Category: कवितेचा उत्सव 2

प्रा. सौ. सुमती पवार

 कवितेचा उत्सव 

☆ निखळला तारा… ☆ प्रा. सौ. सुमती पवार ☆

☆

निखळला तारा अद्भूत एक

जयाची गगनावेरी झेप..

 निखळला….

 

अस्सल होती प्रीत तयाची

सेवा करी भारतमातेची

नीतिही होती त्याची नेक…

 निखळला….

 

आदर्शाचा महान मेरू

उभा ठाकला जणू कल्पतरू

उद्धरूनी गेले ते कित्येक..

 निखळला…

 

माणुसकीचा खराच पाझर

कल्पतरू तो होता सागर

चालला, वापरून विवेक…

 निखळला….

 

जन्म घेई बा पुन्हा एकदा

तू होता तर नव्हत्या आपदा

देशिल… पुन्हा का तू संकेत…

 निखळला….

☆

© प्रा.सौ.सुमती पवार 

 दि: १० ॲाक्टोबर २०२४

नाशिक

(९७६३६०५६४२)

[email protected]

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री दीप्ती कुलकर्णी

 कवितेचा उत्सव 

☆ अभिजात भाषा-मराठी… ☆ सुश्री दीप्ती कुलकर्णी ☆

☆

आज भाषा मराठी ठरे अभिजात 

लाभे सन्मान तिला अखिल विश्वात

गीतेचे सार थोर घुमतसे जगता|त

होतसे मराठी अभिमानास पात्र ||१||

*
ज्ञानदेवे रचिलासे पाया

तुकयाने केला कळस

मराठीचा तो नामघोष

कळू दे आता जगास ||२||

*
सारस्वत थोर-थोर

वर्णिती तिची गाथा

नतमस्तक. मी होते

मराठीचे गुण गाता ||३||

*
मराठीचा परिमल दरवळे

शब्दफुले लेती लेणे

साहित्याची मांदियाळी 

शब्दातुनी गाती गाणे ||४||

*

मराठीचे गुण महान

गाती मुखे थोर-सान

अमृताते पैजा जिंके

मराठीची अशी शान ||५||

☆

© सुश्री दीप्ती कोदंड कुलकर्णी

कोल्हापूर 

भ्र.९५५२४४८४६१

≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री अपर्णा परांजपे

 कवितेचा उत्सव 

☆  कृतार्थ मी अन् कृतार्थ तूही…. ☆ सुश्री अपर्णा परांजपे ☆

☆

तो माझा अन् मी त्याची दुग्धशर्करा योगच हा 

मनी वसे ते स्वप्नी दिसे भगवंताचा खेळच हा…

*

“सोहम् सोहम्” शिकवून मजला धाडियले या जगतात 

“कोहम् कोहम्” म्हणोनी अडलो उगाच मायापाशात..

*
अंतर्चक्षू प्रदान करुनी रूप दाविले हृदयात 

कमलपत्र निर्लेप जसे नांदत असते तीर्थात..

*

सुखदुःखाची जाणीव हरली, ईश्वर चरणी भाव जसा

तसेच भेटे रुप तयाचे, गजेंद्राशी विष्णू तसा…

*
महाजन, साधूळ संत सज्जन काय वेगळे असे तिथे?

प्रेमाची पूर्तता व्हावी, हे ध्येय निश्चित तिथे…

*
“ममैवांशो जीवलोके जीवभूतः सनातनः”।

वचन तुझे रे अनुभव घ्यावा, हीच आस रे तुझी पहा…

*
निजानंदी रंगलो मी तव हृदयाशी भेटता 

आतच होता, आहे, असशी 

जाणीव याची तू देता…

*
कृतार्थ मी अन् कृतार्थ तूही 

जन्माचा या अर्थ खरा

आनंदाचा कंद खरा तू 

(मम)हृदयाचा आराम खरा…

*
कृष्ण सखा तू, रामसखा तू प्रेमाचा अवतार सख्या 

अयोनिसंभव बीज अंकुरे 

सात्विक, शुध्द हृदयी सख्या..

*
प्रशांत निद्रा प्रशांत जीवन देहात पावले मज नाथा

प्राणांवर अधिराज्य तुझे रे

केशव देतो (जसा)प्रिय पार्था…

*

आदिशक्ती अंबाबाई शक्तिरुपाने वसे इथे

त्याच शक्तीने जाणीव होते भगवंत असे जेथे…

☆ 

🌹 भगवंत हृदयस्थ आहे 🌹

© सुश्री अपर्णा परांजपे

कात्रज, पुणे

मो. 9503045495

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री नीलांबरी शिर्के

श्री तुकाराम दादा पाटील

 कवितेचा उत्सव 

☆ माय मराठी… ☆ प्रा तुकाराम दादा पाटील ☆

☆

माय मराठी तुला हवा तो मान मिळाला 

सरस्वतीने तुझ्या मस्तकी टिळा लावला

*

परंपरागत मराठमोळा 

साज तुझा तर खराच होता

महाराष्ट्रातील किती पिढ्यांनी 

तुझा गिरवला आहे कित्ता 

ऐश्वर्याला तुझ्या खुलवण्या 

इथे नांदल्या अनेक सत्ता

तुझ्या लाडक्या सहवासाने

समाज येथे सुखी नांदला………

*

जुन्या पुराण्या लोककलाना

सामर्थ्याने तूच जगवले

संतांनी तर भक्ती करण्या

मनोबलाने तुला निवडले

अमृतवाणी तुझी ऐकता

देवमुखातून तेज प्रगटले

तुझेच त्याना रूप भावले 

कधीच नाही मार्ग बदलला…….

*

अविट गोडी तुझ्या लाघवी 

रचने मधली

लळा जिव्हाळा माया ममता

यानी आहे तेजस झाली 

समृद्धीच्या वाटेवरती 

गती मतीने पुढे चालली

आता नाही चिंतित काही

वैभव आले तुझ्या रूपाला……..

*

कर्तृत्वाचा तुझा दाखला

सर्व जगाला माहीत झाला

तुझ्यामुळे जीवदान मिळाले

इतिहासाला 

तुझ्या कीर्तीचा भगवा झेंडा

नित्य फडकला

राज्य हिंदवी स्थापायाचे 

तेज लाभले तलवारीला………

*

आता नाही चिंता काही

प्रगती पथावर दौडायाची

आस लागली असे आम्हाला

शिखरावरती पोहचायाची

करू तयारी जबाबदारी 

पूर्णपणाने पेलायाची

मानमरातब देऊ मिळवून

 सदैव सुंदर महाराष्ट्राला………

☆

© प्रा. तुकाराम दादा पाटील

मुळचा पत्ता  –  मु.पो. भोसे  ता.मिरज  जि.सांगली

सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३

दुरध्वनी – ९०७५६३४८२४, ९८२२०१८५२६

≈ संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈

सुश्री अमिता कर्णिक-पाटणकर

 कवितेचा उत्सव 

☆ प्रार्थना… ☆ सुश्री अमिता कर्णिक-पाटणकर ☆

☆

हे जगदीश्वरी हे जगदंबे जननी तू जन्मदा 

लीन होउनी पदकमलांशी वंदिन तुज शतदा ।

नकोच मजला धनसंपत्ती नको रूपसंपदा 

हृदयी माझ्या वास तुझा गे जागृत राहो सदा ॥

*

तुझ्यासंगती जगकल्याणा व्हावे उमा शिवानी

निर्दाळावे दुष्ट होउनी महिषासुरमर्दिनी 

हरण्या दुःखे दीनांची मी असावे कामदा 

हृदयी माझ्या वास तुझा गे जागृत राहो सदा ॥

*

कधी अन्नपूर्णेच्या रूपें भुकेजल्या घरी धान्य भरावे 

अन्यायी जन समोर येता उग्र चंडिका काली व्हावे 

ज्ञानदीप उजळावे जगती होउनिया शारदा 

हृदयी माझ्या वास तुझा गे जागृत राहो सदा ॥

*

तुझ्या निवासें आदिशक्ति गे जीवन माझे सार्थ ठरावे 

धूपकांडीसम जळता जळता विश्व सुगंधित करून जावे 

अंती मोक्ष दे मोक्षदे मला पुरव कोड एकदा 

हृदयी माझ्या वास तुझा गे जागृत राहो सदा ॥

☆

© सुश्री अमिता कर्णिक-पाटणकर

मुंबई

ईमेल – [email protected] मोबाइल – ९९२०४३३२८४

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री त्रिशला शहा

 कवितेचा उत्सव 

☆ सालंकृत मराठी… ☆ सुश्री त्रिशला शहा ☆

☆

काय सांगू सखे बाई

माझ्या मराठीची गोडी

ज्ञानेश्वर, तुकयानी

रचली अभंगवाणी

*

किती कविराजांनी

तिची गोडी चाखविली

साहित्यिकांनी किती लिहिली

कथा, चरित्र, कादंबरी

*

लोकसाहित्यातून जपला

महाराष्ट्राचा वारसा

भूपाळी ते भैरवीतून

सारा आसमंत निनादला

*

पोवाड्यातून उसळे रक्त

मराठ्यांच्या धमनीतून

शिवाजीचे आम्ही वंशज

मिरवितो स्वाभिमान

*

अशी आमची मायमराठी

साऱ्या जगात गाजते ही

काना, मात्रा, वेलांटीचे साज

लेऊन जशी झाली सालंकृत

☆

© सुश्री त्रिशला शहा

मिरज

 ≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री प्रमोद वामन वर्तक

 कवितेचा उत्सव  

☆ र त न   टा टा !☆ श्री प्रमोद वामन वर्तक ☆

☆

रत्ने अनमोल जन्मा येती 

सटीसामाशी भारतात,

घर करुनी लोकां ह्रदयी 

मग विलीन होती अनंतात !

*

तन मन धनाने अर्पिती 

जनसेवेस आपले जीवन,

काढून देशोदेशी नवउद्योग 

वाढविती भारताची शान !

*

नत मस्तक होऊन आपण 

वाहू श्रद्धांजली महापुरुषाला,

आधुनिक उद्योग धंद्याचा 

ज्याने भारतात पाया रचला !

*

टाटा नाममुद्रा उद्योगांवरची 

ठरली जणू मुद्रा सचोटीची,

पाऊल ठेवून त्या पावलावर 

पराकाष्ठा करूया प्रयत्नांची !

*

टाटा कॅन्सर हॉस्पिटलचे 

चाले संशोधन या रोगावर,

सतत करूनी रोग्यांची सेवा 

नाव टाटांचे केले अजरामर !

☆

सुश्री नीलांबरी शिर्के

श्री प्रमोद जोशी

 कवितेचा उत्सव 

☆ गेला कायमचा वाली  श्री प्रमोद जोशी ☆

☆

दिवा लावताना फडफडला,

पाल मनाशी चुकचुकली!

गहिवर आला गळ्यात दाटुन,

खिन्न मान खाली झुकली!

*

दिवस फुलांचा होता नकळत,

रात्रीला खुपला काटा!

कधीच नव्हते ऐकायाचे,

की अपुले गेले टाटा!

*

आलेल्याला जाणे आहे,

नकळे कोणा द्यावे दूषण!

एक हुंदका कानी आला,

धाय मोकलुन पद्मविभुषण!

*

सर्व वहाने धावत असता,

खिळून गेली जागी अचानक!

अंदाजाला नाही कल्पना,

तर्काहूनही घडे भयानक!

*

भेट कोठली,दिसता फोटो,

मान झुकायाची खाली!

सैनिक आणि सामान्यांचा,

गेला कायमचा वाली!

*
पुजेएवढा पवित्र धंदा,

देशावरती निरलस माया!

चुकायचा हृदयाचा ठोका,

बघुनी अडखळताना काया!

*

मंथनाविना भारतात या,

रत्न पंधरावे आलेले!

शून्य असो वा असो अनंत,

टाटा सर्वांचे झालेले!

*

आज स्वतःहून राष्ट्रध्वजाला,

खाली यावेसे वाटेल!

देहादेहा स्वआसवानी

चिंब भिजावेसे वाटेल!

*

वैभवाप्रति येते जाता,

सचोटीसवे करूनी दान!

तेहेतीस कोटी उभे राहीले,

स्वर्गामध्ये द्याया मान!

☆

© श्री प्रमोद जोशी

देवगड. 9423513604

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈