त्या फुलांचे काय झाले,

ओंजळीत जी मी घेतली.

लावला जीव, गुंतलो जिथे,

ती नातीही दुरावली.

कोसले मी कोसल्यांना,

समजावले समजाऊनी.

समजून घेतले स्वत:ला,

चंद्रबळ उसने घेउनी .

भरुन आले आकाश माझे,

कधीतरी तू समजून घे.

नेम नाही पावसाचा,

पाऊस माझा कोसळूदे.

☆

© श्री शरद  कुलकर्णी

मिरज

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ. ज्योती कुळकर्णी 

 कवितेचा उत्सव 

☆ सगुण विठ्ठल– – ☆ सौ. ज्योती कुळकर्णी ☆

☆

सावळा विठ्ठल,आहे हो निर्गुण

भक्तांसाठी आला, होऊन सगुण ।।ध्रु।।

*

सावळे रूप ते, आहे मनोहर

भक्तांना पावला, घाली अलंकार

मंजुळ नादाचे, सोन्याचे पैंजण

भक्तांसाठी आला ,होऊन सगुण

*

कनकाचा कद, विठोबा सजला

शोभली गळ्यात,मौक्तिकांची माला

माणिक मोत्यात,दिसे भक्तगण

भक्तांसाठी आला,होऊन सगुण

*

भक्तांनी अर्पिले, नाना अलंकार

भक्तांना भावले,भक्तिचे प्रकार

पावतो भक्तांना,सद्गुणाची खाण

भक्तांसाठी आला, होऊन सगुण

*

सावळा विठ्ठल आहे हो निर्गुण

भक्तांसाठीआला, होऊन सगुण ।।ध्रु।।

☆

© सौ. ज्योती कुळकर्णी

अकोला

मोबा. नं. ९८२२१०९६२४

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्रीशैल चौगुले

 कवितेचा उत्सव 

☆ आयुष्य… ☆ श्रीशैल चौगुले ☆

☆

निघून जातील घन

ढळत्या थेंबांची वर्षा

नाचती हरित धरा

हळव्या वायूचे स्पर्शा.

*

तिथे कुठेतरी मन

लपून अजून आहे

इंद्रधनू स्पंदनात

दुःखही सजून आहे.

*

म्हणून आवडे ऋतू

स्मृतीत स्वच्छंदी नभ

भिजरे सतत भाव

भुमीस सुखाचा लोभ.

*

किमया निसर्ग माया

कळीचे पाकळी फूल

उमले आयुष्य नवे

जन्माची गतीक भूल.

☆

© श्रीशैल चौगुले

श्री प्रमोद वामन वर्तक

 कवितेचा उत्सव  

🙏 जरी वाजले सूप 🙏 श्री प्रमोद वामन वर्तक  

   आली म्हणता म्हणता

येवून सरली दिवाळी,

ठेवा भरून डब्यात

आता शिल्लक रांगोळी !

*

चिवडा चकली शेवेचा

उरला असेल जर चुरा,

करून रविवारी मिसळ

त्याचा तुम्ही वापर करा !

*

ताट लक्ष्मी पूजनाचे

ठेवा नीट सांभाळून,

पुढच्या वर्षी दुप्पट

भर घालायची ठरवून !

*

धुरात पुन्हा फटाक्याच्या

कधी पैसे टाकू नका,

अनाथांना दान देण्याचे

मनाशी ठरवून टाका !

*

जरी संपला हा दीपोत्सव

तेवत ठेवा स्वप्नांचे दीप,

निर्धार करुनी स्वप्नपूर्तीचा

मान मिळवा जगी खूप !

मान मिळवा जगी खूप !

© श्री प्रमोद वामन वर्तक

संपर्क – दोस्ती इम्पिरिया, ग्रेशिया A 702, मानपाडा, ठाणे (प.) – 400610 

मो – 9892561086 ई-मेल – [email protected]

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री आशिष  बिवलकर

  चित्रकाव्य  

– काय पावसा…–  ☆ श्री आशिष  बिवलकर ☆

☆

काय पावसा,

मुक्काम वाढवलास तू.

दसऱ्याला सीमोल्लंघन करता करता,

दिवाळीसाठी थांबलास तू.

काय पावसा, 

शेतात पिकवलं होतंस तू.

तोंडात घास देता देता,

असं कसं हिसकावलंस तू.

काय पावसा,

तहान भागवलीस तू.

धरण भरता भरता,

काठ वाहून नेलास तू.

काय पावसा,

छान बरसला होतास तू.

पाय काढता काढता, 

थयथयाट केलास तू.

काय पावसा,

सारं हिरवंगार केलंस तू.

पण.. उन्मत्त होऊन कोसळता कोसळता,

डोळ्यात पाणी आणलेस तू. 

☆

© श्री आशिष  बिवलकर

बदलापूर

मो 9518942105

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ. वृंदा गंभीर

कवितेचा उत्सव

☆ माहेराची ओढ…  ☆ सौ. वृंदा गंभीर ☆

☆

किती लागली जीवाला ओढ

संसारातून सापडेना कधी वाट

माहेरची जाईना आठवण मनातून

अवघड आहे हा संसाराचा घाट

*

दीपावली ला जावे आईस भेटावे

भाऊबीज करून माघारी फिरावे

आठवणीने वाहे पाणी डोळ्यातून

वेड्या मनाला सांगा कसे सावरावे

*

नको काही भाऊराया फक्त प्रेम

तुझी चटणी भाकरी लागते गोड

माहेरा वाचून नाही उरला राम

भावाबहिणीचे काही सुटेना हे कोडं

*

सुखी आहे सासरी यावे माहेरी

क्षणाचा तो आनंद बळ देई संसारी

एकच आहे अपेक्षा प्रेम कमी नको

वर्षातून एकदा जागा हवी माहेरी

☆

© सौ. वृंदा पंकज गंभीर (दत्तकन्या)

न-हे, पुणे. – मो न. 8799843148

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈