Marathi Kavita
श्री अनिल वामोरकर
कवितेचा उत्सव
☆ घडो ऐसे… ☆ श्री अनिल वामोरकर ☆
☆
विग्रहा समोर
बसता डोळे मिटून
येते अबोल उत्तर
तिच्या हृदयातून…
न लगे शब्द
नच स्पर्श वा खूण
मौनात मी, मौनात ती
संवाद तरी मौनातून…
न मागणे न देणे
व्यवहार नाहीच मुळी
मी तू गेले लया
जन्मलो तुझिया कुळी..
सुटली येरझार
चक्रव्यूही भेदला
आई तूझ्या कृपे
सार्थक जन्म झाला…
☆
© श्री अनिल वामोरकर
अमरावती
≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित ≈
कविराज विजय यशवंत सातपुते
कवितेचा उत्सव # 239 – विजय साहित्य
☆ संस्कार सावली… ☆
(काव्यप्रकार अष्टाक्षरी.)
☆
अनाथांची माय
करुणा सागर
आहे भोवताली
स्मृतींचा वावर…! १
*
ममतेची माय
आदर्शाची वाट
सुख दुःख तिच्या
जीवनाचा घाट..! २
*
परखड बोली
मायेची पाखर
आधाराचा हात
देतसे भाकर…! ३
*
जगूनीया दावी
एक एक क्षण
संकटाला मात
झिजविले तन…! ४
*
पोरकी जाहली
माय ही लेखणी
आठवात जागी
मूर्त तू देखणी…! ५
*
दु:ख पचवीत
झालीस तू माय
संस्कार सावली
शब्द दुजा नाय..! ६
☆
© कविराज विजय यशवंत सातपुते
सहकारनगर नंबर दोन, दशभुजा गणपती रोड, पुणे. 411 009.
मोबाईल 8530234892/ 9371319798.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सौ. ज्योती कुळकर्णी
कवितेचा उत्सव
☆ खरे-खोटे…☆ सौ. ज्योती कुळकर्णी ☆
☆
माझ्या सभोवताली स्वार्थांध लोक जमले
त्यांना पुरून उरण्या जगणे तसेच शिकले
*
परके कधी न माझे का त्यास दोष देऊ
अपुलेच शत्रू झाले त्यांनी मलाच लुटले
*
जो दुर्जनास आधी वंदेल तो शहाणा
ही रीत ज्यास कळली जीवन तयास कळले
*
ज्यांच्या घरात आहे साम्राज्य मंथरेचे
तुटतील खांब तिथले पक्के खरेच असले
*
नाना कळा मनी पण दिसतो वरून भोळा
त्याने दिले जरीही खोटेच शब्द खपले
☆
© सौ. ज्योती कुळकर्णी
अकोला
मोबा. नं. ९८२२१०९६२४
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री आशिष बिवलकर
चित्रकाव्य
राजमाता जिजाऊ… श्री आशिष बिवलकर ☆
☆
स्वराज्याची जननी,
राजमाता जिजाऊ!
थोरवी त्यांची आज,
सारे मिळून गाऊ!
*
जाधवांची होती कन्या,
शुर आणि कणखर!
भोसल्यांची झाली सून,
कर्तव्यात होती तत्पर!
*
तीनशे वर्षाची होती,
काळीकुट्ट अमावस्या!
माय भवनीला साकडे
घातले, केली तपस्या!
*
पराक्रमी पुत्र शिवाजी,
येई जन्माला पोटी!
स्वराज्याचे बाळकडू
पाजले त्याच्या ओठी!
*
तावून सलखून केले,
संस्कार शिवबावर!
सोळाव्या वर्षी केला,
तोरणा किल्ला सर !
*
एक एक मावळ्यावर,
केली त्यांनी माया!
पाठीशी उभे ते राहिले,
बळ दिले शिवराया!
*
तीन तपे देव मस्तकी,
धरून केला हलकल्लोळ!
साऱ्या मुघलांनी घाबरून,
काढला स्वराज्यातून पळ!
*
स्वराज्याची गुढी उभारली,
हिंदवी स्वराज्य स्थापन केले!
दहा दिशातून अरुणोदय झाला,
छत्रपती शिवाजी महाराज झाले!
*
धन्य ते शिवाजी महाराज,
धन्य राजमाता जिजामाता!
त्यांच्या मुळेच हिंदुस्थानात,
हिंदूधर्म अभिमानाने पहाता!
☆
© श्री आशिष बिवलकर
बदलापूर
मो 9518942105
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री प्रमोद वामन वर्तक
कवितेचा उत्सव
🤣🚶🏻♀️आ रं भ शू र ! 🚶🤣 
श्री प्रमो वामन वर्तक
☆
दिसले सकाळी मजला
चेहरे नवीन फिरतांना,
पाहून उत्साह वाटला
मज ते सारे बघतांना !
*
अजून थोडे दिवस तरी
त्यातले काही दिसतील,
जसं जसे दिवस जातील
थोडेतरी गायब होतील !
*
एक तारीख नववर्षाची
करती चालण्याचा संकल्प,
पण भर सरता उत्साहाचा
होतो आळसाचा प्रकोप !
*
‘उद्या नक्की’चा वायदा
करून आपल्या मनाशी,
आरंभशूर करती सलगी
मऊ ऊबदार गादीशी !
मऊ ऊबदार गादीशी !
☆
© श्री प्रमोद वामन वर्तक
०१-०१-२०२५
संपर्क – दोस्ती इम्पिरिया, ग्रेशिया A 702, मानपाडा, ठाणे (प.) – 400610
मो – 9892561086 ई-मेल – [email protected]
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री सुहास सोहोनी
चित्रकाव्य
– स्थितप्रज्ञ – ☆ श्री सुहास सोहोनी ☆
☆
वर्षे सरली, युगे उलटली,
काळ किती लोटला
स्थितप्रज्ञ मी अविचल अविरत
शिलाखंड एकला
सजीव प्राणी पक्षी त्यांसी
स्वर्ग, नरक अन् मोक्ष
निर्जीवांसी गति न कोणती
केवळ अस्तित्व
घडले नाही कधीच काही
उबूनि गेला जीव
अंतर्यामी आंस उठे परि
जिवास भेटो शिव
शिल्पकार कुणि दैवी यावा
व्हावी इच्छापूर्ती
अंगांगातुन अन् प्रकटावी
सुबक सांवळी मूर्ती
मोक्ष हाच अन् हीच सद्गती
निर्जीवाचे स्वत्व
छिन्नीचे घन घाव सोसुनी
लाभतसे देवत्व…
☆
© श्री सुहास सोहोनी
रत्नागिरी
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सुश्री प्रभा सोनवणे
कवितेच्या प्रदेशात # 256
☆ तिळगुळ… ☆ सुश्री प्रभा सोनवणे ☆
☆
संक्रातीच्या गोड दिवसाच्या ,
अनेक आहेत आठवणी,
हेडसरांच्या घरी,
मिळायची मोठ्ठी तिळवडी!
आईच्या चंद्रकळेवर,
चांदण्याची खडी ,
संक्रातीचा दिवस खूपच छान,
लहानपणी नव्हतंच कसलं भान !
आत्ताच आला ,
बालमैत्रीणीचा फोन,
“तिळगुळ घे गोड बोल”
म्हटलं, “तिळगुळ घे गोड बोल”!
“ओवसून आलीस का ?”
म्हटलं , “नाही गं , तसलं काही नाही करत !”
पूर्वी हे सर्व केलंय रूढी परंपरेनं,
अंतर्मुख झाले तिच्या फोन नं !
पारंपरिक जगणं,
सोडून माणूस म्हणून,
जगण्याचा ध्यास घेतला —
तेव्हापासूनच आयुष्य,
मुक्त होत गेलेलं!
जगण्याचे दोन प्रवाह,
समांतर!!
बदललं आयुष्य पण—
तिळ आणि गुळ तोच —
जीवनाची गोडी वाढवीत,
दरवर्षीच तो संदेश देणारा–
तिळगुळ घ्या गोड बोला
☆
© प्रभा सोनवणे
संपर्क – “सोनवणे हाऊस”, ३४८ सोमवार
पेठ, पंधरा ऑगस्ट चौक, विश्वेश्वर बँकेसमोर, पुणे 411011
मोबाईल-९२७०७२९५०३, email- [email protected]
≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सौ.उज्वला सुहास सहस्त्रबुद्धे
कवितेचा उत्सव
☆ सण संक्रांतीचा… ☆ सौ.उज्वला सुहास सहस्त्रबुद्धे ☆
☆
सण संक्रांतीचा येता,
सुगीचा हा काळ आला!
निसर्गाच्या लयलुटीचा,
बहर सर्वत्र पसरला !… १
*
निरभ्र आकाशात जमला,
रंगीत पतंगांचा मेळा!
आनंद त्याचा लुटण्याला,
सान – थोर झाले गोळा!… २
*
तिळगुळ आणि हलव्याचा,
सुगंध मनी दरवळला!
थंडीत शेकोटीचा आनंद,
जमले सगळे लुटण्याला!… ३
*
जात, धर्म, पंथ सगळे,
विसरून जाती आनंदात!
एकमेकाप्रती सौहार्दाचा,
तिळगुळ देऊन सौख्य लुटत!… ४
*
होता सूर्याचे संक्रमण,
दिवस होई मोठा मोठा!
ऋतुचक्राच्या संगतीत,
लुटु या आनंदाचा साठा!… ५
☆
© सौ. उज्वला सुहास सहस्रबुद्धे
श्रीशैल चौगुले
कवितेचा उत्सव
☆ हिंदमाता- हिंदपुत्र… ☆ श्रीशैल चौगुले ☆
(राजमाता जिजाऊ व स्वामी विवेकानंद यांचे जयंती थोरवीस)
☆
एक ज्ञानयोगी एक राजमाता
थोर शौर्यगाथा जिजा नरेंद्र.
*
दोन्ही सुसंस्कारे हिंदवी धर्माशी
सज्ञाने कर्माशी अहंः विनाशा.
*
भुमी उपासना देशास अखंड
गुलामीस बंड विचार निती.
*
विवेक शिवबा जन्मा प्रजारक्षे
स्वरुप प्रत्यक्षे दुष्टासंहार.
*
माऊली जिजाऊ नरेंद्र ज्ञानेश
भारता संदेश हिंदवी गाथा.
*
वंदावे प्रार्थना मुर्तींचे चरण
असावे स्मरण सुस्वराज्याशी.
☆
© श्रीशैल चौगुले
मो. ९६७३०१२०९०.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री तुकाराम दादा पाटील
कवितेचा उत्सव
☆ भिडू… ☆ प्रा तुकाराम दादा पाटील ☆
☆
जोमात फार आहे बाजार भामट्यांचा
सौदे करून खोटे आयुष्य लाटण्याचा
*
कोणी तरी म्हणाले वाटा चुकू नका रे
चकवा बसेल बरका गोत्यात गुंतण्याचा
*
अंधार सांडणारी काळोख रात आहे
होईल खेळ चालू चंद्रास झाकण्याचा
*
दाटून मळभ आले वारा सुसाट झाला
अंदाज आज आहे आभाळ फाटण्याचा
*
स्वप्ने विकावयाला आल्या अनेक टोळ्या
त्यांचा विचार नाही जनता सुधारण्याचा
*
स्वातंत्र्य भोगण्याचे अधिकार द्या जरासे
हळवा पुकार आहे भाऊक चांदण्यांचा
*
सामान्य माणसेही होवून दंग गेली
ऐकून रोज खोटा वर्षाव देणग्यांचा
*
डोळे मिटून बोका खातोय दूध लोणी
शोधू उपाय त्याला जाळ्यात बांधण्याचा
*
एकी करून आता साधेच डाव खेळू
खोट्या भिडूस येथे शोधून काढण्याचा
☆
© प्रा. तुकाराम दादा पाटील
मुळचा पत्ता – मु.पो. भोसे ता.मिरज जि.सांगली
सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३
दुरध्वनी – ९०७५६३४८२४, ९८२२०१८५२६
≈ संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈
