सुश्री वर्षा बालगोपाल
कवितेचा उत्सव
☆ बरसणार मी आहे– – – ☆ सुश्री वर्षा बालगोपाल ☆
☆
फोडूनी काळे तम उजळणार मी आहे
शिशिराची ना पर्वा बहरणार मी आहे
*
देती जे दु:खा मज न चुकता अहोरात्री
माफी त्यांना देउन विसरणार मी आहे
*
गोळा केले तेजा ठिबकलेच ज्योतीतुन
होऊनी दिवटी बघ चमकणार मी आहे
*
नाही आता नारी सहनशील मी उरले
फोडूनी डरकाळी गरजणार मी आहे
*
माझ्या कर्तृत्वाच्या उमलवीन कमळाला
गंधाने किर्तीच्या पसरणार मी आहे
*
साध्या सोप्या गोष्टी सहज सुलभ हो असती
अंगीकारूनी त्या विहरणार मी आहे
*
कोणी नाही अपुले का उगाच ही चिंता
प्रेमाच्या वर्षाने बरसणार मी आहे
☆
© सुश्री वर्षा बालगोपाल
मो 9923400506
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री प्रमोद वामन वर्तक 
वाचताना वेचलेले 
