मराठी साहित्य – कवितेचा उत्सव ☆ हे शब्द अंतरीचे # 201 ☆ कपाट… ☆ महंत कवी राज शास्त्री ☆

By Hemant BawankarNo Comments

महंत कवी राज शास्त्री

?  हे शब्द अंतरीचे # 201 ? 

☆ कपाट… ☆ महंत कवी राज शास्त्री ☆

☆

बंद कपाटाच्या ओठांवर

श्वास कुठला गुंतला आहे?

स्मृतींच्या धुळकट पानावर

विस्मृतीचा तुटला भाव आहे.!!

 

उघडले की वास जुना

काही गुपित सांडलेले

आठवणींची पत्रे जुनी

काळजाच्या घडीत गुंफलेले.!!

 

कधी पुस्तकांची गर्दी

कधी कपड्यांची शिस्त

पण आत कुठेतरी लपली

न पाळलेल्या कर्तव्याची भिस्त.!!

 

कधीतरी हात फिरवताना

एखादा स्वप्नमेख लागतो

बंद दाराआड दडलेला

काल पुन्हा हुंदका देतो.!!

 

कपाट म्हणजे केवळ सामान

का काळाचा एक ठेवा?

उघडले तर आठवणींचा सागर

बंद केले तर मौनाचा मेवा.!!

 

काळवंडले जुने कपाट

स्तब्ध उभा कविराज

पाहुनी त्याची ही व्यथा

हलला अंतःकरणाचा राज!

☆

© कवी म.मुकुंदराज शास्त्री उपाख्य कवी राज शास्त्री

श्री पंचकृष्ण आश्रम चिंचभुवन, वर्धा रोड नागपूर – 440005

मोबाईल ~9405403117, ~8390345500

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares

मराठी साहित्य – कवितेचा उत्सव ☆ विचार आपला आपला… ☆ सौ. ज्योती कुळकर्णी ☆

By Hemant BawankarNo Comments

सौ. ज्योती कुळकर्णी 

? कवितेचा उत्सव ?

☆ विचार आपला आपला…☆ सौ. ज्योती कुळकर्णी ☆

☆

देतेस रोज पाणी उपकार जर म्हणावे

देतो फळे फुले ते उपकार का नसावे

 *

देतोस काय मजला हाती धुपाटणे हे

देऊनही मते मी, लाचार काय व्हावे

 *

ते पारधी ससा मी, हातातलाच त्यांच्या

मी नेहमी तयांच्या, खाद्यास का मरावे

 *

चोरी करून सुटका होईल का सदाही

तू एकदाच माझ्या पंजात सापडावे

 *

दिसतोस फक्त जेव्हा, येतात नेमणूका

खुर्ची तुला मिळावी, मी तर उगा जळावे

 ☆

© सौ. ज्योती कुळकर्णी

अकोला

मोबा. नं. ९८२२१०९६२४

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares

मराठी साहित्य – चित्रकाव्य ☆ निसर्गनिर्मित… ☆ सुश्री नीलांबरी शिर्के ☆

By Hemant BawankarNo Comments

सुश्री नीलांबरी शिर्के

?️?  चित्रकाव्य ?️?

☆ निसर्गनिर्मित… ☆ सुश्री नीलांबरी शिर्के ☆

☆

निसर्ग निर्मित सुंदर पेले

उमललेत तुमच्यासाठी

सदगुणांचे पेय भरूनी

हे चषक लावा ओठी

*

या पेयाची धुंदी देईल

नवचैत॔न्याची अनुभूती

करीता प्राशन पेया होई

सदविचारी ती व्यक्ती

☆

©  सुश्री नीलांबरी शिर्के

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares

मराठी साहित्य – कवितेचा उत्सव ☆ “मन सैतानाचा हात“ ☆ श्री सुहास सोहोनी ☆

By Hemant BawankarNo Comments

श्री सुहास सोहोनी

? कवितेचा उत्सव ?

☆ मन सैतानाचा हात ☆ श्री सुहास सोहोनी ☆

☆

मन सैतानाचा हात —

मन देवाचे पाऊल —

 🌿

मन उफराटे झाले वाघुळ

उलटे लोंबतसे

म्हणे परि माजून, जगत हे

उलटे झाले कसे…

 *

छतास उलटे लटकुन, म्हणते

पशु, पक्षि, माणसे

शीर्षासन कां करुन चालती

धावति, उडती तसे…

 *

काय म्हणावे या मूर्खाला

झाली का बाधा

कोणी धरिले या झाडाला

भूत, प्रेत, समंधा…

 *

देव राक्षसा जखडुन टाकिन

नित्य करी दर्पोक्ती

बलाढ्य आणिक बुद्धिमान मी

अतुल्य माझी शक्ती

 *

शेफारुनिया गर्व चढे कां

मनास उन्मत्त

कोणी मजसम नाही दुसरा

म्हणा कुणीहि प्रमत्त…

* 

उचलुनिया खांद्यावर घ्या रे

मीच लाडका खरा

टाळ मृदुंगा बडवुनि माझा

जयजयकार करा

 *

तोच दुरूनी रेड्यावरुनी

आला यमधर्म

देह न्यावया यमलोकांसी

जैसे ज्याचे कर्म…

 *

यमास बघता थरथरले मन

सैरभैर झाले

देहासंगे मृत्यु मनाचा

ज्ञान जुने स्मरले

 *

साक्षात मृत्यू समोर येता

मनासि फुटला घाम

पोकळ दावे वितळून गेले

मनी उमटला राम…

 *

बलशाली किति झालो तरिही

जन्म नि मृत्यू कुठले

नाहि कधी कक्षेत माझिया

कळुन मला चुकले…

 *

फुटला फटकन् फुगा भ्रमाचा

झाला चोळामोळा

नियती पुढती तनमन दुर्बल

जसा मातिचा गोळा…

🌺

मन राखावे सदा जसे की

पवित्र निर्मळ गंगा

मनामधूनी नित्यचि गावे

विठुच्या गोड अभंगा…

🌺

© श्री सुहास सोहोनी

रत्नागिरी

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares

मराठी साहित्य – कवितेचा उत्सव ☆ विजय साहित्य # 240 ☆ आद्य पत्रकार..! ☆ कविराज विजय यशवंत सातपुते ☆

By Hemant BawankarNo Comments

कविराज विजय यशवंत सातपुते

? कवितेचा उत्सव # 240 – विजय साहित्य ?

☆ आद्य पत्रकार..! ☆

(काव्यप्रकार अष्टाक्षरी.)

☆

बाळशास्त्री जांभेकर,

आद्य पत्रकार थोर .

वृत्तपत्र दर्पणाने ,

जगी धरलासे जोर…! १

*

सहा जानेवारी रोजी ,

वृत्तपत्र प्रकाशीत .

शोभे पत्रकार दिन ,

ख्याती राहे अबाधीत…!२

*

शास्त्र आणि गणितात ,

प्राप्त केले उच्च ज्ञान .

भाषा अकरा शिकोनी ,

केले बहू ज्ञानदान….!३

*

छंद शास्त्र , नीतीशास्त्र ,

व्याकरण, इतिहास .

पाठ्य पुस्तके लिहोनी ,

ज्ञानमयी दिला ध्यास…!४

*

पुरोगामी विचारांनी ,

केले देश संघटन .

विज्ञानाचे अलंकार ,

अंधश्रद्धा उच्चाटन…!५

*

स्थापियले ग्रंथालय ,

ज्ञानेश्वरी मुद्रांकीत  .

शोध निबंध जनक ,

नितीकथा शब्दांकित ..!६

*

दिले ज्ञान वैज्ञानिक ,

केले कार्य सामाजिक .

पुनर्विवाहाचे ध्येय,

ज्ञानदान अलौकिक..! ७

*

भाषा आणि विज्ञानाचा ,

केला प्रचार प्रसार .

दिली समाजाला दिशा ,

तत्वनिष्ठ अंगीकार….!८

☆

© कविराज विजय यशवंत सातपुते

सहकारनगर नंबर दोन, दशभुजा गणपती रोड, पुणे.  411 009.

मोबाईल  8530234892/ 9371319798.

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares

मराठी साहित्य – कवितेचा उत्सव ☆ “खिचड़ी…” ☆ श्री आशिष मुळे ☆

By Hemant BawankarNo Comments

श्री आशिष मुळे

? कवितेचा उत्सव ?

☆ “खिचडी…” ☆ श्री आशिष मुळे ☆

☆

आयुष्याची खिचडी काळाचा अग्नी

शरीराचे पातेले मनाचे पाणी

तांदूळ प्रयत्नांचे हळद संस्कारांची

मीठ भावनांचे अन डाळ नशिबाची …

*

डाळ शिजायला लागतो सर्वात जास्त वेळ

म्हणून खिचडी करायची कोण सोडत नाही

तांदूळ शिजतात लगेच म्हणून

मीठा शिवाय नुसते कुणी खात नाही…

*

कधी झालेच मीठ जास्त

तर होते मनाचे पाणी पाणी

अजून पाणी ओतल्या शिवाय

खिचडीचे खरे नाही …

*

चवीला थोडीफार उन्निसबीस

कशीतरी जाते खपून

पण हळदी शिवायच्या खिचडीला

कोणी खात नाही चापून ….

*

थोड्या थोड्या वेळाने कायम

ढवळावी लागते खिचडी

राहिली स्थिर तर करपेल कारण

कालाग्नी कुणाचा गुलाम नाही …

☆

© श्री आशिष मुळे

≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares

मराठी साहित्य – वाचताना वेचलेले ☆ “हळवा मोहर” – कवयित्री : शांताबाई शेळके ☆ प्रस्तुती – श्री सुहास रघुनाथ पंडित ☆

By Hemant BawankarNo Comments

श्री सुहास रघुनाथ पंडित

? वाचताना वेचलेले ?

☆ “हळवा मोहर” – कवयित्री : शांताबाई शेळके ☆ प्रस्तुती – श्री सुहास रघुनाथ पंडित ☆

(वरील सुंदर पेंटिंग पाहून आठवल्या शांताबाईंच्या काव्यपंक्ती…! — संग्राहक : चंद्रशेखर देशपांडे ) 

☆

या वळणावर वळताना मज

आठवते, की हेच तुझे घर

कोनावरले झाड तेच ते

अजुन ढाळिते हळवा मोहर

*

या वळणावर वळतांना मी 

कितीदा झाले कंपित, कातर

वीज धावली तनूतुनी जरि –

क्षण अडखळले पाऊल आतुर !

*

ओठांवरचे अधीर हासू

धीट लाजही डोळ्यांमधली

पुन्हा पुन्हा मनी घुटमळणाऱ्या

कवितेतील भावोत्कट ओळी –

*

अता न उरले तसले काही

संथ जाहले डचमळुनी जळ

गहन एकदा जे गमले मज

आज तयाचा सहज दिसे तळ

*

वळणावर या वळता तरिही

भरते काही उरी अनावर –

सुन्या मनाच्या भूमीवरती

ढळत राहतो हळवा मोहर !

☆

कवयित्री – शांताबाई शेळके

प्रस्तुती : श्री सुहास रघुनाथ पंडित 

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares

मराठी साहित्य – कवितेचा उत्सव ☆ मनाचे मंदिर… ☆ सुश्री नीलांबरी शिर्के ☆

By Hemant BawankarNo Comments

सुश्री नीलांबरी शिर्के

? कवितेचा उत्सव  ?

☆ मनाचे मंदिर… ☆ सुश्री नीलांबरी शिर्के ☆

☆

मन मंदिरा देव्हारी

सदविचार गाभारा

सद वर्तन हा देव

मांगल्य ये परिसरा

*

 मन मंदिर स्वच्छता

 नीत्य नियमीत व्हावी

 माया ममतेची फुले

 अंतरातच फुलावी

*

 नको द्वेष न् मत्सर

 आप पराचे अंतर

 सत् कर्म करूनिया

 जपू मनाचे मंदिर

 ☆

 

©  सुश्री नीलांबरी शिर्के

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares

मराठी साहित्य – कवितेचा उत्सव ☆ सुजित साहित्य – “छोट्या छोट्या चुका…!” ☆ श्री सुजित कदम ☆

By Hemant BawankarNo Comments

श्री सुजित कदम

? कवितेचा उत्सव ?

☆ सुजित साहित्य – छोट्या छोट्या चुका…! ☆ श्री सुजित कदम ☆

☆

त्याच त्याच गोष्टीआपण

किती वेळा ऐकतो

तरीसुद्धा आपण पुन्हा

त्याच चुका करतो…!

*

चुकांमधून काहीतरी

शिकता यायला हवं

कुठे चुकलो आपण

हे समजून घ्यायला हवं

*

पुन्हा पुन्हा त्याच चुका

म्हणजे शुद्ध गाढवपणा

चुकून सुद्धा नाही म्हणणं

म्हणजे केवळ मूर्खपणा

*

चुकलं तर चुकूदे

हरकत नाही काही..

आपण काही कुणी

साक्षात परमेश्वर नाही

*

चुकांमधून थोडा तरी

बोध घ्यायला हवा

पुन्हा चुक होणार नाही

हा संकल्प करायला हवा…

*

लहानपणी ऐकलेल्या

गोष्टी जरा आठवूया.

छोट्या छोट्या चुका आता

आपणच आपल्या टाळूया…!

☆

© श्री सुजित कदम

मो .. 7276282626

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares

मराठी साहित्य – कवितेचा उत्सव ☆ गय… ☆ सुश्री तृप्ती कुलकर्णी ☆

By Hemant BawankarNo Comments

सुश्री तृप्ती कुलकर्णी

? कवितेचा उत्सव ?

☆ गय… ☆ सुश्री तृप्ती कुलकर्णी ☆

☆

सुखाला नुसते ‘शब्द’देखील सहज गवसत नाहीत

पण दुःख मात्र सोबतच घेऊन येते आपली ‘लय’

*

त्या वेशीवरती जर नसतीच झाली आपुली भेट

तर डोळ्यांमध्ये का दाटून आली असती ‘सय’

*

रोज सुचतच नाही लिहायला मजला काहीबाही

पण लिहिते करते दुःखानेही सोडून जायाचे ‘भय’

*

तसे ऋतूंचे बहरणे होते नेहमी‌प्रमाणेच सुरळीत

पण बेसावध क्षणी मोहरण्याचे होते आपुले ‘वय’

*

मी थांबले होते नंतर त्या मोहक वळणापाशी

पण होकाराच्या विलंबाने केलीच नाही माझी ‘गय’

☆

©  सुश्री तृप्ती कुलकर्णी

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

Please share your Post !

Shares