Category: कवितेचा उत्सव 2

श्रीमती रंजना मधुकरराव लसणे 

 कवितेचा उत्सव 

☆ रंजना जी यांचे साहित्य # 128 – नको साजणी तू ☆

नको साजणी तू ।अशी दूर आता।

मनी आसवांचा । नको पूर आता।

 

तुझा छंद माझ्या। जिवाला जडे हा।

तुझ्या दर्शनाने । टळे धूर आता।

 

अशा शांत वेळी । नको हा दुरावा।

तुझा हात हाती ।असे नूर आता।

 

किती भाव नेत्री। तुझ्या दाटलेले।

इशारा कशाला । जुळे सूर आता।

 

तुझा स्पर्श भासे जणू चांदण्याचा।

उगी लाजण्याने। अशी चूर आता।

 

©  रंजना मधुकर लसणे

आखाडा बाळापूर, जिल्हा हिंगोली

9960128105

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

कविराज विजय यशवंत सातपुते

कवितेचा उत्सव # 150 – विजय साहित्य

☆ संवाद… ! ☆ कविराज विजय यशवंत सातपुते ☆

आज पाहिल

टेबलावरचा बहिणीचा फोटो

जरा जास्तच हसत होता.

तेरा वर्षापासून भाऊबीजेला

याच फोटोशी संवाद व्हायचा.

भावा बहिणीचं नातं

जणू दिवस रात्रीच चक्र

एकमेकांना भेटतात

उदयाला किंवा अस्ताला

एरवी प्रवास चालूच असतो.

भाऊ बहिणीची वाट पहात असतो

माहेरच्या मनमंदिरात

भावाचाच मान असतो.

आई नंतर ताई ,बाबांनतर दादा

नात्याच्या शब्दावलीत नाजुकसा धागा.

छायाचित्र बोलके पुन्हा पुन्हा सांगते.

सुखाच्या आठवात परलोकी नांदते.

कसा आहेस दादा..? फूल हळूच टपकते

नात्यातली ऊब तेव्हा नकळत दरवळते.

हीच खरी दिवाळी अंतरात पाझरते ..!

© कविराज विजय यशवंत सातपुते

श्री सुजित कदम

 कवितेचा उत्सव 

☆ सुजित साहित्य # 135 ☆ संत सोपान देव … ☆ श्री सुजित कदम ☆

 

ज्ञाना निवृत्ती सोपान

आणि मुक्ताई धाकली

चार वेद अध्यात्माचे

जणू एकात्म आवली…! १

 

सुसंस्कृत जीवनाचा

ठरे सोपान वारसा

अध्यात्मिक उन्नतीचा

संत सोपान आरसा…! २

 

ग्रंथ सोपान देवीत

केल्या अभंग रचना

उरी अपार करूणा

विश्व शांती  संकल्पना…! ३

 

तीर्थाटन माधुकरी

भटकंती समाजात

केली मलिनता दूर

भक्तीभाव अभंगात…! ४

 

ज्ञानगंगा सोपानाची

ठेवा अक्षय अभंग

काळजाला काळजाने

भेटवीला पांडुरंग…! ५

 

पांडुरंग चरणांची

हवी अंतराला ओढ

एका एका अभंगाला

लाभे हरिनाम जोड…! ६

 

भक्तीमय भावनांनी

दिली अलौकिक ठेव

संत सोपान देवाची

सांप्रदायी देवघेव…! ७

 

स्वर्गलोक शब्दांकन

पंढरीचा थाट माट

अभंगात वर्णियेला

प्रपंचाचा हरी घाट…! ८

 

दिला जीवन विचार

अंतर्मुख झाले जन

सोपानाच्या अभंगात

लीन झाले तन मन…! ९

 

समाधिस्थ ज्ञानदेव

गेला जीवन आधार

हरी रूप झाला देह

पंचतत्व उपचार…! १०

 

मार्गशीर्ष वद्य पक्षी

संपविला अवतार

संत सोपान समाधी

सासवडी अंगीकार…! ११

©  सुजित कदम

संपर्क – 117, विठ्ठलवाडी जकात नाका, सिंहगढ़   रोड,पुणे 30

मो. 7276282626

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री तुकाराम दादा पाटील

 कवितेचा उत्सव 

☆ संध्याकाळी… ☆  प्रा तुकाराम दादा पाटील ☆ 

आयुष्याच्या गडद सावल्या लांबत गेल्या संध्याकाळी

आठवणींच्या तळ्यात सगळ्या मिसळत गेल्या संध्याकाळी

 

स्वप्नामधल्या ठोस प्रतिमा आदर्शाच्या मनात होत्या

 काळासोबत फिरता फिरता वितळत गेल्या संध्याकाळी

 

सहजपणाने जगतानाही संघर्षाला भिडणे झाले

चालत असता अवघड वाटा चकवत गेल्या संध्याकाळी

 

अनंतकोटी ब्रम्हांडाची ओळख पुरती झाली नाही

जगण्यामधल्या मोहक बाबी फसवत गेल्या संध्याकाळी

 

अंधारातच अंदाजाने दिशा शोधल्या मानवतेच्या

मग प्रेमाच्या प्रकाश रेषा उजळत गेल्या संध्याकाळी

 

संसाराचा खेळ मांडला तो तर होता प्रभावशाली

प्रतिमा त्याच्या डोळ्यादेखत सरकत गेल्या संध्याकाळी

 

सुखदुःखाची करत बोळवण तडजोडीच्या घटना घडल्या

झंजावाती वादळात त्या उधळत गेल्या संध्याकाळी

 

खरे काय ते अखेर कळले अनुभवले ते मृगजळ होते

लोचनातल्या आसवधारा बरसत गेल्या संध्याकाळी

© प्रा. तुकाराम दादा पाटील

मुळचा पत्ता  –  मु.पो. भोसे  ता.मिरज  जि.सांगली

सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३

दुरध्वनी – ९०७५६३४८२४, ९८२२०१८५२६

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री प्रभा सोनवणे

साजणा हौस माझी पुरवा, हौस माझी पुरवा

यंदा जत्रेत मला की हो मिरवा मला तुम्ही मिरवा ॥धृ ॥

 

चोरून भेटण्यात वर्ष गेली चार

तुम्ही मर्द गडी तालेवार

मी सुकुमार देखणी नार

पाढा पुन्हा पुन्हा प्रीतीचा गिरवा

यंदा जत्रेत मला की हो मिरवा.. ॥१॥

 

राजसा,अहो दिलवरा माझं जरा ऐका

बक्कळ झालाय तुमच्या कडं पैका

इश्कबाजीचा बसू द्या ना शिक्का

सा-या गावाची तुम्ही जरा जिरवा

यंदा जत्रेत मला की हो मिरवा…॥२॥

 

पाळणा जत्रेतला घालतोय साद

खेटून बसताच मिटतील वाद

जडला जीवास तुमचाच नाद

हात हलकेच पाठीवर फिरवा

यंदा जत्रेत मला की हो मिरवा ..॥३॥

 

साज सोन्याचा, पुतळ्याची माळ

घडवा आतातरी चांदीचे चाळ

नाच नाचून बोलते मधाळ

विडा वर्खाचा ओठामधे भरवा

यंदा जत्रेत मला की हो मिरवा…॥४ ॥

© प्रभा सोनवणे

संपर्क – “सोनवणे हाऊस”, ३४८ सोमवार पेठ, पंधरा ऑगस्ट चौक, विश्वेश्वर बँकेसमोर, पुणे 411011

मोबाईल-९२७०७२९५०३,  email- [email protected]

≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈